Accueil - sefarad.org

Almendra...parte 29

    MENU    

SEFARAD.org
ESKRITOS de savor
RESHETAS
AIDEZ-nous
Page PRECEDENTE;

PARTE  29

 

Roxelane aviya desidado ke teniya bastante
metriza de todo lo ke kaliya para afrontar
Gulbahar Sultan i krear una situasyon para
salir en frente del Sultan.  Su primer orden
en el Harem fue un diya klaro de enverano
en 1525.

-  Sumbul Aga,  kero ke me agas un sinyo
kuando estare en el Hamam, Gulbahar Sultan
tambien i Sus Majestades se toparan en el Harem.

-  Lo dishites i ansina sera Roxelane ! 

... i los diyas i los mezes pasaron...

Sumbul Aga teniya en el tino el orden de Roxelane,
malgrado ke esta no teniya dingun derrito de darle
ordenes porke el Kizlar Agasi puediya arresivir
ordenes solo del SUltan i de la Valide Sultan i en
siertos kavzos solo del Grande Vezir.  Mizmo
Gulbahar Sultan se mostrava rezervada allado de
el, savyendo su enfluensya ensima del Padishah.

Las fuertes entuisyones de Sumbul Aga le aviyan
murmurado ke la hora aviya vinido para ke se
pasen kozas inesperadas en el Harem i ken era
el povretiko de Sumbul para salir kontra el Destino ?
Aviya trayido Roxelane al Saray, la aviya merkado
pensando ke seriya otra una ermoza flor en el
Harem et ke aviya salido ?  Una roza kon espinas
venenozas !  El i unos kuantos teniyan el antidot,
por agora,  ma los otros ?  Sintyo una yelor en
su espalda i murmureyo unas orasyones en su
lingua...  No era fasil ke las dos mujeres se topen
en el mizmo tiempo en el Hamam i ke el Sultan
venga al Harem !..

Akel diya afito un dospues de midi en Autumno !
Sumbul Aga i Roxelane ni un diya se aviyan
olvidado del orden !  Los dos estavan asperando
akel momento.  Sumbul Aga dyo el sinyo esperado.

Roxelane se alevanto i se fue allado de Gulbahar
Sultan i allado de todas  le disho  :

-  Paz a ti Gulbahar Hatun, te saludo !  Komo
esta el Shehzade ?  Me eskarinyo de el ...

-  Ken sos tu para eskarinyarte de el ?  El es
el ijo  del Sultan i tu sos nada mas ke una
esklava servyenta...

Gulbahar estava asentada en medyo de sus
mujeres.  Roxelane kuando echo su paso para
tornar izo de manera ke el pie de Gulbahar se
meta en su kamino i se kayo la kara kontra
la laja mojada...  Un grito inhumano salyo de
su garon. Todas estavan tratando de allevantarla
ma no se puediya..  Estava echando vardas de
dolor...  La laja estava yenno de sangre ke le
korriya de la naris.  Sumbul Aga koryo !

Los gritos en el Hamam aviyan vinido a los
oyidos del Sultan ke embiyo un eunuk para
entender lo ke se estava pasando.

Sumbul Aga teniya en sus brasos Roxelane
a mitad desnuda i keriya ke absolutamente
ke la yeve al lado de la Valide Sultan en el
momento mismo....  No tuvo remedyo
Sumbul Aga de los chiyos ke estava echando
Roxelane.  Embiyo a dizir a Daye ke venga
ande la Valide Sultan kon ropa para vistirla
i la tomo arriva en sus brasos i entro en los
kuartos de Hafsa Sultan !

