Accueil - sefarad.org

Almendra...parte 10

    MENU    

SEFARAD.org
ESKRITOS de savor
RESHETAS
AIDEZ-nous
Page PRECEDENTE;

Parte   10
 
 
-  Esto a tu lado mi amada !

-  Ohhhhhhhh.  Me espantates Samuel ! No te oyi venir.

-  Estavas bushkando no se kualo en el profundo de tus
penseryos... Me agraderiya saver deke estavas asombrada
kuando vine...No so auzado a ver mi prensesa ansina.

-  Es ke estava pensando...

-  Bueno, dizeme en kualo .

-  Nada !

-  Meri ! Ke tiyenes ? TE veygo trokada. Kero ver otra
vez la alegriya de mi amada kuando la tengo en mis brasos !

-  Es ke tengo espantos Samuel.

-  Ke manera de espantos puedes tener yo siendo a tu lado !
Sakrifikare sin pensar mi vida por ti.  Di me ke son estos
espantos mi reyna..

-  Oy ! Te fuites ayi no ? La vites ? Ke avlatesh ?
Tia Klara i Tia Graziella  vana azer todo para ke vos
kazesh !  Te vo perder Samuel i esto me inche de tristesa.

-  No mi palomba....Nada de lo ke dizes..

-  No ?  Avla me !...Kontame lo ke afito oy.

-  Almendra ama un otro hombre.

-  Esto lo se.  Ma...

-  Komo ma ! No mos puedemos kazar amando a otros !

-  Ke vamos azer ?

-  Vo avlar kon Mordohay.  Lo vide oy ! Ni te puede kontar
su tristesa kuando mos vido mano en la mano kon Almendra
 
-  Samuel !  Ke me dizes ! Komo puede ser !!!!

-  No mi kerida...No me deshas avlar...Era una ideya miya.
Viyendomos yelados mos embiyaron a Almendra i a mi a ver
Vento, sus mueyvo kavayos i...

-  Lo vites ?  Ke ermozura, ke dulsura de kaveyo....

-  si si...i kuando le dishe a Almendra ke mi korason no
me apartenese eya tambien me disho ke keriya irse kon otro
i kuando le demandi ken es me disho ke es Mordohay efendi,
el merkader de Konstantiniye.  Djusto a este momente vino
este senyor, entro en kaza por la puerta de delantre i
siguro ke muestras madres le disheron lo ke estavan
aparejando por las fiestas de muestro espozoryo !

-  Ohh   i....

-  Le dishe a Almendra ke se lo iva relatar todo i no
teniya ke tener kudyado ma me disho ke no konosiya sus
sentimientos dayinda por no aver nunka avlado kon el
sovre eyos mizmos !  Te das kuenta ?  Se aman ansina
i ni ke se avlaron...

-  Povretika de mi ermanika....Estara sufriyendo....

-  Eya no saviya si el pensava en eya o no i alora le
dishe ke un hombre nunka se yerra si ve la mirada de un
otro hombre ensima de la mujer a su lado. Ansina fue !
No me yerri kuando vide la flama en sus ojos, su
dezespero i su ravya...Era komo si aviya resivido
la spada a su korason.  Povre hombre ! No kijyera ke
seya asi ma no teniya otro remedyo para saver sus
penseryos immediatamente. 

-  I Almendra ?

-  La dishe ke se'ste kayada, ke no avle, ke se despide de
mi madre i ke se vayga a su kuarto.  Ansina izo.

-  I agora ?

-  Bueno...Savemos ke no es kazado i ke ama Almendra i ke
eya lo ama tambien.  Savemos ke mozotros nunka mos vamos
a espartir !  SAvemos ke todos somos djudiyos de terra
de Sefarad, de buenas famiyas i atados a la Ley de muestros
padres, todos, Baruh ha Shem, puedemos fondar famiyas
kon fuertes raisez i tenemos bastante pueder para esto.
Ke mos kedo ? Konvenser Tiya Klara, tiya Julia i mi senyora
madre.  Eyas ke mos aman sovre todo, ke son intelijentes,
ke keren muestro bueno i azen todo kon buendad i meoyo.
No. me kerida, no tenemos de espantarmos de nada, Kreyeme.
Todo va salir bien. Kale ke tengamos el koraje de avlar
una vezes por todas i aklarar lo ke la verdad es.
Kayandomos no vamos a pueder reglar las kozas.

