Accueil - sefarad.org

Almendra...parte 34

    MENU    

SEFARAD.org
ESKRITOS de savor
RESHETAS
AIDEZ-nous
Page PRECEDENTE;

Parte  34


Dospues de bezar la mano de su madre i resivir sus
bendisyones, le konto los detalyos de lo ke se paso
la tadre.  Hafsa Sultan nunka aviya visto su ijo tan
eksitado, tan arravyado, tan yenno de sentimentos,
i por dizir la vedra, tan enamorado !

Entre si-mizma estava kontente ke Gulbahar estava
solamente repudiada i no kastigada de manera
barbara, lo ke no mankava en el Harem tambien.
Era la madre de su inyeto i le disho a su ijo ke
Mustafa le iva mankar muncho !  No avlo del todo
de su ernuera, ni en bueno i ni en negro.  Esto
deviya de kedar entre el Sultan i su primera Haseki.
Saviya ke Soleiman era un hombre justo i no ariya
enjustisyas a kualkera persona ke seya.

Estavan komyendo madre i ijo enjuntos kuando la
servienta les anonso ke el Kizlar Agasi estava
asperando sus ordenes.

-  Ke entre !

disho el Sultan.

Ni Sumbul Aga aviya durmido de la noche !  Su
kanserya se viya en su kara i su tristesa sinsera
tambien.  Dospues de las temennas, ke son los jestos
tradisyonales del saludo Otomano, i buenos augures,
se aboko a bezar la cubbe  (vistido de hombre otomano)
del Sultan i le disho  :

-  Ke el Di-o te ayege a abrasar tu ijo Veliaht en serka.
Muestro chiko sinyor esta en kamino por AMASYA kon su
madre i todos los ke son attados a sus servisyos.  La
Haseki Sultan se preparo kalmamente i la entregi al
eskort de los janisserios ke los van a protejar en kamino
i vana kedar en Amasya kon el Veliaht enjuntos.  Kiti
un mesajero en kamino ayer la noche ke va arrivar al
palasyo de Amasya muncho antes de la yegada del
Shehzade.  Le embiyi una letra al Bey de Amasya para
ke arresiva el Shehzade en kamino i kede a sus ordenes
debasho la supervizyon de su Lala.

-  Esta bien Sumbul Aga.  Izites todo lo ke kaliya azer.
Agora kero ke me traygas novitades de Roxelane.  Komo
paso la nochada i deke no lo veygo aki, malgrado ke le
dishe ke mos veremos ande la Valide Sultan esta
demanyana.

-  Son vuestros ordenes Sultan poderozo.  Vos trayere
novitades de vuestra Gozde.

Era la primera vez ke Roxelane estava ofisyalmente
nombrada "Gozde".  Sumbul Aga saviya ke esto le iva
plazer al Sultan i lo aviya dicho en esta entisyon.  La
vedra es ke Roxelane ya era la gozde del Sultan de
muncho tiempo antes formalmente ma no ofisyalmente.

-  Sumbul Aga, ke los kuartos ande estava enstalada
Gulbahar Hatun seyan dekoradas de muevo para
muestra mueva gozde.

-  Ya di los ordenes para esto mi Sinyor.  Se esta
lavorando aya agora i todo se esta trokando.

-  Muy bien.

Roxelane estava hazina.  Los areskunyos se le
aviyan enfektado i teniya muncha fievre.  El kurador
la estava vizitando kada diya i estava azyendo su
posivle para abashar esta fievre i kurarla.  Entretiempo
la aviyan pasado a sus muevos kuartos i le aviyan
dado servientes i eunukes a su servisyo.  Daye i
Canfeda siempre a su lado se aviyan ofisyalmente
ajuntado a su servisyo.  Teniya privilejyos ke dinguna
gozde no aviya tenido fina akel diya.  El Sultan viniya
a vijitarla kada diya i pasavan horas enteras enjuntos. 
Les plaziya kedar abrasados, kontarsen sus memoryas
i jugar komo kreaturas en los kuartos de Roxelane.

Soleiman estava en ekstazya delantre de esta
chikitika ke se aviya ambezado historya, geografika,
politika, latino i Otomano.... Avlavan de los echos
del Emperyo i Soleiman veiya ke era una eleva
perfekta de su madre i ke puediya dar konsejos no
mankos valutozos.  Se sorprendiya, el diya dospues,
de avlar de su boka en el Kubbe Alti, ande todos
los vezires kedavan la boka avyerta i alavavan este
hombre sin egual en el mundo !  Era un monarko
amado i respektado de todos.

