Accueil - sefarad.org

Almendra...parte 18

    MENU    

SEFARAD.org
ESKRITOS de savor
RESHETAS
AIDEZ-nous
Page PRECEDENTE;

 
Parte   18


Eliyezer i Gabriel eskojeron los mijores
kavayos i gameyos i dospues de pagarlos karo
kon oro, se metyeron en kamino para ir al puerto
i tratar de angajar unas trenta personas otras
por el viaje.

La guerta enfrente del puerto ande todos viniyan
para el dezayuno i topar todo modo de echos estava
yenno de jente de todas las kolores i de todos
los ofisyos. Marineros lo mas ma aviyan tambien
hombres de armas, hombres ke saviyan gizar i kuzir
vistidos, hombres ke dresavan i se okupavan de los
kavayos, lavorantes de kampos, mosos....

Gabriel konosiya a unos kuantos d'entre eyos.
Les avlo en Bulgaro i a otros en Grego.
Eliyezer lo estava observando de leshos i se estava
felisitando de aver pensado a azerlo su hombre de
konfiensya. No lo iva deshar en Konstantiniye !
Lo iva tener komo su ijo en su kaza de Galata !
Solo yegar sanos i rezyos en primero...Saviya lo
duro ke seriya de pasar las montanyas i las plenas
en sus kamino. Mordo era mansevo ma se le puediya
azer plenamente konfiensya porke no le mankava ni
la eksperyensya ni el saver i ni el koraje. Komo
su vida aviya trokado en estos 3 diyas ! Inkreyivle !
El Di-o le aviya trayido un grande mazal i Eliyezer
penso ke no lo reingrasyava bastante por todo lo ke
le dava ... Se aprometyo de trokar de modo de vida
kuando ivan a yegar a Konstantiniye sanos i rezyos
i dedikar mas tiempo al ambezo de la Tora i alos
savyos del Beit Knesset/kal.

Los echos estavan progresando mas fasil de lo ke
pensavan. Gabriel estava eskojendo los hombres
kon fasildad i muncho astusyo. Eliyezer para dar
su aprobasyon nunko tuvo de pensar dos vezes !
Eran mansevos kapaches, mostrozos i kon
eksperiyensya. Hombres de armas i auzados a azer
kaminos largos kon karavanas i ensima de kavayos.

Eliyezer kon Gabriel i los kuatro hombres de Mordo
akompanyados de los hombres ke aviyan angajado en
el puerto, fueron ande estavan los kavayos i los
gameyos, los tomaron i tornaron al konak del Bey.
Desharon los kavayos kon dos de los hombres en el
kampo d'enfrente i empesaron a trayer al kampo las
balyas de ropa ke deviyan ser kargadas por ser
vendidas en Konstantiniye. Pensavan metersen en
kamino al amaneser dospues de Shabat, Era una
muy grande karavan i se deviya aparejado munchas
kozas en mizmo tiempo. Eliyezer i Gabriel estavan
dando ordenes a boz alta en todas las vandas.
De leshos se viya un grande kampo kon munchos kavayos
i gameyos i personas koryendo i lavorando kon muncha
enerjiya.

Eliyezer mando Gabriel i unos kuantos hombres al
sentro de la sivdad por merkar mas kozas ke
nesesitariyan en kamino i unas tentas para el
kampamiento las noches, komanya seka, arina,
azeyte, vinos, pishkados sekos i peksimet sin
kualo ni se pensariya salir a kaminos largos..


*

Klara vino ande Julya un poko mas tadre ke
Almendra. Estava vistida de un largo fistan/
fostan delgado i teniya un cepken/vest lavorado
de todas las kolores kon el punto de Calatayud.
Sus sapatos eran diferentes de las otras mujeres
i se veiya el arte de Nisim efendi ke le plaziya
azer modelos muevos nunka vistos antes !
Eran sapatos de enverano enteros avyertos i muy
repozados en el piye. Le aviya regalado a su ermana
Julya tambien un par de estos i Julya se le aviya
enkolgado ensima de eya de plazer ! Julya i Klara
eran konosidas en Smyrna por sus buen gusto i los
fistanes ke se vistiyan. Sus madre teniya manos
bendichas i les kuziya a sus ijas keridas i a sus
inyetizikas, siempre ke su marido le trayiya del
puerto ropas alavadas ke viniyan kon las naves,
de muy muy leshos, ande, parese, mismo la jente
no asemejavan a eyos ! En vezes los viya en estos
naves ! Teniyan el kuero preto i aviya ken diziya
ke egzistiya unos kon ojos estirados tambien !
Amariyos ! Aviya oyido ke aviyan unos kon kuernos
i otros kon plumas en la kavesa al lugar de kaveyos.
Ken save ! Eya no konosiya dingunos de estos.
Ni keriya tambien !

