Accueil - sefarad.org

Almendra...parte 33

    MENU    

SEFARAD.org
ESKRITOS de savor
RESHETAS
AIDEZ-nous
Page PRECEDENTE;

Parte   33
 
 
Sultan Soleiman estava jugando kon el Shehzade
Mustafa, su ijo ke a sus siete anyos estava ensistyendo
para ir kon el a pasear kon el kavayo ke viniyan de
regalarle.. Le estava kontando los progresos ke aviya
echo kon su lala ( el pasha en karga de su edukasyon )
i komo todos lo alavavan kuando galopava kon  "TUY"
(pluma), el nombre ke le aviya dado a su kavayo, entero
blanko, sin dinguna mancha, komo el de su padre !
Soleiman lo oyiya kon admirasyon por lo vayente ke
viya su ijo.  Akeya demanyana afito una koza inesperada.
Estavan Gulbahar Sultan, el monarko i su ijo jugando
komo el keriya, kuando supito el chiko le disho  :
 
-  Ke me la traygan a Roxelane para ke mos konte las
aventuras del lovo de los stepes...   Kero ke oygash
k'ermozo son estas historyas !...
 
-  Esta okupada mi kerido, dospues si ?
 
-  No agora !  Ke venga !
 
-  Son los orden del Shehzade Gulbahar Hatun !
Mandala a yamar !
 
-  Lo dishites mi amado Sultan.  Agora mizmo mando
una serviente para ke venga.
 
Poko tiempo dospues Roxelane estava kon eyos,
abokada en un profundo respekto.  La aviyan kitado
del Hamam i se aviya vistido muy presto !  Sus
abundantes kaveyos estavan mojados i los aviya
tapado kon un trapo ke eya mizma aviya brodado
kon kolores lila i mov komo todo lo ke aziya.
 
-  Veygo ke mi ijo se namora de ti Roxelane.  Te
reklama mizmo kuando esta jugando kon  mi !  Ke
tienes de kontarle oy ?
 
-  Le plaze al Shehzade los kuentos ke me kontavan
a mi kuando yo mizma era chika, Poderozo Sultan.
 
-  Kontamos alora.  Te oyeremos Gulbahar Sultan
i yo tambien.
 
-  Son vuestros ordenes ensima de mi kavesa.
 
Mustafa se asento abasho allado de las piernas de
Roxelane i todos empesaron a oyir lo ke les
kontava esta boz melodioza a vezes anksiada, a
vezes alegre, a vezes espantoza, a vezes dulse
asigun los evenimientos  de la historia ke kontava.
Mustafa tambien a vezes se riiya, a vezes lo viyan
triste o alegre kon lo ke oyiya.
 
-  Entyendo agora deke mi ijo te reklama Roxelane.
Sos una kontadora de historyas maraviyoza.
 
Gulbahar kito de su pecho una bolsika de liras i la
echo en basho para ke lo arekojga Roxelane.
Era la mijor manera de arrebasharla al lado del Sultan.
 
-  Toma !  El Shehzade esta kontente de ti.  Agora
torna a tu lugar.  Te yamaremos si te kere oyir mas !
 
-  Dize a tus servientas ke te den la bolsa ke echates
abasho Gulbahar Hatun.  Roxelane es una djariye de
mi Harem i no una servienta o una kontadera de
historyas ke vende sus servisyos.  Le konta historyas
a Mustafa porke lo kere bien i no porke es ovligada.
Gulbahar Hatun !  Devo tornar agora.  Entrega
Roxelane al Kizlar Agasi i dizele ke me la apareje
por esta noche !
 
Roxelane se aboko fina embasho, el Sultan salyo
afuera i es alora ke Gulbahar peryo su kontrol i se
echo ensima de Roxelane, arreskunyandola, gritando
 
-  Malditta gata de las kayas !  Komo kreyites ke
puediyas arovarme el padre de mi ijo !  Nunka te
lo deshare por ti....me entyendes ?  Nunka ! Te
matare de mis manos i te echare de las murayas
abasho, malditta, malditta !
 
Los esklavos pishin koryeron a yamar el Kizlar Agasi
porke saviyan ke Gulbahar se estava aparejando a
matar Roxelane.  Sumbul vino koryendo.  Roxelane
estava en sangre, Mustafa estava gritando...

Gulbahar estava avlando de manera inkoherante i
su selo i lo ke se aviya pasado delantre de sus ojos
la aviyan enlokesida !  El Kizlar Agasi embiyo el
Shehzade a sus kuartos kon sus Kalfas, la travo a
Roxelane de aya i desho Gulbahar en una kriza de
histerya inkontrolavle.
 
Roxelane estava yorando i dizyendole ke refuzava
de irse a la tadre al lado del Sultan !  Dezmazalado
de Sumbul se disho ke era el diya dalkavo de su
vida !   La desho a Roxelane allado de Daye i koryo
ande la Valide Sultan.
 
Hafsa Sultan se estava riyendo delantre de Sumbul
Aga ke se estava chaftando las karas, dezesperado
de lo ke estava afitando en el Harem.
 
