Accueil - sefarad.org

De tadre

    MENU    

SEFARAD.org
ESKRITOS de savor
RESHETAS
AIDEZ-nous
Page PRECEDENTE;

*
 
DE TADRE.....
 
 
Es la tadre...
De muevo, el horizente se viste
De la kolor de la lumbre...
El diya se retira
En los profundos se aleskura la agua
I un momento mas tadre
Las nuvlas s'aunan al horizonte
La noche, misteryoza
Abrasa los montes d'enfrente...
 
 
Yo me durmo i me peryo en mis suenyos
Mas briyozos ke las estreyas de los sielos
Kon las blankas naves ke avren velos
Para los leshanos puertos ensoleyados
Me kuvijo i m'emburujo aryento d'un vento
I bolando ensima del Oseano
De las montanyas m'arezvalo
A los brasos de las arenas blankas
Verso las espumas muryendo en las rokas .
 
 
El diya esta ni kaynte ni friyo !
Kalmo mi sed en el seno de las aguas del rio.
Veygo aya, el mistiko pasharo blanko
Bolta su blanko kuelyo al sielo...
De los palasyos de marfil enkantados
Se oyen kantos alegres i antiguos
Kon biervos i melodiyas mistikas
Ke kontan historyas ke s'izyeron epopeas
So reyna, tu el monarko i los suenyos koronas.....
 
 
Enterro el tiempo...
I kontemplo el bayle de las kolores
A traverso de los vedres....
Los vedres son mi trono !
I kon un dezeyo miyo
Les viene alma a las ermozuras del mundo !
Se arrodeyan los rios, las spumas saltan...
Aguas kristalinas d'en alto se echan
De las kaskadas se vazyan... Se vazyan...
 
 
Las olas poderozas me travan i me yevan !
Veygo ke es de noche...Durmi i m'ensonyi !
Bolti a mi lugar...No so reyna...No esto mas ayi !
 
 
Sharope blanco
 
 

- Copyright © sefarad.org - 1997 - 2018

Retour au site sefarad.org -