Accueil - sefarad.org

Letra de solisitasyon a Di-o

    MENU    

SEFARAD.org
ESKRITOS de savor
RESHETAS
AIDEZ-nous
Page PRECEDENTE;

LETRA DE SOLISITASYON A DI-O
 
Data de renovelar el kontrato
 
A : DI-O, A-DONAI, el Patron del Mundo Todo Poderozo
De : Los Judyos
 
Konsernando :
La eskapasyon de muestro Statu Espesyal de Puevlo Eskojido.
 
 
Komo lo saves, vino el tiempo de renovelar el kontrato ke izitesh
Abraham i TU, i este memorandum es para avizarTE, dospues
de aver konsiderado muestro situasyon unos milenios, ke
desidimos de no renovelarlo.
 
 
Devemos immediatamente dizir ke no tenemos nada en eskrito,
i kontraryo a lo ke todos pensan, no tuvimos muncho intereso de
este kontrato de vedra...
 
 
Todo empeso del pye siedro ! En los primeros tiempos no solo
Israel i Judea fueron siempre konkistadas kada anyo, ma fuimos
ovligados de fraguar no uno ma dos Templos kon gastos
immensos para, a la fin, kedar sin Templo ! Todo lo ke mos kedo
de estos son un monton de piedras viejas ke forman un muro
ke yamamos LOS MUROS DE LAMENTASYON. Por seguro
ke ya saves todo esto, ma lo trayemos a TU attensyo komo una
de las razones por laskualas keremos terminar muestro kontrato.
 
 
Dospues de los Assirianos i los Hittites ke mos aharvaron diya
diya, fuimos vendidos komo ESKLAVOS a Egypto i perdimos
unos siglos de tiempo para enfloreser i developarmos.
 
Agora realizamos kuanto fue komplikado para TI de embiyar
MOSHE para ke mos kite de Egypto i ke horas malas pasaron
estos povretos de Egyptianos ke fueron aharvados kon tantas
"belas" /tormentas dezgrasyadas para ke mos deshen partir
por fin... Lo ke no entyendo es deke mos tomo unos 40 anyos,
este viaje ke EL AL aze oy en 45 minutos...
 
 
Otra koza, kon perdon por muestra ingratitud, deke le permetites
a MOSHE de konduizirmos a la Siedra del Sinai, al lugar de la
derecha !? Mos yevo al uniko lugar en el Medyo Oryente ande
no se topa un gramo de Petrolio, alora ke en todos muestros
entornos ay tanto i tanto.... I kon la agua ke esta kontrolada por
la Siria i el Jordano.... Oy si trokan solo la direksyon de estas
aguas....
 
 
Dospues vinyeron los Romanos ! La vedra es ke mos
trusheron agua buena para bever, izyeron akedukes i banyos
para lavarmos, MA era muy inkonfortavle de kaminar en estos
kaminos ke yamaron "via" i ver, kuando alevantadamos
muestros ojos, unos de muestros konosidos, o keridos,
ENKLAVADOS en las alturas de los direkes (poteaux) komo
sinyos de trafiko para ke se veygan por el mundo entero...
 
 
Mizmo uno de muestros prenses, JUDAH BEN HUR se apanyo
kon ekipajes romanos konduizendo komo un loko sus kavayos
en el KOLIZEUM ! Va entyendelo ! Dizen ke asemejava komo
dos gottas de agua a MOSHE !
 
 
Supito, salyo un marangoz (karpentero), de vedra uno ke aziya
echo bueno i a presyos no muy karos, ke se deklaro TU ijo !
I antes mizmo ke sepamos ke afito, ken es ken, kualo se esta
pasando, mos topimos enfrente de una mueva relijyon ! Para
meter sal a muestra firyida, otra vez fuimos deportados.
Fuimos de vedra tristes de saver ke este buen hombre fue
juzgado i enklavado komo tantos otros por los Romanos. Ma
esto te va azer riyir seguramente, otra vez mos echaron la
kulpa... Por una vez no puediyamos ser mozotros responsavles ?
NO ! Siempre salimos mozotros KUPAVLES DE TODO.
 
 
Agora ay una koza ke no entendemos del todo !.... Este hombre
JESUS CHRISTO de vedra ke vino soliko ! Muy munchas
personas lo veneraron i adoraron su nombre i sus eskriturias
i malgrado esto mataron milyones de los muestros ! Disheron
ke bevemos la sangre de los bebikos, somos los duenyos de
las grandes bankas i de la media.... Estamos puedyendo
eksplikarTe un poko lo ke mos tuye ?
 
