Accueil - sefarad.org

Almendra...parte 13

    MENU    

SEFARAD.org
ESKRITOS de savor
RESHETAS
AIDEZ-nous
Page PRECEDENTE;

Parte   13


Abasho allado de su madre, triste de no aver enkontrado
a Karamela en dingun lugar, ni en kaza, ni afuera serka..

Klara estava en el salon tomando su kafe, asentada
allado de la ventana. Le plaziya este lugar de su kaza
porke puediya mirar leshos sin pensar a nada, por
arepozar sus ojos solamente !

-  Madre, no topi Karamela en dingun lugar ! No esta!
Nunka se peryo mi gato i no se alesha de allado de mi.
Esto en kudyada !

-  Almendra no seyas kreatura !  Salyo i puedeser ke
alguno lo tomo a su kaza para karesarlo i darle a komer.
No savemos.  Es un muy ermozo gato.  No lo tomes tanto
al korason.  Tiene de menester de libertad tambien.  Va
vistete i saliremos unpoko.  Kero irme ande tu tiya.
Te plaze avlar kon Merika.. Aydeeeeee mi ijika !

-  Si mi madre...

*
 
Mordo de Toledo kaji no durmyo i se aparejo para salir
kon Bohor Efendi i sus ijos enjuntos.  No, no estava kansado
i una muy grande felisitad lo estava inchendo de alegriya
i d'un eksitamyento deskonosido fin'agora.  Era komo si su
korason se puediya ver de leshos batyendo a un ritmo loko.
La kalor de un diya antes no aviya abashado.  Smyrna estava
komo arriento de una braza i estava difisil de respirar !¬

Se arapo, se vistyo i topo Bohor Efendi dezayunando kon
sus ijos.

-  Shalom i buenos dias !

-  Shalom MOrdo, asentate kon mozotros i ke te traygan
leche kaynte i pekmez de moras.  (el sirop muy konsentrado)
Vienes kon mi, mi ijo, i te entrego todo tu ropa oy mizmo !
Todo salyo egzaktamente komo lo kijites i no ay safek ke
tus klientes vana kedar muy kontentes !  Son los mijores
sapatos ke egzisten en el mundo.  Uzimos los mas finos
kueros de kodreros manko de un anyo i no por esto no son
de dura !  Kada par un echo d'arte i de alta valor !

-  Munchas grasyas Bohor Efendi.  Ya se ke no egziste mijor
artizano ke tu por los sapatos ni en Sefarad, ni en Italya
i ni en el Oryente este.  Eran de Kalatayud ke saliyan los
sapatos echos por tu nono  por ser vendidos en los
palasyos genovezes i venisyanos.  Erash nombrados en
Sefarad por la kualitad i la finesa de vuestros sapatos.

-  Ke keres dizir ke mi nono era mijor de mi ? Guay !
Yo so mijor !  Inventi, yo Bohor Benezra Efendi, el sapato
atado del lado ke desha la parte delantre entera, lisa i
sin kustura, elegante komo no uvo fina estos tiempos !
Vas a ver lo ke la jente te vana dizir !!!!

Mordo estava soriyendo....Ya saviya ke kuando Nisim Bohor
Efendi empesava a avlar de sus sapatos puediyan topar
la noche detras de la puerta !  Sus ijos ya estavan auzados
a oyir siempre las mizmas kozas i, aparamento, eyos tambien
ivan a ser komo sus padres kuando el tiempo iva vinir !

Kuando el dezayuno termino i bevieron sus kafes se metyeron
en kamino kada uno kon su kavayo.  Mordo se fue en primero
al puerto de Smyrna para arekojer sus hombres i kargar sus
ropas antes de meterse en kamino para Konstantiniye.

En kamino la sola koza ke estava pensando es komo la iva
demandar a Almendra de su padre...Komo se iva enderechar
los echos kon la Senyora Klara ke dayinda pensava ke su
ija iva kazarse kon Samuel Efendi...Se le estava partyendo
la kavesa !  I si Nisim Efendi refuzava la mano de su
ija por no darla tan leshos... Konstantiniye era por el
al otro lado del mundo ! Komo ivan a kedar leshos de sus
ijika regalada, tan presyoza komo era Almendra !
La kalor de una vanda, el viaje yenno de aventuras ke iva
empesar en serka de otra vanda, lo ke teniya de diskutir
kon los paryentes de su amada i lo mas negro, este tiempo ke
iva kedar leshos de su prinsessa estavan pezgando a sus ombros !
La noche sin durmir ke aviya pasado no le estava ayudando
en nada ! Teniya mareyos i supito se sintyo muy kansado !

