Accueil - sefarad.org

Almendra...parte 26

    MENU    

SEFARAD.org
ESKRITOS de savor
RESHETAS
AIDEZ-nous
Page PRECEDENTE;

parte  26
 
 
Hafsa Sultan estava muy kontente de los
progressos de Roxelane i la keriya muncho bien.
Un diya Mahidevran Gulbahar Hatun le embiyo a
dizir ke keriya vinir para bezar su mano si
estava pronta para resivirla. La Valide Sultan
adorava su inyeto, un ijiko ekstraordinaryo de
intelijensya i de buendad de korason. Lo asemejava
a su ijo Suleiman i diziya ke eran una mizma alma
partida en dos.

Roxelane se estava ambezando Latino en la kamareta
d'echar de Hafsa Sultan, asentada en su sofa
preferido. De una mano lo estava karesando en
pensando ke el diya iva venir i todo seriya suyo....
Dospues de ser la kerida mujer del Sultan se azeriya
Valide Sultan kon su proprio ijo al trono ! Para esto,
agora, deviya de ser adorada por la Valide Sultan i
mas tadre por el Sultan mismo. No aviya otra salida !
Era lo todo por lo todo i si no....El infierno i la
muerte. El Harem no deshava otra alternativa a las
mujeres, una vez ke se topavan en sus labirentes.

Roxelane teniya, i lo saviya, armas muy poderozas
para pueder yegar a lo ke dezeava sovre todo.
La manseves, la belleza i su intelijensya, i si se
les ajuntava a estos el dezeyo i el pensamiento ke
no aviya otra solusyon, se puede entender la
reushitad total de esta Rusa ke no se espantava de
nada, i nada la puediya azer tornar de su kamino.

Se metyo a ambezarse el latino...I dospues se iva
ambezar otras linguas. Todo lo ke puediya !...
No es el tiempo ke le mankava ni las posibilitades
sin kavo de la vida en el Palasyo. Nunka la Valide
Sultan le teniya refuzado kualker koza asemejante,
eya mizmo siendo una mujer muy kultivada i
kuryoza de ambezarse kozas muevas. Avlava el
Otomano, el Ruso, el Polonezo, el Yiddish (porke
era judiya i su nombre era Helga kuando aviya
yegado al Palasyo) i el Latino. Su ijo el Sultan
se aviya tambien ambezado Grego i Latino i avlava
perfektamente el Arabo, el Ruso. el Bulgaro i la
lingua Farsi. Roxelane teniya de estudyar muncho
para ambezarse i eya linguas i otras kozas ke
tendriya de menester !

Estava en buen kamino i el buen mirada del Saray
la aviya transformado en una flor ke se estava
avriyendo de diya en diya... Estava estudyando
kon todo su seryo kuando oyo los bruidos d'aryento,
de la kamareta d'asentar de la Valide Sultan,
dekorada enteramente de marfil i de oro. Los
muebles eran echos de madera de roza i se aviya
uzado las mas presyozas sedas del Oriente.
Es Gulbahar ke aviya venido kon su ijo, sus Agas
i Kalfas. Supito las pezgadas kortinas de seda
entre las dos kamaretas se avriyeron i aparesyo
el chiko Mustafa :

- Ken sos tu ?
- Me yamo Roxelane ! I tu sos Mustafa !
- Si ! De ande lo saves ? Ke azes aki ?
Es la kamareta de mi Grandmama. Vate a tu kamareta.
- Yo so majika ! Me topo en todo los lugares...

El chiko se bolto i koryendo ande su grandmama le
disho ke ay una mujer majika en su kamareta !
Hafsa Sultan lo abraso i le disho ke Roxelane es
de vedra majika i ke vayga al lado de eya para ke le
konte historyikas, lo ke Mustafa izo sin asperar !
Estava amorozo de Roxelane ke no asemejava a
dingunos ke se okupavan d'el, lo regalavan, lo
yamavan "Shehzadem" i le aziyan kavod i todos
sus kaprichos !

