Accueil - sefarad.org

El fostan de Roshashana

    MENU    

SEFARAD.org
ESKRITOS de savor
RESHETAS
AIDEZ-nous
Page PRECEDENTE;

EL FOSTAN DE ROSHASHANA

Fue la semana pasada..... Esto kale ke vos konte !  
Ya vos aviya kontado akel diya de luvya en New York !
Ke desgrasya...Ama ya ezbafi kon vozotros i dospues
me sinti muncho mas mijor   :)   Spesyalmente dospues
ke konti los filmos ke viyamos en Orly i ke kadar me
plaziya Yoram Gaon....Para los ke keren akodrarse 
el numero del masaj  perdon el mesaj era 19936.

Vos aviya dicho ke un diya vo avlar del shouk de Lod.
Si, i esto vos va kontar ma en primero lo ke afito el
martes pasado antes de Roshashana....

Fiesta.......Kale fiestar.....I ke es fiestar ?  
Fostan muevo kon dantela i fiyonk i kalsados 
brilyantes sin burako en  las vandas ademas si 
estas en New York kuando ay  luvya porke sino 
te parese ke estas en  Yafo i estas metyendo los 
piezizikos kansados en el bodre de la mar en akeya 
kalor ke te desha sin soluk !  I para topar una 
gazoz kale ke kamines finaaaaaa aya, sino te 
arankan las parayikas en los kafes ande se van los 
musyusi las madamas kon las aldikeras yennas !
No es ke yo no tengo parayikas ma no se los va dar
a estos sin verguensa ke keren para una gazoz
presyo de un kilo de bananas ! Noooo ! Ke bevan
kaldo de poyo !  No va ser yo ke les vo dar a
ganar sin ke lo mereskan !

Ayyyyyyyy ke luzyo de fostan !  Estava kon Kaden
kuando lo vi por la primera ves....Kualo ke vos
diga !  Me kayeron las bavas....Estava ayi en la
vitrina ensima de la dama de plastik !  Estas ke
meten en las vitrinas para amostrar los vistidos !
Una lokura de fostan. Me namori  del fiyonk
ensima de los volanes de dantela en la fusta.
Un fostan de fiesta !  I k'ermoza kolor !  No komo
el zurzuvi ke se va vistir Kaden para ir ande su
tio noche de mued....Por siguro ke no !  Un roz
bivo komo las trandafilas de la guerta de Sultanika.
Ma, komo lo puedesh imajinarlo, estava kara a su
onor !   Agora, meter este fostan kon kalsados
pretos no va !  I yo me merko kalsados pretos
siempre para ke vaygan kon todo !  Kale merkar 
i kalsadikos para este fostaniko....I akeyos
los vide en el magazen d'allado !  K'ermozura !

Komo ke se lo diga a mi mama ke los kero tanto ?
Yo se ke va vazyar la kumbarayika arriyento del
bufe,  en el sigundo raf a la derecha, para merkarme
los todos i esto no lo kijiera !   Kualo ke aga yo 
agora ?......

Pensi bueno i me desidi de avlar kon el musyu del
magazen.... Le iva dizir ke ya esto pronta yo de
lavorar un meziziko por akel fostan i si me da
las parayikas tambien de los kalsados del
magazen de allado....Deke no ? Ya valen la pena !
Ansina pensi i ansina lo ize !

Me fui a la demanyana antes ke todos empesen
a vinir.  Afilu ke lo asperi en la puerta para ke avra
el magazen !  Kuando vino le ize una soriza fina la
otra vanda de mi karika i le dishe lo ke teniya en el 
korason.  Savej ke me disho ?  Ay mi madre 
bendicha !  ya lo esto bolando parese ! Me disho
ke yo so una ijika muy intelijente i muy buena
i ke el me va regalar el fostaniko i los kalsados !
Komo puede ser ?  Yo no lo aksepto !  I se lo dishe !
Alora  me disho ke el siempre regala ropas antes
de las fiestas a la djente i este anyo es yo ke
gani el regalo !  Lo ke me allegri...Lo ke me allegri. !
M'echi en sus brasos i empesi a bezarlo en las
karikas...Ke bueno de persona !  Ke mazal ke
yo gani este anyo su regalo !  Komo loteria !
Si era otra ijika ke iva vinir a su magazen por
el fostan iva ser eya ke iva ganar la loteria del
magazen !   No saviya ke era tan mazaloza  !

Me lo izo un paketo de fiesta el fostaniko i
los kalsados ke fue a merkar en el magazen
d'allado i me lo dyo en la mano !  Le dishe
mersi muy muncho i sali d'aya koryendo 
kom'una lokita a mi kaza para kontar le a mi madre
ke gani en la loteria del magazen !  
Nunka me vo olvidar de este Roshashana
i ke kadar de elegante yo estuve en la fiesta !
Ya so luzya i agora se ke so intelijente i buena i 
mazaloza tambien. Ya me lo disho el musyu kon el
korasoniko de oro !

Sharope blanko 


 

- Copyright © sefarad.org - 1997 - 2017

Retour au site sefarad.org -