Klara estava merikiyoza...Keriya el bien de su ija
i no estava pensando solo ke seriyan muy leshos ma
no konosiya del todo la manera de bivir de este
mansevo. Mizmo si era un grande merkader i konosido
i amado en la plasa! Komo la iva ayudar si teniya
menester de eya ? Ken le iva mostrar las kozas ke
solo una madre puede amostrar a su ija ? No ke su
Almendra no era bastante nikochira ! Primero el Di-o,
Estava pronta para ser espoza i madre i Klara estava
segura ke no los averguensariya en la kaza de su
marido ! Dizimueve anyos ! Tanto la aviya guadrado
para eya misma ke dingunos no la ivan a kerer mas !
Aviya vinido el tiempo de espartirsen i kaliya ke se
akostumbrara a esta ideya ! Su ija no iva ser su
esklava toda la vida i deviya eya mizma azer su nido
i tener sus kreaturas !

Saviya entre si ke Mordo era mas seryozo hombre ke
Samuel efendi i ke puediye tener konfiensya en el,
ke iva afishugar a su mujerika i la iva kerer komo
Bohor efendi la amava a eya...

Alora... Deke no estava repozada i kontente de este
kazamiento ? Teniya otros 5 ijos i dospues de
Almendra kaliya ke pensara a tomar ermuera para su
ijo bohor !

Kon bueno eskapar una koza i empesar kon otra ! Ma
ya lo puediya espozar.... Se kaliya pensado a una
buena ijika... Ken ?... Ken.... ?


- A la buena hora mi ermana presyoza... Ke bueno
izites de vinir presto, antes el medyo-diya kerida !
Muestras ijas se keren ir al bodre del mar !

- Si ? Keres i tu Julya ?

- Si si ! Ke tenemos de azer aki ? Tomaremos unos
kuantos bokados kon mozotros i fruta i agua i mos
iremos sin tadrar.

- Ande estan ?

- Arriva ! Las yamo agora mizmo ! Seran tresalidas !
Ijikaaaaaaaaaaaaas ! Aparejavos i Meri, okupate de
tu ermaniko ! Mos estamos indo al bodre del mar !

Mientre ke los tres primos se estavan vistyendo,
las dos ermanas estavan aparejando lo ke ivan a
komer i bever ensima de las arenas blondas del
bodre de la mar Aegea, la mas ermoza mar del mundo
ke aviya servido de nido a la mitolojiya grega i
romana antika. Dayinda se puediyan ver los restos
de las sivdades antiguas, sus kaminos i sus moradas
abandonadas, la somptuozidad de las kolonas de marbro,
los anfiteatros romanos en los kualos hombres i bestias
salvajes kombatiyan fina la muerte para englenar los
espektatores !


Mordo estava kontente de la rapides ke los
echos estavan avansando.  Es vedra ke todo
esto estava kostando una fortuna ma estava
seguro ke dospues ke venderiya todo lo ke
se estava yevando de Smyrna a Konstantiniye,
rekupereriya el dopyo sino el triple de todos
sus gastos, komo siempre aviya okurrido las
vezes pasadas.  Ya se aviya echo un eksperto
de todo lo ke se vendiya i a ke presyo.
Saviya merkar sus ropas en el lugar mismo i a
buen presyo.  Era su spesyalitad de negosiar
kon muncho kudyado todo en tenyendo muy buenos
relasyones seya kon los vendedores seya kon
sus klientes illustres i muy rikos todos.
Mordo era un merkader amado i bushkado por los
unos i los otros.  La jente le aziyan konfiensya
i saviyan ke nunka se ivan a enganyar en merkando
ande el.  Pagavan un presyo alto ma eran seguros
de la kualitad de lo ke merkavan.

*

Akeya tadre del Mierkoles, dospues ke desho
todos sus hombres a la responsabilidat de Eliezer
i de Gabriel en el Konak del Bey i en los kampos
enfrente del Konak, Mordo salto ensima de Bianka
de Nieves para yegar ande los Benezra.

El korason le estava firyendo kuando estava pensando
ke le mankava solo tres diyas otros para salir en
kaino i deshar su palomika blanka en Smyrna la
inolvidable.

Kuryoza koza, mismo dospues de tantas kozas ke estava
azyendo durante el diya entero, la kalor atabafando
las personas i los animales, i su miente sin repozo,
no estava sintyendo el mas chiko sinyo de kanserya !
Estava yenno de una enerjiya ke lo estava pushando
a estar mismo mas aktivo i pensar en los mas chikos
detalyos de sus viaje a Konstantiniye.  La sola koza
ke lo estava enteresando por el momento era de yevar
a bueno todo, dar a sus paryentes la buena notisya
de aver topado por fin una novya ke le konveniya en
todo i ke amava kon todo su alma.