-  Ken va empesar ?
 
*
 
Kuando Mordo yego al lugar de Nisim Bohor efendi
vido ke el hombre estava avlando de si para si.
Estava asentado en el tabure enfrente de ande
s'asenteva siempre i estava dando a entender
unas kozas a un otra persona ke en realitad no
egzistiya porke la siya estava vaziya !
Su propria siya.  Esto kijiya dizir ke el
(un a otra persona  en su miente) estava avlando
kon Bohor efendi !  No oyo entrar a Mordo i
mas i mas eksitado estava tratando de konvenser
la siya vaziya !

-  No me avla ! Me toma por un azno ! Lo kulpas
tu.  Le dates todas las kuedras en la mano i agora
mira ande esto !  Pransos se estan aparejando
detras de mi espalda i yo no se ken va vinir
a esta meza ! Por mi vida ke la esta dando a
alguno !  Me esta rovando mi ija .... Lo se !
Ma eya no avla...piedra...pishkado, se kaya !
Ya te dishe....Demandale ! Kero saver a ken la
esta dando ! Ke azes nada ! Ni meneyas tu dedo !
Nisim no sos ni marido ni padre ! Ke lo sepas !
Te djugan komo keren i tu va aparejando komanda
de sapatos para Mordo efendi ! La hanum kere
azer bodas !  Kere ver a su ija de novya !
I tu kualo ?  Va lavora kom'un azno sin saver
nada de lo ke se esta pasando ! Lo mereses !

Atyooooooooo Senyor Mordohay !

- Pasa por favor asentate Mordo, no saviya ke
ivas a venir !

- Estava pasando por aki. Me dishe ke va ser
bueno de tornar kon vozotros a kaza.

- Ke bueno ke izites... Mos kedo muy poko
lavora kreyo ke fina unos kuantos diyas vamos
a eskapar kon lo todo. 

- Grasyas Bohor efendi ya lo se ke keresh eskapar
de pronto kon mi komenda i ke estash lavorando
muncho para ke seya lo mas antes posivle !

- Ke izites kon el venisyano MOrdo ? Kere vender
el nave o no ?

- Kere ma dayinda no me abasha del presyo i
penso ke no vale la pena de pagarle tanto porke
kon esto puedo merkar un nave enteramente muevo.
Es verda ke este tiyene el ekipaje, las velas
i todo lo ke kale i en muy bien estado. Vamos
a ver...Asperare unos kuantos dias otros.  Esto
aki de toda manera i el no se esta indo dayinda.

Bohor efendi estava pensando entresi ke a este
chiko lo keriya muncho bien i si el iva ser su
yerno, kon la dota ke aviya aparejado por su ija,
lo iva lograr el nave i le iva der el nombre de
ALMENDRA  tambien ke un regalo de kazamiyiento !
Ma Klara estava kayada kom'una piedra, kom'un
pishkado !  Ken es ke teniya en su tino KEN ???


- Ke edad tiyenes Mordiko  ?

- 26  senyor.

- Estos i munchos kerido ! Sos komo mi ijo
i el D-o lo save, te kiero muncho bien !
Sos buen mansevo... K' el mazal te valga !

- Grasyas Bohor efendi !  I yo vos kere muncho
bien komo un padre i vos sero siempre rekonosido
por avrir me vuestras puertas i konsiderarme
kom'un ijo !  Estarash en mis orasyones....
K'el Todo Puederozo vos bendiga, vos de salud i
vidas largas.

- Dayinda sos soltero ?

- Si senyor, dayinda no me kazi.

- A tu edad teniya 3 kreaturas ! Ke asperas ?

- ......

- Tiyenes tu konak en Konstantiniye i bastante de
bivir mizmo si no lavoras mas en tu vida !
Kreturas son braha de los Syelos..Porke ke no
tengas una mujerika buena de las muestras, ke te
de munchos ijos, ke te alegre tus diyas i seya
la reyna de tu kaza i de tu korason ?

- La razon avla kon vuestros biervos Nisim efendi !
I esto es mi dezeyo tambien...Lavori i viaji siempre !
No tuve tyempo de pensar en estas kozas...Ademas
penso ke lo mas kije namorarme de mi mujer i no
kazarme por kazar !

