Accueil - sefarad.org

Almendra...parte 15

    MENU    

SEFARAD.org
ESKRITOS de savor
RESHETAS
AIDEZ-nous
Page PRECEDENTE;

 Parte   15

 

Las dos primas kedaron en la terasa a azersen
konfidensyas bevyendo sherbetes i alegrandosen
ke todo iva entrar en orden en poko, i la absurda
situasyon de Almendra ke normalmente teniya de
kazarse kon el namorado de su prima se iva aklarar.
Meri de su parte sintiya ke sus espantos dezaparesiyan
avagar avagar. Pensava ke Graziella se iva sentir
enganyada i pinchada en su orgulyo.  Por seguro ke iva
kerer kazar su ijo presto !  Kon ken ? Kon la ke keriya
su ijo presyado ! La ke Shmuel efendi adorava i aviya
aprometido de azer todo para konvenser su madre.  Ken
mas ke eya, Meri ?  La ija regalada de  Julia i Isak
Aboresi de Kalatayud komo eyos.  Una famiya ke siguro
valiya los Abenyakar.  Una vez ke Almendra se iva ir
a Konstantiniye, todas las madres ivan a empesar a
bushkar novyas para sus ijos !

*

En el grande konak de los Abenyakar la kuzendera i
sus elevikas estavan aparejando vistidos rikos i
brodados para Graziella.  Estavan avlando entre eyas

i se estavan maraviyando a la ideya ke eyas tambien
se ivan a topar en la mas grande boda ke se iva
azer en Smyrna ! Ke kazamyento !  Los Abenyakar
estavan tomando la unika ijika de los Benezra !
Todos los judyos konosidos de Smyrna ivan a vinir a
esta boda alavada......Ma mientres estavan kansadas
muertas de lavorar.  La Senyora Matilda, la ke diziyan
ke teniya manos majikas para los vestidos, las aziya
lavorar sin kedar i siempre topava de dizirles kozas
ke las desgustavan !  Era demasyada metikuloza i
nunka akseptava manko del perfekto de sus elevikas.
Todas ke lavoravan por eya se aziyan a sus tornos
grandes kuzenderas ke kuziyan por las famiyas las
mas rikas !

-  Saves Matilda komo se vana vistir Klara i Julia
en las seremonias ?

-  No lo se Sinyora Graziella.

-  No te angajaron para kuzirles ?

-  No, no me disheron nada dayinda.

-  I ke estan asperando ?  El diya dalkavo para azer
fostanes ?  Muy kuryozo de vedra !

-  Puedeser ke tienen otra kuzendera ?

-  No kreyo.  Para las fiestas Klara, Almendra, Julia
i Meri por seguro ke van a kerer ke estesh ande eyas
a lo manko un mez de tiempo ! Vistir kuatro dammas kon
fostanes de boda no es fasil. Mizmo si lavoras kon tus
elevas i si te ayudan eyas.  A mi no me plaze deshar
las kozas al dalkavo momento...  Kero ser repozada i
azer todo en su tiempo.

-  La Sinyora pensa siempre justo.

-  Te fuites ande Julia en serka ?

-  Antes dos mezes estavamos ande eya unos vente diyas
para azerle vistidos livyanos de enverano i a la
Sinyorita Meri tambien.

-  Se izo ermoza la ijika de Julia !  Henoza, save
meldar i eskrivir, broda maraviya los puntos de
Kalatayud, muestra sivdad en Sefarad.  Kale ke Almendra
le demande de brodarle  dos kavesalikos a la manera de
muestro gusto !

-  Si konosko este punto.  Las flores son echas de
ilos de seda i asemejan a las de la guerta.
Ke kolores maraviyozas !

-  Si es vedra.  Mi Sinyora madre teniya munchos
manteles, kavesales i savanas de su ashugar echos
kon este punto.

-  Penso ke la Sinyora Klara tendriya de estos por
el ashugar de su ija.

-  Tienes razon.  Deven tener un ermozo ashugar.  Se va
enkolgar dospues de las fiesta ke vamos a dar por el
espozoryo.  Kero empesar a enderechar sus  kuartos en
el konak tambien.  Enkomendi unos kuantos muebles a
los Italyanos i esto asperando los lavorantes para
kovrer las paredes kon las tapiseriyas ke guadri para
Shmuel.  Dos pintores se estan okupando del tejado
i lavoran sin mizmo repozarsen !  Se va azer muy ermozo.

-  Komo no Senyora Graziella !  Si es vozotros ke lo
azesh va asemejar a un palasyo !

