Accueil - sefarad.org

Almendra...parte 14

    MENU    

SEFARAD.org
ESKRITOS de savor
RESHETAS
AIDEZ-nous
Page PRECEDENTE;

Parte   14
 

Kuando Mordo entro en las salas mal aklaradas de los
atelyes ande Nisim Efendi lavorava el kuero kon sus
ijos para formar los sapatos alavados, una fuerte
golor del pegon del kuero le asuvyo a la naris.
Sarnudo kon fuerza.  Un lavorante vino a su lado i
le disho ke su karga estava pronta i ke Nesim Efendi
lo estava asperando en su kuarto.  Mordo lo saludo i
entro.  Nisim Bohor Efendi estava okupado a desinar
diferentes modelos de sapatos.  Lo aresivyo
kalorozamente i le disho de asentarse.

-  Bohor Efendi, vine para avlarte.....

-  I para pagarme ijiko !  Me deves muncho !
Ya eskapimos tu komanda para Konstantiniye. Kuendo
pensas pagar i kargar tu ropa ?

-  Penso ke vamos a pueder  salir dentro 3 o 4 diyas
al kamino.  Mis hombres se estan arekojyendo i
aparejando las ropas un poko en todo los lugares, los
kavayos i los gameyos.  Te trushe lo ke te revyene.
Komo keres la moneda  en dukatos venisyanos o liras
de oro otomana ?

-  No me importa... Lo ke tienes.

Mordo kito de su sintura la bolsa ke aviya aparejado
por Nisim Efendi i la metyo ensima de la meza pezgada,
enteramente kuvijada de todo modo de kuchiyikos, ilos,
enstrumentos i martiyos a parte de los kueros i los
parshomenes tan karos i de los kualos Nisim efendi no
puediya pasarse !  Desinava, eskriviya, aziya kuentos
i notava kozas ensima de estos.  Sus amigos se burlavan
i lo yamavan  "savyo sapatero a la roves entero !"  No
porke no lo keriyan bien ma lo mas por inyervarlo i
porke de vedra ke no entendiyan para kualo se teniya de
menester de eskrivir kozas para azer sapatos !  Meldar
i eskrivir era para los hahamim i estos ke kuravan las
personas ! Un buen judyo no teniya de menester de esto
basta ke sepa las orasyones i la Tora !  A parte, los
parshomenes eran koza difisil de lograr i ke bushkavan
en estas salas golyendo kueros i pegos !

Le briyo los ojos de Bohor Efendi kuando konto las
piesas de oro ke Mordo le aviya dado kon su demaziya. 
Se le riyo la kara i le disho 

-  Sos mi ijo Mordo ! Ke el Kadosh baruh Hu te bendiga
i te de todo lo ke tu alma dezeya ke lo mereses mas de
todos !  Dime si te puedo ayudar en kualker koza. 
Puedes kontar sovre mi.  No somos ajenos i ya saves
komo te kero bien !

-  El Di-o ke te de vidas sanas i largas.... Rogo para
ke tengas echos buenos i bendisyones Nesim Efendi. 
Es vedra ke te kero avlar sovre una koza muy pezgada
a mi korason i tienes mi vida entre tus manos !

-  Avla mi ijo !  Ke es lo ke dezeyas tan fuerte...

-  No se komo dizirtelo.  Es la primera vez ke me
afita koza asemejante en mi vida !  Yo ke no m'espanto
de nada, en primero el Di-o, me veygo komo una oja
tremblando delantre de ti, mas poderozo  d'un rey !

-  Mordo me sorprendes ! Kualo sera ke te aze sal i
siniza delantre de un prove sapatero arronjado de su
grasyoza sivdad, Calatayud de las romansas...
Sefarad...Mi dulse payis !