- Hahhhahhahahah  amores ! Veygo veygo.....
Esto viyene kon el kazamiyento i nunka antes !

- !!!!

- No ay amor sin razon ! La razon es el kazamiyento
i la braha ke resives en la Hupa ! Tus ijos son
la fruta de tu amor i el respekto entre marido i
mujer, las komidas ke te eskudya tu mujer, la
limpyeza de tu kaza i tu orgulyo kuando aresives
tu famiya, tus amigos i la djente son las yaves
ke avren las puertas del amor. El resto lo topas
en las kayes kon las ijas i las mujeres de goyim !

- Ke hohma Bohor efendi ! Me ambezo muncho de
vozotros...

- Le dizeremos a Klara !  Ke te tope una buena
ijika manseva... 16 ? O la keres mas grandizika ?
Ke tenga palavras dulses en su boka i manos de oro !
Una manseva komo mi Almendra ma komo eya no ay !
Me parese ke Klara me la esta dando !  Ahhhhhh
es ke esto muy angustyado !

- La espozatesh a la senyorita Almendra ?

- Yo no !  Eya me parese ke si !  Sino ke es
esto de su boka boda boda novya novya i todo
esto ! No me dize nada ! Es ke esto angustyado
Mordo !  Me la va dar.... Me la esta dando i
yo no se nada....Ahhhhhh ke esta komo piedra,
komo pishkado.....Se kaya !

Mordo se estava riyendo dentro sus dyentes i
estava entyendo deke lo oyo peleyandose kon las
siyas i gritando su angustya a las paredes !

- Kalmese Bohor efendi ! No la puede dar sin
vuestro konsentimiyento i....

- Eya ?  Klara ?  No la konoses ! Me puede dar
i a mi !

Esta vez Mordo no puido kontenirse i empeso a
riir frankamente..

- Te estas riyendo ? Asi es burlate ! Mizmo los
aznos se vana burlar de mi ke yo so el padre,
el marido de esta mujer i va ser el dalkavo a
saver ke se pasa debasho de mi techo ! I saves
kualo vo azer ?  La vo dar a alguno antes de
eya ! No pasa diya ke no me la demandan i
m'embiyan personas de altas palavras para kererla !
Esto es ! La vo dar antes de eya ! Ahhhhh Klaraaaaa !

A Mordo le iva kedar el korason....Trompetas le
estavan sonando a los oyidos i el suelo (floor)
se le estava fuyendo debasho de sus piezes !

- Kalmese Bohor efendi ! Su senyora madre nunka
va azer una koza malo por su kerida senyorita
Almendra...

- La esta dando !

- Vos kaye a vozotros de darla...Nada es syerto !

- La esta dando ! I yo la vo dar antes de eya!
Yo la vo dar a el ke kero !

- Si, si por siguro, es vuestra ija ma vash a avlar
esta noche kon eya en primero...Kale saver si....

- No ! La vo dar !

*

Meri i Samuel estavan abrasados i komo siempre
odyavan espartirsen malgrado ke otr'un poko iva
amaneser i deviyan ser en sus kamas ! Sus
paryentes se alevantavan presto en estos diyas
muy kayentes de enverano...

- Kuando te vo ver mi reyna ?

- Alhad ?

- No amanyana la noche !

- No durmimos oy. Komo vamos a pueder otra ves
kedarmos tan tadre ?

- Te durmere en mis brasos aki. No kero asperar
fina Alhad.

- Bueno ma prometeme ke no vamos a kedar muncho.

- Todo lo ke keres mi dulse ! Solo deshame ser
kon ti. No puedo estar un diya sin verte !
Ma ya va eskapar todo kon bueno. Ya vino el tyempo.
Seras miya i te vo amar fina la fin de mis diyas.

- Mi amigo kerido !

- Te desho mi reyna...Durmete agora i aspera me aki
amanyana la noche..

- Estare aki...Vate agora !

- Dame otr'un bezo....

- No ! Korro a kaza.....Hasta amanyana !

- Negra ! Hasta amanyana mi amor !

*

- Ke tiyenes tu no se ! Las lesiyones de tu gato
no te estan valyendo senyorita ! Oy me sinti muy
averguensada kon mis envitados. No supe ke dizir !

- .....

- Almendra ! Te esto avlando !