-  Si Matilda !  Kero ke tengan todo justo i de lo mas
ermozo.  Shmuel es mi uniko ijo i es un anjelo.  Todo
lo muestro es para el i su famiya.

-  Guadrado de ojo malo Sinyora Graziella.  Lo vide en
serka i no ay de dizir nada a su ermozura i a su klasa !

-  Ah si ?  Ande lo vites ?

-  Los vide en la guerta del konak de los Aboresi.

-  Ande Julia ?

-  Si.

-  Komo  ?

-  Kuando estavamos lavorando ande eyos a la entrada
de la enveranada, ya lo savesh.  Kedimos ande eyos.
Son jente de lo mijor, sin mintiras !  Ke mezas ke mos
aparejaron, ke hen de Julia i ke balabay presyozo
Isak Efendi... Ke Sinyorita Meri !... Una prensipesa.
Dulse i buena de korason.  Manos bendichas tiene. 
Le viene kustura de la mano, broda i lavora de no kreyer !

-  No me dishites de Shmuel...

-  Ah si !  Los vide una noche en la guerta kon la
Sinyorita Meri !

-  De noche kon Meri ?

-  Si.... Puedeser ke keriya demandarle kozas de Almendra.
Yo pensi a esto.  Estavan avlando asentadikos allado del
basino.  Dospues durmi.


Graziella no disho nada mas.  Kualo puediya tener
Shmuel kon Meri de noche ?  Se akodro ke lo aviya bushkado
en su kuarto dos vezes i no lo aviya enkuentrado.  Shmuel
le aviya kontado a su madre ke preferiya kaminar de
noche al  bodre de la mar kuando estava muy kayinte.
Ma... Ande Meri ?  No le aviya dicho nada a su madre
de esto !

*

Eliezer i Gabriel estavan aryento de la sudor.
Keriyan azer lo mas posivle en poko tiempo.
Aviyan avlado kon un konosido ke diziya tener
en su mishpaha un vendedor de kavayos i gameyos. 
Les aviya aprometido de okuparse i trayerles los
mijores animales para metersen en kamino kon una
grande karavana transportando ropas rikas.

Dospues se fueron al puerto i disheron a los de
los naves i de todas las vandas ke estavan bushkando
mansevos vayantes, fuertes i kapaches, buenos
maniadores d'espada i kon eksperyensya en
karavanas ke se ivan de Smyrna a Konstantiniye.
El bruido se propajo presto ke un hombre muy riko
estava preparando una karavana kon todo bueno
para ir fina Konstantiniye.

Esto de una parte era bueno para los aparejos
i de otro lado no era tan dezeado porke i los
bandidos se puediyan organizar para atakarlos
en kamino...

Los mansevos empesaron a vinir a dos a tres por
prezentarsen por este echo.  Eliezer i Gabriel los
estavan kuestyonando i egzaminando kon konsiyensya
para no yerrarsen.  Se aviyan asentando en una
guerta  enfrente de ande los naves se topavan,
mirando a la mar.  Era un lugar bastante grande
ande los marineros se enkuentravan para angajarsen
a una mueva ekspedisyon, negosyos se aziyan entre
los grandes merkaderes, se alkilavan o se vendiyan
naves, se projetavan kontrabandas i ekspedisyones
mersenaryas.... Los marineros fumavan los grandes
nargilas kon el te fuerte i buyendo....Se eskudyava
karnes asadas i supas kon pan fresko para los ke
teniyan plata i estavan ambiertos.  Limonadas
freskas se vendiyan lo mas en la kalor de estos
diyas de enverano.  Eliezer i Gabriel estavan
bevyendo agua buyendo kon ojas de menta i
limon para arefreskarsen i tener mas fuersa fina 
la tadre.  Se saviya ke agua kaynte kortava la
sed mas de agua yelada. Ya aviyan angajado
dizisyete personas entre puedeser unos syen
deyos ke se aviyan prezentado i estos valiyan
trenta !

