Accueil - sefarad.org

Esta yelor

    MENU    

SEFARAD.org
ESKRITOS de savor
RESHETAS
AIDEZ-nous
Page PRECEDENTE;

 
ESTA YELOR 
 

   Los anyos pasaron i los pasharos se van !
   En estos lugares ke todo troko, no kedan...
   Karas, fotografias delantre de mis ojos bolan
   No las alkanso, fuyen kon prestor, se aleshan..


  Miro a las muevas ojas de los arvoles,
  Al vedre klaro i a las kolores de las flores.
  Yego la primavera, oygo la allegria de sus kantes
  El sol aklara los sielos i arekayinta los amores.

 
   Porke dayinda me emosyona la primavera  ?
   Kero espandirme ensima de la yerva freska !
   Mi korason bate al ritmo de una fin serka...
   Durmir sin espertarse i ser aya ariva una estreya...


   Las demanyanas ayres lokos sekan mis lagrimas
   Kamino en estas kayes pensando mas i mas...
   Nada esta klaro o dicho por las oras...
   Yo lo se... Se kayan por no dizir mintiras !


   Asperar ?  Ken ?  Kualo ?  Ke es este vaziyo ?
   Grito...Dingunos no oyen, ni yo mizmo !
   Konto lo ke es, ma no me sale ni un biervo !
   Miro, mis ojos no yoron mas, solo miro...


   Las noches aze bruido la kayades !
   Inche las orejas el silensyo en vezes...
   Siento tu boz yamarme....Me digo "ken es ? "
   El olvido kuvijo de su manta los nombres...

 
   No, no, no es verdad...Me yerri en un lugar !
   Mis rekuerdos son bivos mizmo si los kero tapar...
   Ke es lo ke tengo de olvidar i nunka akodrar ?
   Un aniyo ? Las ojas amariyas de letras para echar ?


   Esta friyo....Mis kantones son arekojidos portanto !
   Mis ventanas estan aviertas i el tiyempo ya kayinto.
   Es mi sangre...Ni el ayre ni la luvya ke sarpiko !
   La yelor de mi korason enteza todo lo ke yo siento !


    Sharope Blanco

- Copyright © sefarad.org - 1997 - 2017

Retour au site sefarad.org -