Accueil - sefarad.org

Kozmetikerya !

    MENU    

SEFARAD.org
ESKRITOS de savor
RESHETAS
AIDEZ-nous
Page PRECEDENTE;

KOZMETIKERIYA  !
 
 
El otro diya abashimos a Kadikoy kon mi ayudante
para "achilarmos el korason" !  Merkar alikas i tumbanikas,
entrar a la farmasiya por las vitaminas de los ojikos 
(ke no topimos !)  -el OCUVITE se izo YOK en Turkiya ! 
Se lo vo rogar a mi ijiko ke me lo embiye de la Ingleziya !-
Se izyeron buena mursa mis ojikos tan luzyos !
 
Kurto merkimos unos nanizikos/nains de komerles sus
kakuletas koroladas... Ke ermozura ke los azen. Ya tengo
mas de 10 deyos !  Komo los nanikos de Blanche Neige. 
Tiyenen sus kantiniko spesyal en mi salon... Vos
namorariyash de verlos !
 
Mas merkimos munchas kozikas ke no se tienen de menester,
por el keyf de salir afuera, i komimos en un lugar sharanfonfon
kozas de diyeta...Mas kualo!  I a la fin o un poko antes de la fin
entrimos.....Ande ?   Ayyyyyyyyyyy  ande todas mis amigitas
adoran entrar i kaminar horas interminavles. 
 
Vos kontare.... Mi ayudante disho ke keriya merkar mascara
para los ojos...  Mi gran'mamie diziya karatula (komo maska!)
OK !  Vimos un magazen wohouuuuu  super moderno, grandeee,
elegante.... Shoronfonfon por seguro !  No lo aviya visto dayinda.
Pishin mos vino una hostesa para ayudarmos en las kompras. 
Ya savesh, de estas komo se ven en los defiles de moda ! 
Me entro por la boka me salyo por la nariz, entro de mis
orejas i salyo de mi ombligo i mos vendyo vedre i seko porke
yo estava de buena  humor parese.  
 
El tiempo estava komo limonata, ni friyo ni kalor, a la demanyana
vide en la balansa ke aviya abashado de 9 kilos en 2 mezes,
teniya mi bolsika yenna de parayikas, viya el mundo en roz,
todo bueno i ermozo...
 
Keyf de bivir !  La vedra es ke mi  lokita de ayudante kijo ke
me  vistyera muy shik, kon makiyaj, kalsados kon talones,
kaveyos dezatados !  Ni ke me rekonosi al espejo !  Atyo ! 
Tengo 67 anyos !  Ke es  este hal !  Se metyeron en d'una
eya i la hostesizika i me tomaron  al pelo !  Negra de mi ! 
Kualo ke vos konte !  Brigitte Bardot i  Marilyn Monroe les
vino poko !  Keriyan jugar ?  I yo entri al jugo  i en poko
tiempo la mitad del magazen !  El  patron me disho ke
estava pronto a angajarme para lavorar aya i no importa
en kualo.   Todo lo ke yo iva kerer !
 
2 horas pasimos aya... Un teyatro, unos numeros, unas
rizas, mos divertimos komo lokitas !  Valyo la pena de salir
afuera !  Lo ago tan pokitiko !....
 
Penso ke mas de ser ermozos vale la pena de sentirse
ermozos i atraktivos...  Sintirse komo Brad Pitt i Sophie
Marceau !  Ay tantos ermozas i ermozos i se komen el
korason porke les parese ke la naris esta larga i tuguerta,
les sale la tripa, la talya la tienen godra, las piernas no
estan bastante finas  ets  ets.... No vale la pena de ver
la vida en preto para estas kozas... Di-o mos da a kada
uno un hen spesyal !  I si no lo tenemos en la vista, lo
tenemos en muestra avla o en la limpyeza de muestra
alma...
 
Lehayim  !
 
 
Sharope blanco

- Copyright © sefarad.org - 1997 - 2017

Retour au site sefarad.org -