Estavan kansados i la tadre estava muy avansada.
Los hombres ya se aviyan tornado a sus kazas o
aviyan topado las mujeres kon ken se ivan a divertir
la noche dospues de viyajes largos i peligrozos en
mar.  Smyrna, ke un grande puerto, era konosido
tambien por la ermozura de las mujeres, lo mas
gregas, cherkesas, bulgaras ke teniyan por echo
de envitar a sus mezas, baylar i kantar a los
marineros leshos de sus kazas, angusyados i ke
no saviyan ande gastar todo lo ke aviyan ganado !
Roksana era una d'estas...Una mujer blanka i
redonda ande kaliya...Sus grandes ojos vedres
diziyan ke puediya echizar el hombre el mas
duro de las mares....Dingunos no saviyan de ande
era porke avlava perfektamente todas las linguas.
No se saviya mizmo si Roksana era su nombre verdadero
o si se aviya inventado un nombre.  Aviyan unos ke
diziyan ke teniya kreaturas eskondidas leshos del
puerto !  Unos diziyan ke era malefika i ke los
ke se ivan kon eya se hazineavan i muriyan ! Ma no
es por esto ke le mankava klientes !....  No se
iva kon el mas riko ma kon el mas poderoso i el
mas ermozo !  Era eya ke los eskojiva kuando
kaminava kon sus ombros avyertos en las kayes
estrechas del puerto kon su kaminada provokativa
echando sus largos kaveyos de miel supito detras
de su ombro...  Es kuando veiya el ke le plaziya
ke se aserkava de el para demandarle si teniya
muncha plata para gastar por una noche de
maraviyas... No teniya menester de dizirlo ! 
Sus ojos a mitad serrados kon sus largas silas
-pestanyas/kirpik/lashes- i su  mirada de
esmeralda eran mas de aprometadores por la noche
ke propozava.  Las manos en las ondas aldikeras
de su fusta ancha i larga, kaminava delantre de
su viktima de akeya noche pensando mas a su plazer
ke a las piesas de oro ke iva resivir ! Supito
se kedava, se aboltava, le soriyava, se aserkava
a pasos de gato a su lado i lo rovava un bezo
fuyendose immediatamente dospues.  Ansina empesava
la nochada aprometida fina ke la demanyana su
viktima se rendiya a eya entero enkadenado de
kadenas enviziblas.... Se namoravan de eya i
eran sus siervos para kuando los teniya de menester
seya para kulo ke seya... Dingunos no saviyan ande
eskondiya sus rikezas i para kualo segiya bivir de
este modo sin tener de menester de oro.....


*


Akeya tadre Roksana estava asentada ensima de una
grande piedra enfrente de la mar komyendo prunas
ke uno de sus amigos le aviya ofresido.  La fruta
goloroza i dulse le estava mojando su garon seko
de la kayntor.  No teniya ganas de divertirse i
estava pensando los ojos al horizonte a sus
sekretos kuando sus ojos remarkaron Eliezer i
Gabriel vistidos de manera rika i noble, avlando
kon jestos, riendo i kaminando kon pasos anchos
i relaksados. Nunka los aviya visto antes.
Etranjeros ?  Estos no eran marineros !
Bolto la kavesa sin interesarse mas, se alevanto
i empeso a avlar kon el kapitano de unos sesenta
anyos de un grande nave de kolor naranja ke aviya
entrado al puerto antes dos noches.

 

LA misma tadre Roksana se peryo en las kalejikas
estrechas antes de entrar a una kaza deskonosida
de todos por la puerta chika en fierro de una
alta muralya. Entro a una grande guerta inchida
de arvoles de frutas i de azetunas.  La guerta
estava dezierta i se viya ke estava abandonada
porke las yervas aviyan pujado i no eran las
espinas ke mankavan en todas las vandas !
Unos kuantos perros vinyeron a saludarla echandola
kuaji abasho !  Sinko perros de kolores diferentes
ma de la mizma rasa ke, solo de verlos, se puediya
ezmayar la persona d'espanto.  Roksana los kareso
a todos uno i uno, les disho palavras dulses i
entraron todos enjuntos por una otra puerte ke
separava la guerta de las frutas del patio
maraviyozo ande tres kreaturas estavan jugando i
koryendo debasho del ojo vijilento de una ermoza
mujer de unos sinkuenta anyos bastanta alta i
karnuda.  Sus ojos estavan briyando de un vedre
inkreyivle.. El vedre insolente de las esmeraldas.

Kuando Roksana i sus perros entraron al patio
todos vinyeron bolando a abrasarla i a bezarla. 
Su kara se troko enteramente.  Una joia profunda
la aviya transformado en un momento.  Su kara
ekspresava la buendad de un anjelo. Los abraso
a todos en mizmo tiempo.

- Mamma, mamammma, mamika....

- i yo..muestra mamita  esta aki..

- Komo estas mamita ?

- Entra ija dulse miya, mi ojo preto, ke no mos
mankes, no te asperavamos...

- Mis amorsikos lokitos... Komo estash ?
M'eskarinyi de vozotros ... No puide mas asperar !

- Te vas a kedar mamita si ?