- Si madre

- Va ser mijor si enderechas esta kara tuya antes
ke tu senyor padre venga kon tus ermanos ! Me vaza
dizir una vez por todas ke te esta preokupando ?

- ....

- Ke te manka ija mia ? Ke kijites ke no lo
logrimos ? Kale ke estes la mas horoza del mundo
i me se parte la alma vyendote triste i kayada.
Ande esta mi Almendra komo una roza la demanyana ?

- No tengo nada senyora madre.

- Avlaremos dospues....Ya vinyeron. Esta todo
pronto ?

- Si.

*

- Klara ? Estas vinyendo a echarte ?

- Si si.. Ya vengo !

- Bueno, te esto asperando, ya se izo tadre.

- Durmete...Estas kansado !

- Ke no ! No me vo durmir !

- !!!!!!

- Ven ke te kero avlar !

- Agora ? De noche ? Avlaremos manyana demanyana!

- No ! Dishe ke kero avlar i avlare !

- Avla alora ... Deke estas inyervozo ?

- No esto inyervozo ! No me inyerves ! Ken es ?

- Komo ken es ? De ken avlas ?

- Klara kero saver de una ves a ken la estas
dando a mi ija ! Esto es...Avla agora !

- Ah ! Es esto... bueno ! Te iva avlar kuando
la ora iva vinir. Estamos tratando de aranjar
las kozas dayinda. No esto pronta para avlarte.

- Ma yo kero saver ! No me la puedes dar sin
ke yo sepa ! Ken es ? Yo no tengo ija de dar !
Esto es ! La vo dar yo a ken kero ! Es mi ija !

- Nisim efendi......

- Ni Nisim efendi ni Bohor efendi....Me oyites !
I agora ven a echarte.

- No me vo echar no tengo esuenyo !

- Klara ven. Vo amater la kandela !

- Dame la kandela...Durmete tu ! Yo vo salir a
la guerta un poko. Kero tomar aver. Esta muy
kayinte aki.

- Piedra....Pishkado seko i kayado !
 
- Ke dizes ?

- Avlo entre mi !

- Bueno .. Yo salgo..Ke deskanses, nochada buena!

- gmblb bglglmb !

- Ke mande ?

- Nada ! Nochada buena i a ti !

i kuando sale afuera Klara, Bohor efendi empesa
a echar los kavesales ande le viyene :

- De mi al Dio la va aogar a esta mujer miya !
akhshanit (stubborn/inatciya ) komo la kavretta !

I....Se mete en piyes, alevanta los kavesales
d'embasho, los mete a su lugar i s'echa a
durmir.


Klara salyo por la puerta de la guerta afuera.
El tiempo estava dayinda kayinte solo envezes
un airiziko plazyente estava asoplando komo una
karesa freska ensima de la kara.  El lunar i
las estreyas en el sielo astavan aklarando esta
noche yenna de golores de flores i de frutas
i de la yerva freska ke el jardinyero aviya
kortada unas kuantas horas antes ! No aviya
dingun bruido Mizmo los pasharikos estavan
durmyendo....Klara les metiya agua i kozas de
komer en la chikitika kaza de pasharos ke aviya
demandado ke le agan ensima del grande arvole
en la parte derecha de la guerta.  Este kanton
en su ermoza guerta le plaziya mas de todos los
lugares.  Teniya una solombra freska mizmo en
los diyas los mas kayintes. ES aya ke aviya
engrandesido sus ijos i su chikitika ALmendra
dandoles a komer aya en kontandoles kuentos
i kantandoles romansas de la dulse Sefarad...
Es en los brasos forsudos de este arvole ke
aviya echo kunas para kunar sus kreaturas
i durmirlos en un lugar mas averoza de la
kaza en enverano. 

