|
ITSHAK PERLMAN - PREMIO GENESIS 2016
Allelluia...................
Es Itzhak Perlman, mi preferido genio de musika
klasika ke va resivir el PREMIO GENESIS en
Junio 2016 en Yerushalayim....
Resivyo tambien el Premio Presidensyal de la
Libertad -Estados Unidos- de las manos de
Barak Obama, el Nov. 24, 2015.
Nasyo en Israel en 1945 -Tiene 70 anyos -
i es un judyo konservativo komo todos los
membros de su familya. Es kazado kon Tobi
i tienen sinko kreaturas. Kontrakto la polio ke
lo desho enfirmo por el resto de su vida, a la
edad de 4 anyos.
El pensa uzar el 1 Milyon de Dolares del
PREMIO GENESIS ofresido por un grupo
de filantropistos Judyos-Rusos por projektos
relatados a la muzika klasika i a los invalidos.
Es el treser anyo solo ke este premio se da.
Lo tomaron Bloomberg ke kijo en primero
developar projektos Israelo-Palestinyanos ma
el komite del Premio se lo refuzo i desidyo por
fin de finansar 9 projektos ke tyenen valores
judiyas. Mas de la mitad de estos projektos se
realizan por organizasyones sin dingun profito
ke se topan fuera de los Estados Unidos i de
Israel.
La segunda vez, el Premio se dyo a Micheal
Douglas, aktor/produktor de padre judyo i de
madre non-judiya ke se komprometyo de uzar
los fundos para prevenir los kazamientos mikstos
i ayudar los ke izyeron kazamientos asemejantes.
Perlman dize ke su buto sera de promover el
bien en el mundo -tikun olam- , de ayudar las
personas, de azer buendades por ser judyo.
Es muy sensible a todo lo ke toka los invalidos
i a los ke sufren del terrivle polio.
Perlman yego a un nivel eksepsyonal en su
karyera de violonisto virtuozo i en el
konosimiento de la muzika klasika. Izo sus
estudyos en la Julliard School de New York
ke es la mas famoza eskola de muzika del mundo.
Aparesyo en el show de Ed Sullivan en 1958.
Resivyo 16 Premios GRAMMY i dyo
konsiertos delantre de munchos kapos de Estados.
Salyo muy munchas vezes a la Televizion tambien.
Perlman estava detras de la maraviyoza muzika,
el solo ke se oye en el famozo "Schindler List"
ke gano el GRAMMY i el OSKAR.
Perlman tiene un program muy kargado de
konsiertos en el mundo entero. Milyones
de personas korren a oyirlo i malgrado esto
se dedika a los talentos mansevos en siendo
sus profesor. No le importa de ayudarlos en
todo i de darles sus tiempo libre. Es un avokato
enflamado tambien por los derechos de los
dezhabilitados.
UN APPLOZO DE KORASON PARA
ITZHAK PERLMAN - Ad mea ve esrim !
Sharope blanco
Fuente : JTA
|