 

Kuando yego al puerto Mordo entro en un han
para ke le servieran un sherbet fresko de agranada
kon la agua arefreskada aryento del pozo en
bokales atados de arriva kon kuedras ke yegavan
fin al fondo. Si le demandavan, dizeriya ke lo
aten a el mizmo kon estas kuedras i ke lo abashen
al pozo al lugar de los bokales !

La sala del han estava abrigada del sol kemando
de las kayes kon paredes de piedras anchas. Ivan
okuparse de su kavayo kerido tambien. Lo ivan
a arefreskar kon aguas i darle a arrepozar en una
solombra. El lugar estava poko aklarado i sus
ojos tuvyeron difikultad a auzarsen a esta medya
oskuritad dospues del sol briyando afuera.
Se asento a un banko delantre de una meza larga.
Immediatamente le trusheron una karafa de kovre
finamente lavorada yenna de un sherbet de uvas.
No saviya deke aviya pensado al sherbet de agranadas
ma esto tambien lo iva arefreskar ! Estava
ekselente de savor. Una mujer grega bastante
deskuvyerta le vino a demandar se keriya komer
alguna koza. La miro kon ojos vaziyos i le
disho ke ya aviya komido. Miro ken ay i no ay
para pueder topar mansevos ke le ivan ayudar
kon sus ropas i en el kamino por Konstantiniye.
El puerto estava yenno de estos mansevos ke
s'embarkavan a los leshos en naves de komersyo
i mismo naves piratas, siertas konosidas i
siertas no ! Estava bushkando kon sus miradas
si aviya alguno konosido kuando sintyo una mano
en su ombro. Se abolto pishin i vido un viejo
muy feyo de kara kon una grande sikatrisa en
su frente ke abashava fina la mitad de su nariz.
Sus ojos klaros kaji sin vida lo estavan mirando
komo si le estavan demandando una koza. Sus
vestidos eran suzyos i viejos. No yevava una
espada i no se estava viendo si teniya guadrada
un punyal/dagger/poignard/kama en su ancha sentura
de ropa ke asemejava mas a un handrajo para
esponjar el ponte de los naves ! Su chapeyo sin
kolor le estava guadrando mas de la mitad de la
kavesa. Le avlo en espanyol !

- Senyor lo se ke sos judio i un merkader.
Te keriya avlar por...

- Asentate por favor a mi meza. Ke te traygan a
bever.

- Grasyas.

- Ke me keriyas dizir ?

- So Eliezer de Galata. Una larga istorya. Te la
vo kontar si.. Yo se ke vas a tornar a KOnstantiniye.
Yevame kon ti. No te puedo pagar aki ma en mi kaza
en Galata si. Aki peryi todo. Esto desnudo. No
tengo ni para komer. So viejo i no me dan lavoro ma
tengo fuersas. Te puedo ayudar.

- Puedes toparme hombres, kavayos, todo lo ke kale
para metermos en kamino en kurto tiempo ? Meteremos
aryento de tres kuatro diyas ?

El viejo soriyo meneyando su kavesa...Se arasko la
kavesa de debasho su chapeyo kito un handrajo de
su sintura alimpyo la sudor de su kara...Bevyo el
sherbet de uva ke le aviyan trayido tambien...

- Komo te yamas ?

- So Mordo de Toledo. Tengo de yevar mi ropa a
Konstantiniye. Los kaminos no son siguros. Estaremos
muy kargados i tengo de ser seguro ke mi karavana
va yegar a la sivdad kon todo lo ke esto yevandome
de aki !

- Si si entyendo. Por ken lavoras ?

- Por mi mizmo !

- Sos mansevo i sin eksperyensya ! Tienes tantas
Liras de Oro para todo esto o devo topar el ke va
pagar tambien ? !!!!!

Mordo se metyo a riyir mas i mas i mas. Le estava
plazyendo el viejo tan feyo !

- Eliezer Efendi ! No te merikiyes por la plata.
No es lo ke mos manka. No es la eksperyensya ke me
manka tambien. Ya lo ize muy munchas vezes !
I esta vez no puide lograr un nave ma a mi otra
vinida lo vo merkar ! Konosko los kaminos. Kon el
ayudo del Di-o estaremos en Konstantiniye a la
otra luna. No me dishites tu repuesta. Al lugar
ke yo te demande kozas es tu ke me estas kestyonando
kon duda ...