No tanto presto pasaron los unos kuantos siglos i mos kayeron
ensima de la kavesa las kruzadas ! Di-o miyo ! Se arrekojeron de
todas estas tierras leshanas, trespizaron los Arabos i vimos estos
Lordes i Kavallyeros matandomos vedre i seko ! Kada vez ke un
Rey o un Papa se topava en diffikultad o en mizerya, deklarava
una kruzada. Lo yamavan la Guerra Santa. Oy se yama JIHAD.
Devastaron muestras tierras i mataron i degoyaron a todos ke se
topavan enfrente de eyos !
 
 
Es ansina ke kijites ver si TE kedamos fideles i TE adoramos...
Era duro ! Ma no tanto duro komo kuando salyo un brilyante
saserdose de grande intelijensya en SEFARAD ! Invento la
Inkizisyon ! Pensimos ke era un muevo jugo i ke todo se iva
kalmar... MA ! Esta vez no era komo los jugos de flamas komo
ya eramos auzados en las sivdades de Espanya.... Esto se kalmo
dospues de unos 100 anyos.. No muncho tiempo si se kompara
a muestra historya en su largor....
 
 
Kon esto, kada vez ke mos installavamos en un payiz o un otro
mos viyamos arrondjados... Empesimos de ir de aki de aya,
boltar komo zinganos ! Siempre era la mizma koza. Dospues
insistyeron para ke bivamos en los ghettos ! Akseptimos ma
los Rusos empesaron kon sus progromes... Pensimos ke es
un program ma no era... Mos ambezimos lo ke eran progromes...
Era el biervo muevo Russo para destruyirmos, matarmos....
Kuando se enfasyavan i no teniyan nada de azer, les gustava
pasar sus tiempos a attakar i ASSASINAR JUDYOS ! Un
largo tiempo fue muy moderno !
 
 
Agora TE avlaremos de lo ke, de vedra, fue lo ke no era posivle
de suportar... Grasyas a TI, por fin estavamos reushiendo i
mos topavamos en buenas situasyones en EUROPA. Estavamos
horozos en un chiko payiz de Europe ke se yama ALEMANYA.
Esta vez supito salyo un pintor de paredes ke eskrivyo un livro.
Metyo aya unas kuantas ideyas ke agradaron al puevlo. Este
hombre se izo sus leader en nada de tiempo.... Asuvyo i
asuvyo de rango ! Oh Di-o miyo ! Ke diyas dezgrasyados
empesaron por mozotros, tu Puevlo Eskojido ! Oh Di-o miyo !
Ande estavas durante los anyos 1933 - 1945 ? Ya savemos
ke kada uno i uno tiene de menester de arrepozarse de vez en
kuando ma kuando te nesesitavamos lo mas NUNKA estavas
en los entornos... Por seguro ke ya saves lo ke se paso !
Milyones de gente, i los ke no eran de TU PUEVLO ESKOJIDO
fueron assasinados kon sangre friya ! Izyeron mizmo abajures
kon muestros kueros i sabones de muestra gudrura.... Tisaron
tapetes de los kaveyos de muestras mujeres, muestras ermanas
i muestras ijas.... No es por akodrarte lo ke paso... Ma AGORA !
Otra vez muesto estado se esta agravando !
 
 
Vinimos al anyo 1948 i otra vez, milyones de muestros ermanos se
estan movyendo de un lugar a otro... Esta vez fuites kon mozotros
i izites de manera ke enfin resivyemos muestro payis atras. Estavamos
bolados de alegriya kuando no paso un diya i vimos todos los
Arabos solevantarsen kontra mozotros i deklararmos la guerra,
prometyendo ke echariyan a la mar el d'alkavo Judyo ! Oyveeeeee !
A vezes mos sorprendes kon tu sensyo de humor !
 
 
Ganimos todas las guerras grasyas a TI ma muestro estado esta
otra vez muy mal.... No kedan negriguras ke muestros vizinos no
mos azen ! Las bombas i las roketas no kedan.... Vienen, mos
topan i mos matan ! No tenemos paz ! Yo mos vino fina la nariz !
Saves ke kozas tienen fin ! ( No TU ke sos ETERNO !)
Komprendes muestro dezeo de meter fin a muestro akordo verbal
de ser TU Puevlo Eskojido. Mira... En vezes las kozas kaminan
bien i otras vezes... No kaminan ! Kedaremos AMIGOS por
unos kuantos diezmil anyos mas... I veremos dospues komo
las kozas se developan....
 
 
Entremientes, ke pensas de la ideya de azer TU PUEVLO ESKOJIDO
la desendensya de ISHMAEL por unos kuantos milenaryos ?
Te akodras por seguro ke Abraham teniya otra mujer HADAR,
i ISHMAEL es el ijo de Abraham tambien !
 

Su desendensya son los duenyos del Petrol i no moran muy leshos
de mozotros !
 
 
Kon muestro Respekto i Adorasyon sin fin
 
 
Los Judyos

- Copyright © sefarad.org - 1997 - 2017

Retour au site sefarad.org -