Accueil - sefarad.org

Tu kumpleanyos

    MENU    

SEFARAD.org
ESKRITOS de savor
RESHETAS
AIDEZ-nous
Page PRECEDENTE;

TU KUMPLEANYOS


Las luzes de SM briyan komo estreyikas
Esta noche dezeo ke se olviden las penas
Ke no egzisten malos penseryos i ansyas
Ke todos s'allegren kon rizas i sorizas


SM fiesta kon musika i flores golorozas
Tapones brodados i kandelas en las mezas
Enteras dekoradas de kristales i platas
Para las komidas, los vinos i las dulsuryas


Selebramos el diya este ke Mikimika nasyo
Alegrandomos enjuntos en su aniversaryo
Vistidos de boda kon elegantes fostanes
Los hombres kon papiyon i ermozos kostumes


Parese a una nostaljiya a los tiempos pasados
Kuando oyivamos los kantos d'amores i yoravamos
Las poeziyas kontavan istoryas de amantes lokos                 
La borraches de la manseves kuando eramos mansevos

 

Los amigos no se olvidan de sus amigos !
Los amantes no s'esparten mismo ovligados !
El karinyo no se kaya, topa miles de kaminos !
L'alegriya no se puede tapar kon las manos !


La fiesta se termino... Ya estan las kuatro !
Tu durmes de un esuenyo de ninyas en tu kuarto
Yo esto espierta, kansada puedeser ma no tanto
Soriyendo i karesando mis rekuerdos kon afekto

 

Sinti una kaynte emosyon el kanto de tu korason
Deshates kantar los biervos ke viniyan de tu garon
Los eskrivites komo eran kon todo lo ke disheron
Sin guadrar nada en ti...en las ventanas aparesyeron...
    
                               
Ke komplikados i ke simples ke son, los sentimientos
Las amistades de un tiempo no kontan en los tiempos !
Los amores ke bolan kon el vento tornan kon los ventos
Lo ke kema no duele mas, es komo nadar en lagos kalmos.


Ke digo en el silensyo de la noche fria entera kuvijada !
Eskrivo... Ni se lo ke digo ! Eskrivo sin pensar a nada !
Los biervos no tienen importansya... Se pueden efasar !
Lo ke no se efasa se puede inyegar ! Sin mizmo pensar !


Riyo de todo esto... K'ermozo aniversaryo !
A vezes me desho ir, bolar sin dingun penseryo
Bolar digo ?  Ande bolar, ke montanyas pasar ?
So un pasharo, una bizba amoroza sin amar !


Fiestas...Prefero saltar ensima de las piedras
Ande la ola viene murir a los pies de las rokas
Espandirme ensima de las arenas blankas i blondas
De los payises leshanos, de las plajes asoladas


Ke dezeya mi alma ? Ke kero mas de todo en mi vida ?
Ke kije sovre todo ke no logri ? No tengo repuesta !
Kuando digo ke no dezeyo mas nada, dizen es hazinura !
No es ! No es ! Bivi tanto, Vide tanto ke esto kansada !


Kumpleanyo felis Mikimika !


Sharope blanko

- Copyright © sefarad.org - 1997 - 2017

Retour au site sefarad.org -