Accueil - sefarad.org

Estas kreaturas son inimajinavles !

    MENU    

SEFARAD.org
ESKRITOS de savor
RESHETAS
AIDEZ-nous
Page PRECEDENTE;

 
ESTAS KREATURAS SON INIMAJINAVLES  !
 
 
 
Estos kuentizikos mos amostran la hohma de los chikitikos....

Muy intelijentes en muestros diyas...
Del todo no komo  " la de la buena parte "  ke era yo  en  mi
chikes  !
 
Penso  ke vos van a plazer tambien !
 
Saludozos i alegres ke estesh !

Sharopika me yaman !
 
 
 
LAS BALENAS
 
 
En klasa se estava avlando de las BALENAS ..
La profesora disho ke es imposible ke este
pishkado, el mas grande ke egziste, puede
englutir una persona porke tan grande ke es,
el garon lo tiene muy estrecho !
 
La chikitika le konto alora ke una balena se
aviya englutido a  JONAH  !  La profesora
le disho ke esto no era posivle ma la kreatura
ensistyo  i ke disho
 
-  Kuando me vo ir al Ganeden le vo demandar
a JONAH  ke me konte la vedra.
 
Alora la profesora le demando :
 
-  I si esta en el Infierno ke va ser ?
 
-  Alora se lo vas a demandar TU  !
 
 
 
 
DI-O
 
 
Estavan ambezandosen a desinar en klasa i la
profesora estava kaminando entre las mezikas
para ver kualo kada uno estava desinando.
Supito vido un desino ekstranyo i le demando
a la ijika kualo es ke estava desinando :
 
-  Di-o ! 

le respondyo la ijika sin mizmo pensar..
 
-  Ma dinguno no vido Di-o..Komo es..A kualo asemeja ...
 
La chikitika le respondyo pishin  :
 
-  En unos kuantos minutos Lo van a ver !
 
 
 
 
 
LOS DIES KOMANDAMIENTOS
 

En la klase de fin de semana se estavan diskutyendo
los Dies Komandamientos del Kadosh baruh Hu.
Eran chikitikos de 5-7  anyos.

El Maestro de klasa les estava eksplikando ke kale
"Honorar el Padre i la Madre". 
 
 Unos de los chikos disho  :
 
-  Ay un Komandamiento para los parientes ma no mos
endikaron ke azer kon muestros ermanos i las ermanikas.
Un ijiko de detras respondyo pishin  :
 
-  No vas a matar !
 
 
 
 
KAVEYOS BLANKOS

La madre estava azyendo echo en la kozina i su
chikitika estava okupada jugando enbasho.
Supito le demando  :
 
-  Mamika, deke tienes unos kuantos kaveyos blankos
diferentes de los otros ?
 
La madre la miro i soriyendo le disho :
 
-  Aze atensyon !  Kuando me inyervas i azes kozas
ke no kale azer, a kada ves me sale un muevo kaveyo
blanko !
 
-  Ah ???   I komo es ke grand'mami tiene todos sus
kaveyos blankos ??
 
 
 
 
NO ESTA MIRANDO  !
 
En la sala de komer de una eskola de monhas
los chikitikos estavan asentados para el
almuerso.   En kada meza aviya un sestiko de
mansanas.  La monha responsavle les disho :
 
-  Una mansana para kada uno.  No ay tomar
de maziya porke DI-O vos esta mirando.
 
En la otra meza aviya biskochikos de shokolad.
El ijiko disho a sus amigos  :
 
-  Inchivos las aldikeras ....i puedesh tomar kuantos
keresh.  Di-o  esta okupado a kontrolar las mansanas !
 
 
 
 

- Copyright © sefarad.org - 1997 - 2017

Retour au site sefarad.org -