-  Esto dezesperamente namorado de tu ijia, la bella
de las bellas :  Almendra mi korason, mi enspirasyon !
No valo nada sin eya...  Me muero del sar ke no me la
vas a dar porke tengo de yevarmela leshos a
KOnstantiniye para ke seya mi reyna i la reyna de mi
morada.  La madre de mis ijos i la grasya de mis
paryentes.  Kero avlar en kamino para Konstantiniye
kon mi Sinyor padre en Bursa para ke venga aki a
Smyrna i ke demande la mano de tu ija de ti i de tu
estimada espoza la sinyora Klara.  Puedere azer la boda
aki en Smyrna si lo dezeyash ansina.  Aspero tu desizyon
Nisim Efendi.

Nisim Efendi se metyo a riir kon todo su korason !
Su tripa redonda estava saltando de arriva abasho !!
Estava entero korolado i no se estava puediyendo entender
si era de sinizmo o de joya !  Supito se kedo de riir.
La kara se le izo muy seryoza i fikso de sus miradas
burakadores los ojos de Mordo, mas muerto ke bivo !

-  Aha !  Es esto ! Te la keres rovar a mi ija !
La engrandesi i ize una flor delikada, la regali kon
todo bueno i me la vas a kitar ?

Se le aviya tomado la palavra de Mordo.  Entero blanko
mirava enbasho entezado !

-  I a Klarika ke le vo dizir yo ?  Olvidate de lo ke
avlatesh kon Graziella !  Yo no kero dar mi ija a este
pipino sin gueso, la vo dar a Mordo de Toledo ke se la
va yevar a la Kapital lesho de mozotros....Dime un poko !
Dime dime tu !  Ke dize mi Almendra a tus dezeos de loko ?

Mordo mudo!  No le sale la boz !

-  Ke dize ?  Ke va dizir mi Almendra !  Estara lokita
por este guerkito de Mordo !  Ya lo se yo ! Estara lokita
para irse a Konstantiniye de marbro i de oro. Va saltar
de plazer mizmo sin una mirada atras mi Almendra, mi dulse
flor de Sefarad...

Mordo serro los ojos....Dezesperado...

-  Vate ijo...Vate agora....Deshame konvenser mi espoza.
Me duele ma ya lo se ke es ansina ke deve de ser.  Se ke
mi ijika sera horoza solo kon ti i no kon este pipino sin
gueso de Shmuel Efendi.  Vate a la hora buena i ten fe en mi.

*
Mordo ni s'estava akodrando komo salyo del lado de
Nisim efendi, dezato Blanka de Nieves para tornar al
 puerto i ver lo ke Eliezer efendi aviya logrado en
este kurto tiempo. Kaliya ke se tope, i el, en la kavesa
de sus echos si keriya ke toda su ropa yege, i en buen
estado a Konstantiniye.

Teniya sed. Entro al mizmo Han de la demanyana. Se
asento al mizmo lugar.Disho a la mujer grega ke le
demando lo ke keriya ke no teniya ambre ma ke keriya
del mismo sherbet de la demanyana...Una karafa entera
le vino a la meza dospues de unos minutos. Estava
kansado i los ojos se le estavan serrando. No aviya
durmido del todo la noche. Ke noche ! Ke iva ser de
eyos ? Si Klara no akseptava ? Si Bohor efendi no topava
el koraje de avlar a su espoza ?... No, no teniya ambre !
Ma porke teniya mareyos i enguyos ? La sala entera se le
estava aboltando delantre de los ojos. Kijo detenerse a la
grande meza, era komo si s'estava arezvalando del banko
ande estava asentado...'Almendra...Alme.....'

*
Ande Julie, Klara i su ermana estavan diskutyendo

kalorozamente. Todas las dos teniyan ijas de kazar
i fina akel diya tan importante deviyan de yevar planos
i projektos komo se deve sin olvidarsen del mas chiko
detalyo. En Calatayud se diziya ke las mujeres viniyan
al mundo para sus bodas, por kada paridura i kada boda
de sus kreaturas. Los Bar Mitzvas eran la responsabilitad
de los padres i la venida almundo de los inyetos mizmo
era una responsabilitad segundarya, el pezgo de las
fiestas i del Berit-Mila repozando en los ombros del padre
del muevo nasido.