-  Esta bien Sumbul Aga !  Si no se kere ir no se va !
Es su desizyon i es a mi ijo de dizir el d'alkavo
biervo !  Es el ke va ver lo ke ay de azer en este kavzo !
No se puede entremeter entre el Destino de alguno
i esta persona...  El Di-o es grande i Su voluntad se
akumplira... Vate i no penses mas... Desha todo
entre las manos del Destino.
 
Sumbul aga se aboko i salyo,  i koryendo se fue ande
Roxelane... Empeso a arrogarla para ke lo deshe
prepararla i vistirla.  Roxelane estava aunflada de
yorar.
 
-  El Sultan no puede verme ansina feya komo esto !
No lo puedo kastigar kon una mujer feya esta noche.
No es su kulpa ! Trayele una otra ermoza del Harem !
 
Las horas estavan pasando i dingunos no estavan
puedyendo konvenser Roxelane a prepararse por el
Sultan.  Estava desidada de no ir i punto !
 
Kuando el tiempo vino Sumbul, tremblando, se echo
a los pies del Sultan  :
 
-  Sultan de los Sultanes.... Vuestra djariye Roxelane
Hatun se refuza a vozotros.  No viene kon su dezeyo.
 
-  Ke dizes !  Peryites la razon ?
 
-  Mi kavesa te apartenese Sinyor..  Ke me la korten
i ke terminen mis desgrasyas...
 
-  Avla antes ke yo mizmo te tome la vida !
 
-  Dize ke no puede salir delantre de vuestros ojos
feya komo esta i ke kale ke vos trayga una ermoza
del Harem !
 
-  No es a eya de juzgar si es feya o ermoza !
No le dishites ke es su dover de vinir kuando la yamo ?
 
-  No la puide konvenser kon nada Sinyor ! Deviya
de arrastarla por esto !  Pensi ke seriya justo de
azervos parte de su refuzo !
 
-  Veremos ke es esto !
 
Salyo de sus kuartos kon Sumbul mas muerto ke bivo
detras de el..  Entraron en el Harem.  El Sultan teniya
su kara de los diyas antes ke salga a los kombatos kon
los enimigos del Emperyo !
 
Roxelane estava echada, su kara a la pared.
 
-  Tu me refuzates...  Yo vine ande ti Roxelane Hatun !
Boltate !
 
-  No lo puedo Sinyor !  Matame...  So tuya !  No te
puedo amostrar mi kara tan feya !
 
-  Ke tiene tu kara ?
 
... i la bolto kon fuersa para ver su kara yenna de
arreskunyos i sangre !
 
-  Ken izo esto ?
 
-  .......
 
-  Ken te izo esto ?!!  Arrespondeme !
 
-  Es Gulbahar Sultan.  Sinyor !  Roxelane no keriya
dizirtelo porke es la bendicha madre del Shehzade
Mustafa.  Es eya tambien ke la arronjo en el Hamam
kuando se le aviya rompido el braso i...
 
-  No, no !  No la kastiges Sinyor !  Kastigame a mi,
tu djariye ke no tiene razon de bivir dospues ke te
inyervo tanto !  Eya es tu mujer, la madre del futuro
Sultan del trono emperyal !  No puedo ser ni el polvo
de su pantufla !    Ke importansya tengo yo allado
del poderozo Sultan de este Emperyo ?  No tengo
alma Sinyor.  Trespiza mi kavesa i muerere por ti
de tu parte !
 
-  Di-o miyo !  Komo te izo esto !  Komo puido
tokarte dospues ke dishe ke te kero esta noche !
No es a ti ma es a mi ke alevanto su mano !
Arepozate esta noche.  Ke venga mi kurador i
te meta balmas en tus firyidas i no va kedar
nada en poko !.... Te vere amanyana ande mi
madre Roxelane !  Daye !  Embiya las servientas
para ke digan a los eunukes de yamar mi kurador
agora mizmo !
 
-  Son vuestros ordenes Sus Majestades !
 
-  Ven kon mi Sumbul Aga !

-  So vuestra solombra Sultan Poderozo......

El Sultan paso el Harem indose direktamente
a los apartementos de la Haseki Sultan.

Los gritos de Gulbahar se estavan oyendo de
todos los kantones i las mujeres estavan avriyendo
sus puertas para entender lo ke se estava pasando.
Kuanda viyan pasar el Sultan se abokavan i entravan
presto a sus kamaretas.
 
Sumbul Aga koryo mas presto para avrirle la puerta.
Gulbahar se echo ensima d'el kuando entro !
 
-  Preto del diavlo !  Vinites a ver komo esto !..
Sal de aki agora pishin si....
 
-  Basta Gulbahar !
 
-  Mi Sultan adorado !
 
-  Ke son estos gritos de loka ke se siente de todos
los lugares del Harem ?
 
-  No era yo !
 
-  Te oyi !  I dizeme komo es ke enkuentro Roxelane
agora mizmo i esta entera areskunyada i aharvada ?
 