Roxelane le konto historyikas de lovos i de kavayos
de los stepes i de los boskes de su payis kon su
poka lingua muevamente ambezada. Su aksento
aziya riyir la kreatura ke estava pasando un tiempo
muy divertido kon eya. Gulbahar Sultan entro a sus
lados i fue sorprendida de topar su ijiko tan feliz
allado de esta mueva vinida. El chiko no se keriya
despegar de eya i estava reklamando una otra
historya i una otra.... Lo tomaron de su lado
prometyendole ke Roxelane iva vinir a kontarle
historyikas kuando lo kijyera... Hafsa Sultan
estava riyendo de todo su korason dizyendo ke esta
Rusa teniya pelos de guerko ke travavan a todos !

Antes de irse Gulbahar Sultan miro otra vez atras
i sintyo komo un pilishko en su estomago... Esta
Rusa allado de su esuegra tan komodamente
enstallada en sus apartamentos i estudyando
Latino en su kamareta d'echar !! Era posivle ke
el Sultan l'aviya visto kuando viniya a bezar la
mano de su madre ? Allesho esta probabilitad
de su tino i se metyo a asperar su amado ke le
aviya apprometido ke iva vinir a verlos en la
tadre... Soriyo i empeso a aparejarse por el...

El Sultan no tadro a vinir ver su Haseki i su ijo..
Los topo feliz i riyendo en medyo de sus
serviyentas koryendo de todas las partes para
trayerle kavesales, bevyenta, frutas... Sultan
Suleiman estava kansado del diya entero i
amava repozarse en kompaniya de Gulbahar
i de su ijo ke lo kansava kijyendo ke se mete
a kuatro patas para asuvir ensima de el !!!
La primera vez ke aviyan jugado ansina
Gulbahar se aviya soflamado entera delantre
de los ojos de los Agas i esklavas prezyentes
en la kamareta ma todo se aviya aranjado
por el mijor kuando el Sultan se aviya riyido
dizyendo :

- Este ijo miyo va ser un Padishah alavado i mas
respektado de mi ! Mira komo se kere asuvir en
mi espalda !

Gulbahar se aviya echado a sus piyes dizyendole :

- Mi sol, mi leon poderozo, digunos en el mundo
ni antes de ti ni dospues de ti pueden egalar tu
splendor ! Tu ijo puede solamente ser tu solombra
i mizmo en este kavzo va renyar sovre todos los
payizes i los mas grandes reyes....

Al Sultan le plaziya ke lo alaven i sintirse
poderozo ! Era uno de sus puntos flakos ...

A la demanyana, las primeras palavras del Shehzade
fueron "Kero Roxelane, kero ke venga i me konte
historyas. " . Pishin se mando a yamar la manseva
ke vino sin grande entuzyazmo ! No le plaziya ser
la kontadero de kuentizikos i una amiga de juego del
Shehzade. Gulbahar la arresivyo kon bastante yelor,
mirandola de en alto i avlandole komo dando ordenes !
El chiko estava asuvyendo en sus piyernas i la estava
bezando kon karinyo yamandola "Roxelane, Roxelane
kon pelo de guerko ke yo amo !

Kuando vino la hora de las otras aktivitades del Prens
Gulbahar le disho :

- Tu echo eskapo, vate agora !

Roxelane no estava de olvidar esto de pronto ! Kuando
estavan avlando kon Daye ke la keriya muncho bien le
konto esto i Daye le arrespondyo :

- Mi chikitika flor.... Aze attensyon a Gulbahar.
Es muy seloza i muy poderoza por ser la madre del
Shehzade eredero del trono. Viene dospues de la
Valide Sultan i es la unika Haseki del Sultan ke no
va kon sus otras mujeres del Harem.

- Va vinir el diya ke tendra de abokarse delantre
de mi ! Si ! El Sultan sera solo miyo i padre de
mis ijos i es mi ijo ke sera Padishah dospues de
su padre.

Daye saviya ke esto era imposivle ma le soriyo...

- Todo esta entre las manos de Allah mi perlizika,
Si es El ke lo kere ansina, tu destino sera komo lo
dishites. Allah es Grande i El ke desida de Todo !

A sus katorze anyos otras miravan kon
envidya su puerpo perfekto i sus abundantes
kaveyos fina su talya, buklandosen naturalmente
en el hammam.   Teniyan esta kolor de flama ke
kayintavan el korason de todos ! Roxelane era la mas
attraktiva, enteresante i edukada  odaliska del Harem. 

(a kontinuar kon Sharope)


 

- Copyright © sefarad.org - 1997 - 2017

Retour au site sefarad.org -