|
UNA SOLA FRAZA
Kuando todas las luzes s'amatan
I las kayas son de muevo asoladas
Kuando todos sonyan o kayados s'asentan
Por no pueder durmir kon ideas amargas,
Kuando el sol briya arriva en su reynado
I la mar sentiya en sus ondas vibrando
Kuando las flores avlan de bizbas, tremblando
L'ayre karesa las karas kom'una mano,
Kuando las demanyanas la freskura mos allegra
O las tadres, kansados, bushkamos el repozo
Kuando me avlan de todo lo ke les agrada
Personas van i vienen kon un abraso karinyozo,
Kuando esto en la guerta, triste i sola
I miro los ke pasan i los arvoles kon fuerza
Kuando bivo el momento sin pensar a la manyana
Lagrimas en mis ojos i un espanto ke m'alkanza
Kuando sin dingunos kamino en las kayes
Mis ojos bushkandonte i no estas kon mi
Por no pueder dizirte todo, de mi timides...
Te amo, i no ay momento ke no penso en ti !
Sharope Blanko
|