-  Es eya mizma ke se areskunyo para echarme la
kulpa i disgrasyarme a vuestros ojos !
 
-  Basta !  No supites mantener tu rango de Reyna i
madre del "veliaht"  (heredero del trono).  Sos un
negro egzemplo para el Harem ande Sumbul Aga
se esfuersa de mantener el orden !  Muestra
desizyon es ke amanyana mizmo, akompanyada
de vuestro ijo i de vuestras esklavas i servientas
vos metash en kamino para  AMASYA ande el
Shehzade se va ambezar a dirijar el payis kon su
Lala i sus otros instruktores.  No kero sintir avlar
de vozotros otra vez !  Vo resivir del Lala de mi
ijo, ke tendra su entera responsabilitad, komo se
esta engrandesyendo i ke progresos aze.  Es la
dalkavo vez ke vos avlo i vos veygo i espero ke
al futuro no tendre ke tomar desizyones muncho
mas duras mizmo si sosh la madre del Veliaht !
En alevantado las manos sovre esta chika innosente
las alevantatesh sovre mi porke vinitesh kontra mi
desizyon de azerla muestra mueva gozde !  No
serash pardonada i devesh vuestra vida a la
egzistensya del Shehzade.  Para ke lo sepash solo,
Roxelane nunka avlo un biervo kontra vozotros o
se kesho de kualker koza.  Al kontraryo trato de
toda su fuersa de ser kastigada a vuestro lugar !
Ke sepash ke kada biervo ke dirash de agora en
delentre me dara solo ganas de eliminar vuestra
prezensya  de este mundo !  A rodiyas i abokada
delantre de mozotros a partir de este momento !
Retiro todos vuestros privilejios ma serash
nombrada Haseki Sultan por honor de muestro ijo.
 
Gulbahar se aboko i kayo sovre sus dizes (genoux).
Toda su ravya i su orgulyo aviyan dezaparesido...
Saviya ke si tratava de avlar, ademas mintiras,
el Sultan no iva hesitar a yamar los mudos para
ke la aogen ayi mizmo !  Se kayo i no disho mas
biervo.
 
El Sultan alora se torno a Sumbul Aga i le disho  :
 
-  Oyites mis biervos Sumbul Aga !  Vas a estar
prezente fina el dalkavo momento ke Gulbahar
Hatun se va preparar i ir del Palasyo amanyana
mizmo.  Ay bastante personas aki para pueder
aparejar su ida mizmo esta noche  !  Ke aparejen
las arabas i los kavayos i el eskort de la armada
para akompanyar el Shehzade a Amasya i ke no
oyge mas eskandalos asemejantes en el kalmo
de mi Harem !
 
-  Lo dishitesh i son vos ordenes sovre mi kavesa
Sultan poderozo !
 
 
*
El bruido de la Haseki repudiada se incho fina los
mas oskures kantones del Saray.  La gente no
puedyeron durmir akeya noche.  Todos estavan
avlando de lo ke afito.  Canfeda i Daye estavan
al lado de Roxelane.  Le estava dolyendo el
puerpo entero de los punyos i de las puntas de
pie ke aviya resivido de Gulbahar Hatun, loka
del selo kuando el Sultan la envito a pasar la
noche kon el...La estavan kudyando kon kompresas
de agua de roza i de vinagre.  El kurador aviya
vinido i aviya deshado balmos para las areskunyas
de la kara i los vedrugos del puerpo.  Las djariyes
estavan vinyendo para abrasarla, augurandole ke
se remete lo mas presto posivle.  Todas saviyan
ke era la mueva gozde del Sultan. mizmo si
dayinda no le aviya dado su nombre i no aviya
pasado la noche kon el..
 
El Sultan estava kaminando en sus kuartos komo
un tigre enserrado !  Komo su dulse Mahidevran
Gulbahar aviya puido kometer una desgrasya
asemejante ?  La keriya aogar kon sus proprias
manos !  Teniya muncho mazal de ser la madre
de su ijo !  La ermoza karika de Roxelane estava
yenna de firyidas, de areskunyos i esto no se le
estava indo de delantre de sus ojos !  La keriya
tomar entre sus brasos, karesarla i bezarla, tenerla
kontra su korason komo akeya noche tan inkreyivle. 
Se konsentiya enamorado komo un mansevo de
vente anyos.  Lo izo yamar a su kurador i le demando
komo la topo a Roxelane i ke pensava de las firyidas. 
El kurador le arespondyo ke no eran muy profundas i
se ivan a kurar enteramente kon tiempo.  Las balmas
ivan ayudar a sikatrizar las trasas de las unyas i kalmar
la dolor.  Soleiman keriya espedasar la mujer ke aviya
tan amado kuando era muy mansevo !
 
No puido durmir del todo i la demanyana, dospues
de asistir a los debatos del Kubbe Alti, se fue al
lado de su madre.  Se aviya echo tadre i penso ke
Roxelane ya seriya aya.  El korason le estava batyendo !

(a kontinuar kon Sharope)
 

- Copyright © sefarad.org - 1997 - 2017

Retour au site sefarad.org -