*

Hafsa Sultan la arresivyo en sus brasos, la
izo echar ensima d'un doshek/ sofa bashetiko
ke se uzava para asentar i komo  kama.
La dolor estava muy fuerte, i al pareser se le
aviya rompido un dedo de la mano siedra i
el kovdo del mismo braso.  Daye yego koryendo
kon los vistidos i una djariye ke s'entendiya
de firyidas i de roturas.  Kuaji al mismo
instante entro el Sultan ande su madre i vido
todas las mujeres en panika i la una firyida
en el doshek... Ma !  Ke era esto !  Estava a
mitad desnuda i una servyenta estava koryendo
a eya kon una kuvyerta a este momento !
La kuvijaron i trataron de entender lo ke afito.
Al SUltan le aviya abastado este kuarto de
sekundo para ver la blankura i la ermozura
perfekta de un puerpo de ninya i de mujer
en mizmo tiempo.... Se aserko de su madre
ke se alesho de Roxelane immediatamente
para venir allado de su ijo.

-  Te saludo mi madre venerada !

-  Mos trayes alegriya mi ijo Sultan !

Soliman le bezo la mano i se la trusho a su frente.
Dospues le disho ke se topava en el Harem para
ver su ijo i jugar un poko kon el kuando aviya
oyido los chiyos i aviya embiyado un eunuk para
saver lo ke se estava pasando.  El preto aviya
tornado dizyendole ke no era koza importante i
ke era una djariye ke se aviya kayido en el hamam.
Kuando le aviya demandado ken era, le aviya
dicho ke es una ke se yama Roxelane i es una
flor kon munchas espinas !

Soleiman se aviya akodrado del diya ke la aviya
konosido en los kuartos de su madre, i kuando
la kijo ver, le disheron kek estava kon Daye
en los kuartos de la Valide Sultan.   Demando por
eya e se dirijo a su lado...  Roxelane pishin se
tapo la kara kon su mano kitando su braso i
su ombro desnudo de la kuvyerta.

-  Roxelane, deke te tapas la kara otra vez
delantre de mi ?  Komo te sientes ?  Tienes
muncha dolor ?

-  Si !  Me kero tapar para ke no veygash mi
kara feya agora, dospues de este aksidente !
Vuestros ojos son para mirar solo a las kozas
ermozas !

Todos se metyeron a soriyir i el Sultan tambien.

-  Ken te ambezo a avlarme ansina ?

i mostrando a Daye le disho  :

-  Esta ?

-  No muestro Sinyor !  Daye no tiene la kulpa
de nada.... So yo ke no se avlar !  I ni me esto
puedyendo abokar delantre de vuestra alta
prezensya.  Pardonadme Sinyor de kavzar sin
kererlo todo este bruido i deranjarvos, siendo
una esklava sin dinguna valor, solo rogando
por vuestra felisitad !

-  Tu avla es dulse Roxelane, komo tu boz ke oyi
i kijyera oyir mas..  Ma entyendo ke estas en
pena, te embiyare mi kurador para ke te agas
buena presto i ke tengas ganas de kantarme
otra vez !

i se torno tomando el braso de su madre para
yevarla al otro kuarto ande amavan asentarsen
enjuntos  i bever sherbetes de roza.

*


Daye pishin koryo allado de Roxelane i empeso
a avlarle a la oreja  :

-  Roxelane, mi alma, sos gozde !  El Sultan te
honoro komo no honoro dinguna fina oy ! 
Arresivites todos los sinyos en d'una !  Vino a
tu lado, te avlo, te komplimento, te kere ver otra
vez i te va embiyar su kurador !!!  Es inkreyivle !

-  No !  Solo kere oyir mi boz... Le plaze muzika.

-  No ! No!  Le plazites !  Lo vide en sus ojos !
No sos solo Gozde, vas a ser una grande Sultan !
Komo supites avlarle ansina !  Oh Roxelane !
Ganates lo todo !

i la estava bezando i abrasando...  Roxelane,
entre si,  saviya ke Daye teniya razon !  La primera
partida estava ganada grasyas a los mezes i mezes
de lavoro kon Canfeda... Aviyan estudyado kada
jesto i kada palavra i kada mirada i kada soriza...
Ma lo ermozo en todo esto es ke no aviya pensado
del todo en kualo azer i kualo dizir...  Todo le
aviya vinido de aryento..   Eran sus biervos, sus
sentimientos delantre de el !  Kon esto...No kaliya
ke se olvide ke Gulbahar Sultan kon su ijo heredero
del trono era muy muy poderoza.