- Ijo, te puedo ayudar !

Mordo empeso a riyir otra vez de todo su korason !

- Tengo mazal oy ! Dos hombres me disheron "ijo" !

- No es a mi edad ke te vo yamar Mordo Efendi,
olvidatelo ! Te vo pagar a muestra vinida ...
No vas a ser mi patron ma te puedo ayudar komo a
un ijo ! Esto si.

- Bueno ! I yo komo te vo yamar ? Papa ?

Fue el torno de Eliezer de riir mas i mas !

- Komo keras ijo ma no te olvides... Me deves
respekto ! I me vas a oyir kuando te vo dizir
siertas kozas. Vas a ver ke tengo razon kon
tiempo.

- De ande supites ke so judyo ?

- El hombre a ken dates tu kavayo te oyo avlar
al kavayo en espanyol. Es el ke me disho ...
Me dyo a komer del han unos kuantos diyas...
Teniya ambre ! Dospues mis ojos no me yerran.
Es porke sos judyo ke me aserki de ti. No komo
taref .

Rieron mas i mas...

- Alora ? Te okupas de todo i me deshas ir ?

- Si vate a la buena hora ! Deshame toparlos.
50 si ?

- Si. Hombre kavayos, komanya, agua. Toma
esto ! Vate al hamam i desha todo lo suzyo aya.
Merka vistidos buenos i muevos. Los hombres ke
tengan espadas i ke sepan uzarlos komo se deve !
Todos altos i ermozos, no flakos i dezmizeryados !
Vistelos tambien. Dales a komer i ke seyan limpyos.
Eskojelos kon mis ijos ! De la mizma manera por
los kavayos i los gameyos. Pensa bueno a todo lo
ke kale ! Ke no tengamos de menester de una koza
en kamino ke mos venga a mankar ! Vo tornar aki
en unas kuantas horas i vamos a diskutir en ke
estado estamos !

- Mordo de Toledo, puedo merkar Smyrna entera
kon todo este oro !

- Merkala alora ma deshame ir ke tengo de azer
la koza la mas importante de mi vida !

- Vate ijo ma no me digas ke tienes i mujer de
yevar kon mozotros !

Mordo empeso otra vez a riir, riir riir ....

- Es el Di-o ke te mando padre Eliezer ! Kedate
sano i rezyo i kudyate....Te vo ver mas tadre !

- Al vermos ijo ! No te kedes pensando.
Todo va salir bien primero el Di-o !

Mordo salyo koryendo sin mismo pagar deshando
Eliezer riendo riendo en la meza...

Blanka de Nieves su kerida yegua/mare/jument/kisrak
ermoza de las mas ermozas lo estava asperando
niervozamente meneyando su kola maraviyoza i
chaftando sus dos patas de delantre al suelo !
Blanka de Nieves era muy attada a Mordo, lo sentiya
i aziya absolutamente todo lo ke le diziya.
Nunka Mordo tuvo de kastigarla o maltratarla para
ambezarle lo ke keriya de eya.


Mordo se aserko de su kaveyo i le kareso la kara
en dizyendole  "Blanka, iremos ande Nisim Efendi
a demandarle la mano de su ija".   No aviya dingunos
al doredor a parte de mas kavayos komyendo trankilamente
en las solombras de la guerta del Han.  Mordo la libero
a Blanka i d'un salto admiravle se asuvyo a su kavayo.
Estava justo salyendo de la guerta  ke vido el
moso ke se okupava de los kavayos vinyendo para ande el.
Le disho ke Eliezer Efendi le iva pagar por lo ke se
aviya okupado de su kavayo i sin mizmo asperar su
repuesta kon una dada a penas le komendyo a Blanka
de korrer kon su mas alta rapidita !