Se estava riyendo de si para si !  Saviya ke 
Bohor efendi asperava de eya aklarasyones por
lo ke estava aparejando sovre su ija.  Una koza
ke ni eya mizmo saviya la reteniya portanto ! 
No saviya si era la ideya de espartirse de
Almendra  o el espanto de kavzar ke su ija no
seya felis !  Nunka aviya visto a Almendra tan
angustyada." No lo kero ni ver" le aviya gitado
su ija !... ESto era muy fuerte !  Puedeser ke
kaliya pensar dos vezes antes de ensistir i
kavzar una situasyon muy  delikada, imposivle
de enderechar i echar paso atras... 
Ma...Aviyan entrado en la kamareta mano en la mano ! 
Es vedra ke no estavan soriyendo i no se veiya
dinguna felisitad en sus karas i ademas, Almendra
se aviya fuyido de sus lados immediatamente dospues !
Klara no entendiya nada !  No saviya komo kaliya ke
se tome kon esta kestyon tan delikada... Penso a
su marido i le dyo razon.  Komo iva sentirse eya,
si saviya ke el marido se estava preparando a dar
su ija a alguno sin ke eya sepa a ken !  Ma estava
riyendo a sus palavras i a sus ekpresyones de
kara !  Lo amava de todo su korason i siempre le
aviya mostrado kavod  (respekto)  sin nunka azer
un echo detras de su espalda.

Klara siyempre aviya mantenido relasyones impekavles
kon su marido.  Marido i mujer se metiyan de akuerdo
antes de azer kualo ke seya i nunka se oyiya avlar
a boz alta o kon ravya aryento de kaza. 


Entremientes ke Klara estava asentada en
su kanton preferido en la guerta i se estava
sintyendo muncho mijor ke en su kamareta, su
ija i MOrdo efendi no estavan puediyendo
durmir tambien...

Almendra estava sudando i estava difisil de
pueder respirar. Se alevanto avriyo las
puertas del balkon...Ke lunar ermozo i
inkontavles estreyas sentiyando en el sielo..
Dospues de diyas una soriza le aklaro la kara.
El Dio aviya echo un mundo perfekto i de una
ermozura a nada komparavle !  Avriyo los brasos
komo para abrasar todo el universo i kijo
sentir de serka este kontakto kon las yervas,
los arvoles, su arvole de almendras ke se
aviya plantada el diya de su nasimyento.
Teniya un sentimyento de pas i yenno de amor
kuando abrasava su arvole.  Kon su kamizika
muy fina  i a la punta de sus piezes salyo de
su kamareta para ir abasho.

Bohor efendi se estuvo aboltando en su kama
para aferrar el esuenyo ! No estava puediyendo
durmir...Le mankava Klara i su golor de yasmin !
No era auzado a durmir sin sintirla a su lado..
Piedra kayada...Pishkado ! Ke aviya de salir de
noche a la guerta ! Penso ir i el ayi i tornar
kon eya a la kamareta i en esto Se alevanto.
Salyo por la puerta de la kamareta de asentar,
abasho de los unos kuantos eskalones i la vido
a su Klara kon su ermozura kaji irreal en el
lunar. Estava dando la impresion ke su profil
perfekto estava desinado ensima de la luz de
la luna. 

- Estas aki mi alma ! No puide durmir i vine
a asentarme  konti.  Tornaremos endjuntos
kuando mos va vinir esunyo. Me seli de la luna !
I....A kualo estavas pensando ?

- A mi ija...

- Ahhhhhh Todo esta bien ? Komo la tengo
a mi presyada ?

- Todo no esta bien Bohor efendi, Nisim efendi,
senyor mi marido ! No esta bien !

- Padre Bendicho Todo Poderoso en los Syelos !
Ke es Klara ? Kualo tiyene Almendra ?

- Es la kulpa de Karamela !  Se esta
ambezando de eya ! Supito se alevanta i se va !

- Ke dizes Klara? lo bolates ? Klara....

- se le esta arodeyando entre las pachas
i estan avlando endjuntas !

- Ke dizes mi alma !!!!

- I Graziella nunka va akseptar esto gato
engrinyado ! Karamela de su nombre !

- No se la damos mi kerida ! Es el gato
de muestra ija.... No te ansyeas por esto.
A mi no me viyene demazyado el gatiko de
Almendra.  Ke vaya ke tenga 3 si kere !

- No es esto ! Almendra no va deshar a su gato !

- Bueno Graziella va topar otro gato para eya
ke este es de Almendra i no tenemos de darselo !

- Nisim efendi ! No me estas entenyendo !

- Elohim she ba Shamayim !
Esta muncha kalor..Te trayere una kupa de
agua i te vas a sintir mijor... Aspera...


(a kontinuar kon Sharope)


- Copyright © sefarad.org - 1997 - 2017

Retour au site sefarad.org -