Los bruidos de esta kayida en el Hamam i todo lo
ke aviya siguido, inkluido la vinida del kurador del
Sultan a los kuartos de la Valide Sultan se estavan
propajando de mas en mas !   El hombre el mas
poderozo de este grande Emperyo aviya vinido al
lado de Roxelane, le aviya avlado i komplimentado,
la iva ver de muevo i le aviya embiyado su
proprio kurador !  

Todos estos bruidos ke Daye propajava kon
intensyones klaras de arreventar el selo de
Gulbahar Hatun, de darse importansya altisima
en el Harem no aviyan kedado sin rezultados
dezastrodos !  Era el solo sujeto de konversasyon
en el Harem... Las mujeres keriyan oyer mas i
mas i saver el mas chiko detalyo i Daye saviya
maraviyozamente brodar ! Le aziyan la honor
del Maschiah abashado de los Sielos !

Gulbahar Hatun estava dezesperada.... Yorando
noche i diya komo si le estavan kemando las
karnes estando biva !  El Sultan viendo su kerida
espoza en lagrimas le demando ke le dueliya :

-  Sos la flor de mi primavera Gulbahar i me duele
de verte tanto en pena, ni savyendo ke es el
motivo de tu grande tristessa....Dime ke tienes
i veremos si puedemos topar un remedyo a tus
lagrimas....

-  Mi Sultan adorado.... Ken ke yore si no yo !
Daye Kalfa esta kitando bruidos mintirozos en el
Harem kontando a todos ke no me amash mas i
ke Roxelane es vuestra mueva Gozde i ke la vesh
i la komplimentash.... Yo se ke todo esto no es
vedra i tienen malas linguas para kortar !  Esto
segura ke me adorado Sultan nunka se va interesar
a otras mujeres ma no puedo kontenirme i me selo,
me ago hazina solo a la ideya ke esto puede afitar !

La kara del Sultan se troko i se puediya ver
klaramente su ravya...

-  Basta Gulbahar Hatun !  Sos muestro primer
amor i madre de muestro Shehzade !  Komo te
arrebashas al rango de una mujer seloza komo
una djariye mueva vinida !  No so yo el Sultan
i no es muestro diritto  de azer lo ke keremos
i tomar la mujer ke dezeamos en muestro proprio
Harem ?  De kuando aki se tiene visto una mujer
ke demanda kuentos al hombre i ke se meskla de
la vida del Sultan ?

Oriyamos preferido no oyer tus lamentasyones.
Basta i demasyado por oy !

..... I se aviya ido !  Aviya salido de su kamareta
sin bezarla i sin otra palavra i sin mizmo demandar
a ver su ijo !  Ademas aviya uzado, si no siempre
ma lo mas, la forma ofisyal de la primera persona
del plural !  El privilejyo del Padishah i de la
Valide Sultan solamente....

A este instante Gulbahar aviya entendido ke
todas las dezgrasyas ke aviyan vinido a sus oyidos
eran vedra :  Estava enfrente de una poderoza rivala,
Roxelane, una ninya de 15 anyos !  Nunka aviya
visto su kerido Sultan, tan dulse kon eya, arravyado
i furyozo de esta manera !  Duro i ajeno !  Gulbahar
kito sus inyervos de sus dezmazaladas servientas..
Su furya fue dezgrasyada !  Rompyo, arazgo, grito,
aharvo, se echo de embasho embasho... Komo si
se aviya enlokesida !