Keriya ke esta boda se oyga en todos los lugares
del Imperyo, mismo en los mas chikos, i ke se konte
komo las agadas de boka en boka para la prosperitad.
Sus amores seriyan immortales i siempre se ivan a
kerer ansina komo se keriyan agora !  La jente los
iva n a nombrar mismo dospues de sus muertes por ser
los amantes eternelos !


*


Bohor efendi i sus ijos ya aviyan tornado de sus
lavoro kuando yego a sus kaza.  Es Almendra ke lo
estava asperando  kon kuatro ojos, ke koryo i le
avriyo la puerta kuando travo la kuedra attada a
una kampanika ke suonava ensima de la puerta,
aryento de kaza.  La keriya abrasar i bezar,
tomarla en sus brasos i yevarla a la guerta ande
kedariyan abrasados komo la noche akeya ke se
aviyan dicho kuanto se amavan i aviyan kedado
ansina fina la demanyana kuaji.  Ma no lo puediya !
No era korrekto i permetido...Penso ke todas estas
tradisyones en los espozoryos no egzistiyan en los
tiempos muy antiguos, kuando el hombre tomava una
manseva de su puevlo en su tenta i la aziya su
mujer, i, dospues, todos la estimavan ke mujer de
este hombre i madre de sus kreaturas.  Bastava tener
el akordo de los dos padres... I no siempre,  porke
munchos mansevos fuyiyan las mansevas de otros
klanos tambien i afitava ke en estos kavzos guerras
sanglantes okurrivan !  Penso ke el la fuyeriya a
su Almendra, seya la ija de ken seya, sin preokuparse
si uvyeran guerras i matansinas o kualker koza
pormodo de esto !  Ni ke puediya pensar una vida sin
eya a su lado.

Mordo se sintiya impasyente komo si su tiempo no le
iva abastar para nada.  No keriya gastar ni un lapso
de tiempo de su felisitad kon su Almendra... Le iva
tomar mezes fina ke puedriya tornar a Smyrna para su
boda.  Puedeser no tanto si aziya las kozas presto
i una detras de la otra.  Izo heshbon/kuento ... En
Enero iva pueder tornar.... Ma las nieves ? !!! El
friyo i los kaminos serrados  ?!!! Boda en invierno ?
Asperar fina MAyo para ke el tiempo se arekayinte i
azer la boda alora ?  Otros  kuatro mezes ?  En todo
dies mezes de asperar... El meoyo se le partiya !

-  Buenas tadres mi Palomika..Komo me mankas diya
entero !

-  Buenas tadres Mordo Efendi.  Bienvinido a muestra
kaza... Deveriyas ser muy kansado i ambierto.
Entraremos aryento.

-  Me siento muy bien mi Almendra kerida.

-  Buenas tadres Sinyor Padre
-  Buenas tadres Sinyora Madre
-  Buenas tadres keridos Ermanos... Salud i Paz a todos.


-  Asentate Mordo efendi.  Estamos prontos para komer i
te asperimos pensando ke vas a vinir kansado i ambierto.

-  Grasyas Sinyora Madre.


Mordo se asento ande le mostro su esuegro a su siedra
i Almendra a su lado.  A su derecha se asentava siempre
Klara su espoza.  Esta noche a su siedra estava Mordo
al lugar de su ijo Bohor.  Es Almendra ke keriya bolar
de felisitad sintyendose supito importante a la meza
de famiya, asentada allado de su apprometido !

Mordo kito de su aldikera un aniyo de grande valor kon
un par de eskularichas de ezmeralda.

-  Kon vuestro permiso Sinyor Padre, le kijyera meter
a mi apprometida mis regalos, syendo konsiyente ke merese
mijores..

-  Tienes el permiso ijo.  El Di-o ke te de echos buenos
i ke siempre le merkes kozas ke vos van a plazer !

-  Mi kerida, eskoji por ti la kolor de tus ojos kuando
miras kon amor al arvole de almendras ke tu Sinyor Padre
sembro el diya de tu nasimyento.  Ya se ke son de la
kolor maraviyozo de los sielos ma los vide de esta kolor
solo kuando miras a tu arvole-ermano.

-  MUnchas grasyas Mordo efendi.  Estan presyozos.  Nunka
vide tan ermozos.  Los metere fina el diya de muestra
boda.

-  Ke maraviyozos Mordo !  Te kostariyan una fortuna !

-  Ni se pueden aserkar de la ermozura de mi Almendra
Sinyora Madre.  Kes los goze !

-  Empesed a komer ke ya se yelo mi komida i no vos va
plazer mas !

-  Mi  Klarika ! No ay ken se puede aserkar de tus
talentos en la kozina .  Komeremos todo lo ke aparejates !


( a kontinuar kon Sharope )

- Copyright © sefarad.org - 1997 - 2018

Retour au site sefarad.org -