A este momento estavan diskutyendo sovre el pranso ke
Klara keriya dar por los miembros de su famiya i por las
del novio. Era uzo de envitar los kosuegros dospues ke
el padre del novyo demandava la mano de la manseva.
Esta partida del echo se aziya afuera de las kazas, en
el lugar de lavoro o en un han en komyendo o en una
guerta ande se beviya un kafe o un sherbet, kon una
persona de la famiya o un buen amigo ke konosiya bien
las dos famiyas. Se avlava komo de un negosyo i se
tratava de kedar de akuerdo sovre el ashuar, las joyas
(en vezes por formalitad porke esto ya estava diskutido
entre las madres i las tiyas) i lo mas importante :
La dota ke el padre de la novya teniya ke dar a su yerno.
Esto era echo de hombres i ni ke se diskutiya allado de las
mujeres por guadrar la honor i los buenos sentimyentos.


Klara pensava azer el pranso kuando Mordo se iva ir en
unos kuantos diyas. No teniya la mas chika ideya deke
se le estava apretando el korason kada vez ke viya
Almendra allado de Mordo. Lo keriya bien al mansevo i
lo justo ke no le topava nada de negro, al kontraryo todo
bueno i perfekto ma su prezensya no la aziya sintir komoda
en su propriya kaza !


Saviya ke era un importante kliente de su espozo, un ijiko
judyo de Sefarad i de muy buena famiya, enstruido, shomer
Tora i Mitsvot kon mano avyerta i kerido de todos.
Penso ke todas las madres ivan a estar boladas para tener
ansina de yerno ! Eya no ! No iva pueder suportar la ideya
de peryer a su ija porke la sola ideya de saver ke la iva
yevar a Konstantiniye le arevantava la fiel ! No Almendra !
Se inyervo de si para si por trayer a su miente ideyas
asemejantes ke no teniyan ni kola ni kavesa.... De ande
para ande pensava ansina de lokuras ! No se tratava de
esto ! Almendra se iva kazar kon Shmuel efendi i todo iva
salir perfekto, egzaktamente komo Graziella i eya lo keriyan
tanto des de anyos i estavan planeyando esto agora.


Meri i Almendra estavan asentadas en la terasa dela
kaza, arriva, debasho de la pergola ke Isak efendi aviya
echo de sus proprias manos para empidir el sol de kemar
los ke keriyan asentarsen a la terasa durante el diya.
De la terasa se viya la mar i el puerte de leshos kon las
naves de todas las kolores komo  flores parsemadas.
Las unas teniyan sus  velas avyertas.... Akeyas ke
entravan al puerto o se espartiyan de la ermoza sivdad,
la namorada de la mar, Smyrna,  la madre de los marineros
kansados ke les avriya sus brasos.

Las rizas de las mansevikas meskladas a los kantos de los
bilbilikos era una alegriya de oyir. Estavan tan horozas las
dos ke era komo si se puediya 'tokar' esta joyia ke se
manifestava kon bruido, saltos i bayles.


Almendra los ojos a mitad serrados le aviya kontado
a Meri bolando de plazer, el enkanto i las horas ke
aviyan pasado eya i Mordo en la guerta, la noche, un
diya antes ! Ma estava muy preokupada tambien ! Se
estava espantando kualo le iva responder su padre a
Mordo ! I se refuzava de darla a el ? Si Mordo partiya sin
verla mizmo por no azerlos sufrir ?

No puido suportar esta ideya i se le assombro sus
manyifikos ojos klaros... Si solo le puediya avlar i saver
komo le fue  todo....

(a kontinuar kon Sharope)

 

- Copyright © sefarad.org - 1997 - 2017

Retour au site sefarad.org -