- Si mi dulse...

- Vas a jugar kon mozotros ?

- Por seguro !  Ma deshadme arepozar un poko i
avlar kon granmami en primero !

Roksana kito los perros a la guerta de las frutas
i les dyo a komer grandes pedasoz de karne kocha
solo por eyos.  Troko la agua de la grande kaldera
de ande los perros beviyan, los kareso de muevo
i entro del patio a kaza para avlar kon su madre.

Estavan asentadas en una grande sala el suelo
de la kuala estava enteramente kuvyerta de
marbro roz ansina ke las paredes fina la mitad.
Un grupo de pasharos de marbro estavan komo si
bevyendo agua de una chika pisina muy ermoza de
ver.  La verdad es ke estava arefreskando el
lugar kon los potes de plantas en el bodre i en
los kantones de la sala.

Dospues de avlar de todo modo de kozas de la kaza
de las kreaturas i de komo les pasava la vida
en este paradiso de lugar Roksana le demando a
su madre si aviya resivido algunas novitades de
Pietro, de Italya o mizmo de Konstantiniye.
Donna Franseska bolto sus ojos i kon una chika
boz le disho ke saviya ke Pietro estava en la
sivdad ma ke no lo aviya visto dayinda. Roksana
se moryo los mushos ma no disho nada. Sus ojos
se oskuresyeron por un momento.  Se alevanto de
su siya, la abraso a su mama i le disho ke iva
salir al patio a jugar kon sus chikos. Donna
Franseska le respondyo ke eya mizma iva aparejar
unas kozas para komer todos enjuntos.

*

Para ir a sus kazas, aboltando de ande Julya,
Klara i Almendra aviyan preferido tomar el
kamino un poko mas largo ma sin el polvo
ke solevantava las ruedas i los kavayos indo
i vinyendo en las kayes de la sivdad. Ademas
aviyan arvoles sekularyos de la parte ke
kaminavan i una freska solombra los guadrava
un poko del sol kemando. En estos diyas las
personas s'estavan ezmayando de la kalor i
estavan preferando mizmo estar en sus kazas.
Aviya anyos ke no aviya ansina de kalores en
Smyrna.

Klara yevava debasho de su braso un sestiko de
rafia ande metiya su lavoro para brodar kuando
iva a vijitar su ermana i sus amigas o kuando
desidavan de ir al bodre de mar, de la demanyana.
En akeyos diyas kada uno aparejava lo ke iva komer
entr'el diya, su fruta i bokales de agua para
pasar un diya maraviyozo i arefreskarsen en las
aguas klaras de la mar Aegea. Almendra, Meri,
los chikos i sus amigitas adoravan esto i siempre
rogavan a sus madres de yevarlas a banyarsen.
Se yevavan kon eyas otr'un fostan livyano para
jugar kon las aguas i espandirsen en las arenas
blankas del bodre de mar.  Ni ke se rendiyan kuento
komo el diya pasava.  Arekojiyan todo modo de
piedizikas de kolor, conchas marinas/sea shells
grandes i chikas i aziyan figuras, skulpturas
interesantes kon estos en los largos diyas del
invierno. En el kamino del ritorno, ya empesavan
a demandar a sus senyoras madres kuando ivan irsen
de muevo a banyarsen !

Kuando Klara i Almendra vinyeron a sus kazas,
bastante kansadas del kamino, la primera koza ke
Almendra izo fue de mirar otra vez en todos los
lugares por ver si Karamela aviya yegado o no.
No estava....Se sintyo muy triste. No puediya
azer nada !  Karamela se aviya fuyido o alguno
la aviya arovado !  Ken ....Ken iva tomar su
gatiko ?  Todos la amavan i dingunos no kereriyan
azerle danyo o kavzarle pena... Alora ...Ke le
aviya afitado a su gato ?

Se troko sus vistidos i abasho abasho para ayudar
a su madre i aparejar la meza por la sena.
Komo devya komportarse agora kon Mordo allado de
sus paryentes ?  Komo ajeno ?  Dospues ke aviyan
pasado kon el estas horas enkantadoras una noche
antes en la guerta ?

Aviyan kuaji terminado todo fina ke Nisim Bohor
Benezra i sus dos ijos grandes chaftaron a la
puerta.  Klara i Almendra pishin koryeron a
avrirles la puerta i resivirlos kon sorizas i
bendisyones.  Mordo no estava kon eyos i la noche
estava para abashar.


(a kontinuar kon Sharope)

- Copyright © sefarad.org - 1997 - 2017

Retour au site sefarad.org -