Accueil - sefarad.org

Literatura de la kula i la mujer

    MENU    

SEFARAD.org
ESKRITOS de savor
RESHETAS
AIDEZ-nous
Page PRECEDENTE;

LITERATURA DE LA KULA I LA MUJER


" LOS PALESTINYANOS NO KEREN DOS ESTADOS,
UNO PALESTINYANO I EL OTRO ISRAEL ! "


Pashayikos…. A la buena hora….
Ni yo kero del todo ! Houstttttttt ha hutsa !


Ya saves komo los Amerikanos
-I por seguro los Israelyanos-
AMOSTRAN sus penseryos
En este modo de kavzos !…


No keren solusyones ! No, no mi alma…
Ke miren los por sientos i agan matematika !
Keren TEL-AVIV i los judyos en tavlas !
No ayegaran ni sus guesos ni sus almas !
I ke no puedan alevantarsen ni de sus kamas !


Guay de mozotros por los leaderes ke tenemos !
Se kreyen dayinda en Papa Noel !
Mazal ke no dizen a dingunos
Ke las roketas son meteores,
I los mortajes mantel …
 

I este arrankado de Greenberg, torobolos !
Ande pensa avrir la eskola para edukarlos ?
En Azza o en el Azazel ?
I ke les va ambezar ?
A englutir sus fiel ?


Tanah, meldar i eskrivir i Historya ?
No echar piedras, no matar i Geografya ?
Lo van a espidir kon keyf a la primera lisyon !
El ke va entrar kon su amigo le va kortar el garon !
Buen desmeoyado ! Vaziyo komo un bidon !


I Peres parese ke lo bolo kon los anyos !
Ke vayga i ke se arresfreske en los banyos !
Ken los engodresyo i se izyeron gayos lokos ?
Los fuyeron i assasinaron muestros mansevos !


Basta de komer chanchas, pipitas i kashkaras !
Pasaremos al TAHLES !
Desha las bavajadas !
Solusyon dize ! Ke solusyon bre ?
Keren tu kaza ! Solusyon de sus pulgas !
Se asentaran en tu meza !
 


( Offffffffff ezbafi ! Me esto inyervando ! )

Pedronansas de pekados ! No dishe nada !
Agora me esto indo presto a lavar mi boka !
Esto se yama alta literatura de la KULA..


Ken es ke estava pensando
Ke no so ke un gatiko,
Una pisika de kaza
Ni toka ni peka ?


Todo depende del estado de la persona…
Bueno… Deke no ? Esto tambien…
No se save lo ke los diyas trayen.


La mujer es komo las aguas de la mar !
A vezes es azeyte, da ganas de nadar.
Supito olas s’alegran, dan plazer al mirar


La tempesta se ve del horizonte, al leshos
La mar s’aunfla, los profundos son aleskuros
Kon el ayre del norte es komo si tiyene friyos…


Ande fuyeron las estreyas ? Mas no estan !
Blankas espumas se forman..
Nuvlas se arrekojeron, solo menasan !


Se oye un estranyo silensyo
Saves entre ti ke es falso
Asperas el primer grito del sielo


La detonasyon de un immenso kanon
El espanto de un largo tirguelo en misyon !
Ma antes… Te enteza una luz ke ensyega!
Parese kucheyar las nuvlas. Es la alampara !


Las olas atakan agora, rompyeron sus kadenas
No tienen piadad, se olvidaron de sus promesas,
Vuestra aliensya, kuando por primera vez salitesh
Le dates tu konfiensya, te dyo bezos i vos amatesh.


"Siempre" no egziste… Todo tiene ke eskapar !
Son horas, diyas, la felisitad se va a deskansar …
Se kansa presto o no tiene tiempo para asperar !
Bola de la ventana ma torna, nunka te va olvidar !


Mi mamita diziya por una syerta mujer
” Es draga de montanyas ! “, kale ver !
Ke mire a su florizika, su kodreriko de ayer !...


Una prensesa ke soriyiva siempre
La ke engrandesyo kon sharope i leche
Para ke seya regalada, blanka i dulse
Komo la espuma del vino ke s’enviejese .


Kon kremas freskas, manteka i miel,
I fostanes brodados, kon volanes de dantel
Kon platos de porselana i kucharas de plata
Para ke tenga el ojo arto i seya bien edukada !


Kon almadas de seda en kamikas de pluma,
Kon kuvyertas lavoradas de perlas de Majorka
Para ke sepa lo ke es lo bueno i lo ermozo
I no dezeye nada de lo ke no es perfekto !


Guay guay ke no tiene mas nada de esta ijika !
Ande s’eskonden sus jugettes i akeya kukla
Ke diziya “mammma” kuando la alevantava ?
No egzisten mas sus jupones de balerina
Sus buklas blondas, ni su dulse innosensya


Guay guay ke se izo zingana de las kayes !
Pyes deskalsos, biyervos de lado, mirala si keres !
Una roza en sus kaveyos largos, ojos d’almendra,
Una Carmen fuego i flama, kreatura dayinda….
Ma una tsionista tambien kon su pluma komo espada !


Sharope Blanco

- Copyright © sefarad.org - 1997 - 2017

Retour au site sefarad.org -