Los diyas estavan pasando i todos estavan
asperando ke Roxelane se aga buena para ver
komo las kozas se ivan a developar.  El Sultan
estava tomando novitades de eya por Sumbul
Aga ke no mankava de vinir ande eya i dizirle
kon soriza ke el Sultan aviya demandando komo
se sintiya.  Roxelane no mostrava dingun
sentimyento i siempre arrespondiya ke no estava
puedyendo ni vistirse pormodo de su braso i ke
teniya muncha dolor. Un diya le disho a Sumbul
Aga ke era Gulbahar Hatun ke kavzo su enfirmidad
kon un traspie ke kavzo su kayida ensima de la
laja mojada en el Hamam. Se aviya ido a su lado
para demandar komo estava el Shehzade porke
se eskarinyava de el...  Se aviya auzado a el porke
le kontava historyikas ke le plaziyan muncho i se
keriyan muncho bien.... Ma su madre la aviya
arrondjado delantre de todas dizyendo ke era
una esklava servyenta i no teniya el derrito de
eskarinyarse del ijo del Sultan ! 

Sumbul Aga no era bovo i saviya perfektamente
para kualo Hurrem le aviya kontado esto  :  Keriya
ke se le vayga a los oyidos del Sultan !  Aviya
empesado la epoka de la mueva Gozde i kaliya
nadar kon el koryente.  De toda manera nunka
le aviya plazido la futura Valide Sultan !  De
dinguna manera no teniya las kualitades de
Roxelane, muy intelijente, edukada i kon muncha
astusya.... Gulbahar puediya ser muy ermoza
ma no teniya nada aparte de esta ermozura i
no puedriya enteresar el Sultan por un tiempo
largo !  Ya aviya desidado de muncho tiempo antes
de kollaborar kon esta flor kon veneno !  Iva
kontinuar i entrar en sus favores.  Teniya todo
de ganar i nada de piedrer.... 

*

Gulbahar se anonso una demanyana ande la
Valide Sultan.  Estava en lagrimas i aunflada
entera... Le konto todo lo ke oyo ma no puediya
akuzarla de meter Roxelane en los brasos de su
ijo !  Esto seriya kayer de grasyas i pedrer todo.
Le arrogo de dizirle a su ijo ke estava arrepintida
i lo asperava kon adorasyon...  Hafsa Sultan era
blanda porke saviya lo ke una mujer puediya
sufrir en estos kavzos.  No le aviya kostado pokas
lagrimas kuando el Sultan Selim se divertiya kon
sus djariyes i se namorava kada poko de alguna !
MA se aviya detenido i siempre aviya supido
komportarse kon dinyitad asigun su rango de
primera mujer !  Le disho a Gulbahar ke iva
peryer absolutamente todo si kontinuava a
komportarse kon tanta estupides !  Dinguna mujer
no puediya pretender a ser la unika flor en la
guerta de un hombre.  Esto no era posivle ni
sosyalmente ni egzistiya en la natura.  Di-o no
aviya kriyado el hombre para una sola mujer.
Le aviya dado munchas para ke el mundo se yenne
kon humanos.  El kristianismo ke ovligava de
tomar una sola mujer, por seguro ke estava en
el yerro.  Al pareser no era una relijyon realista
i kavzava kon sus komendamientos striktos de
kayer en el pekado por una koza tan absurda !
El hombre i la mujer por seguro ke eran diferentes
en todo.  La mujer era el polvo del sapato de su
marido i teniya valor solo kon las kreaturas ke
le pariya...  Eya seriya la korona del Harem i
de su ijo solo kon tiempo a la hora buena kuando
su inyeto iva asuvir al trono del Emperyo i ser
un grande Padishah komo su padre.

Gulbahar no estava puedyendo kontenir su
dezespero i estas palavras de grande hohma no
la estavan puedyendo ayudar....  Hafsa Sultan
no saviya mas komo trankilizar esta mujer sin
dinguna dinyitad i sin dinguna intelijensya...
Gulbahar estava firmando su peryita kon un
komportamiente asemejante !

(a kontinuar kon Sharope)

- Copyright © sefarad.org - 1997 - 2018

Retour au site sefarad.org -