*


Eliyezer Efendi no se estava puedendo kreyer ke
teniya en su sentura una tala fortuna.  Eran todos
dukatos Venisyanos, zecchinos, piesas de oro de
la mas alta valor del mundo !  Se estava sintyendo
el rey del mundo i la primero koza ke iva azer
era de tomarse un moso i una kamareta en este han.
Penso al moso de los kavayos del han ke era un
bulgaro de madre judiya i avlava perfektamente el
espanyol.  Lo aviya kudyado muncho en estos diyas
ke no le aviya mas kedado nada i estava muerto
por komer.  Se aviya echado en la chosa ande
durmiya el.  Le aviya dicho ke su madre vino
de Espanya, de Aragon, manseva, kon su madre, ma
su madre se aviya murido en la nave de hazinura
i la madre de Gabriel el moso, aviya engrandesido
en una famiya bulgara ke le aviya ambezado todo i
la aviyan kazado kon el ijo de uno ke aziya
nalchas de fierro para los kavayos. Eya aviya
guadrado su fe en respektando su marido kristyano
ma ambezando el judaismo kon lo ke saviya a su
ijo Gabriel.  Por lo ke lo aviya estudyado a
Gabriel paresiya un mansevo bueno de korason,
bastante kapache i no haragano del todo. Le
plaziya azer su echo sin avlar muncho i de
la mijor manera.  Saviya kayarse i respektar
los otros.  Teniya muncha fuerza tambien.
Salyo afuera dospuer de pagar los sherbetes a
la muchacha grega del Han i fue a topar Gabriel.
Lo vido travando los sakos de los klientes al
kanton i metyendolos en rango para ke se topen
fasilamente.  Se fue allado de el i le konto
un poko de kualo se tratava sin entrar en los
detalyos.  Le demando si estava dispuesto de
lavorar por el de agora en delantre.  Gabriel
kedo kon la boka avyerta no savyendo ke dizir.
Saviya ke Eliyezer Efendi no le estava mintyendo
i puediya azerle konfiensya.  Penso  " Ke me puede
afitar ?  Dingunos no me dan mi pan sin lavorar!
Aki, aya, mas aya, todo es lo mizmo i mas vale la
pena de lavorar por un judyo ke en este Han ande
lavoro por un bokado de pan solo i la chosa ande
me echo !"  Gabriel no penso dos vezes i kon
la temeritad de sus vente anyos respondyo pishin
ke estava dispuesto a ser su moso i hombre de
konfiensya.  Salyeron los dos.  Gabriel se fue
ande el patron del Han para darle su prostela
i tomar su espada ke le aviyan konfiskado  kuando
aviya entrado  al echo unos kuantos mezes antes.
Alkilaron una kamareta aya i Gabriel se vido el
kliente mizmo del Han ande estava lavarondo
unos minutos antes !

Salyeron para topar un hamam ande se ivan a lavar
komo kale ma antes entraron en una botika para
merkarsen vestidos, chapeyos, guantes, espadrilas,
kamiza de seda i kamizas de kada diya.
Dospues ke se lavaron i se vistyeron i yevaron
sus kozas al Han para ke Gabriel aga lo nesesaryo
salyeron de muevo afuera para el puerto i empesar
a lavorar para topar los hombres en primero.


*

Mordo estava pushando su kavayo a korrer mas i mas
rapido por kedar lo manko posivle debasho del sol
kemando.  No era leshos ma kaliya yegar !  Ni ke
penso ke Eliyezer se puediya rovar el oro i
dezapareser.  No.  No saviya deke, le aviya echo
konfiensya, ken save puedeser porke lo aviya yamado
"ijo" i  aviya refuzado de verlo komo el patron ! 
Puedeser ke estava en su buen diya i keriya tener
konfiensya en el futuro o porke Eliyezar era judyo
i el  destino, komo por mirakolo, le aviya embiyado
un mallah para ke le ayude i lo kudye...

Ato Blanka allado de Vento i de los otros kavayos
ke asperavan en la entrada bien kuvijada, debasho de
los altos arvoles del lugar de lavoro de Nisim Efendi.
Se lavo la kara en el chiko rio ke korriya muy serka
de ande los kavayos eran atados. Los kavayos puediyan
bever tambien de esta agua freska ke yegava de los
montes no muy leshos del lugar.  Smyrna era nombrada
por sus rios en todos sus sityos i lo abundante ke
era la yerva, la frutas i las vedruras aya !
Pensa a Bursa, la sivdad ande moravan sus padres.
Kuando su nono i nonika aviyan yegado kon sus tres
ijos i dos ijas al Imperyo ottomano se aviyan fuido
detras de un grupo ke konosiya esta sivdad un poko
leshos de Konstantiniye ma muy asemejado de los
lugares ke aviyan deshado detras, en Sefarad.
Sefarad por lakuala  su nonika nunka aviya kedado
de yorar i kantar romansas tristes.

A kontinuar kon Sharope


 

- Copyright © sefarad.org - 1997 - 2017

Retour au site sefarad.org -