El amor platoniko de su ijo kon Roxelane no aviya
fuyido del ojo de Hafsa Sultan extremamente
sorprendida de este estado de kozas !  Roxelane
i el Sultan viniyan las demanyanadas tadre ande
eya.  Los tres tomavan muncho plazer de estas
reuniones i Roxelane adorava kantarles, ademas
kuando i eyos se ajuntavan a eya i solo las
balalaykas les mankavan ! 

El Kizlar Agasi no estava tambyen entendyendo
este amor kayido de los sielos i sin ke este todo
poderozo SUltan no le ordone de prepararla para
pasar la noche kon el !  Todas las kostumbres se
estavan trespizando i se estava demandando komo
sera la fiin de esto todo... Si no lo konosiya, iva
dizir ke no le plaze mujeres !  O.... Sera ke kuando
estavan solos se aserkavan ?  No lo saviya i Daye
no kontava nada.

Avagar avagar la kara de Roxelane se estava
kurando.  Dayinda yorava por ser feya ma el
Sultan le diziya ke se aviya akostumbrado a su
feyor para inyervarla, porke adorava kuando
Roxelane le diziya kon su aksento komiko  :

-  Soleiman Sultan, tu djariye te va egzasperar
i seras ovligado de repudiyarla i esto sera tu
kastigo porke vas a kedar sin eya !

-  Mis ojos riendo !  De ande te viene estas kozas
a tu kavesika !  Oh !.... Topi tu nombre !... Seras
Hurrem de agora en delantre !  Hurrem ke kere dizir
kara de riza, ojos riendo, la ke da alegriya !

-  Hurrem Hurrem Hurrem....  So Hurrem !

-  Si , si mi miel... No ay nombre mas deskriptivo
de lo ke sos.  Hurrem.... Kuando me vas a kerer
la noche entera a tu lado ?  No te plazgo ?  No
me keres bien ?

-  Sultan de mi korason, mi vida es tuya.... Komo
puedes avlar ansina ?

-  So loko !  Kero ke me amas i no ke vengas a mi
porke sos ovligada komo una esklava... No kero tu
vida ma el batimiento de tu korason kuando te tomo
en mis brasos....

-  Komo puedesh pensar ke no vos amo des del primer
diya ke vos vide...  No lo sintish ?  So tan yelada i
tan distante kon vozotros ?

-  No... Ma lo kero sintir de ti !  A tu lado peryo mi
sekuritad, me ago un ijiko de tu edad, te kero plazer,
kero ke me dezeyas komo te dezeyo !  Ke vengas
porke me keres komo te kero yo a ti !

La repuesta de Roxelane fue un largo bezo de amor
kon toda su kandor, tremblando entera kontra el...
Sus primero bezo ke emborracho Soleiman...

-  Esta noche.... No puedo mas !  Esta noche seras
miya...

-  Siempre fui tuya, i esta noche.... I fina la fin de
mi vida !

-  Hurrem, mi amor !

 

El Harem se aviya transformado en una grande
kaza de boda..  Dulsuryas, frutas i sherbetes,
frituryas i kodreros asados aviyan aparesido, komo
si una bageta majika se estava boltando en el
ayre i pasando por todas las vandas !  Un kortej
de ijikas la aviyan tomado a Roxelane de sus
kuartos para yevarla kon kantikas, tanyadoras i
bayladeras al Hamam.  Daye i Canfeda estavan
koryendo d'ariva a basho i le estavan trayendo
los mijores vistidos, nesesaryo de Hamam, joyas,
perfumes i pantuflas lavoradas kon perlas.

Su karika de porselena se aviya kurado i las
firyidas aviyan kaji dezaparesido.  Una profunda
felisitad la estava envelopando entera... En
unas kuantas horas iva ser kon su amado, en sus
brasos i nada mas kontava !  Se estava deshando
arregalar, lavar, massar, fregar kon olios presyozos,
penyar sus kaveyos komo un volkano en erupsyon.
Era una masa de seda muy fina ke le kayiya fina
su talya.  Dingunos aviyan visto ansina d'ermozura
de kualitad i de kolor de kaveyos !

Dospues de la fiesta en el Hamam todas enjuntas
asuvyeron para vistirla i prepararla para su noche de
boda.  El Kizlar agasi disho ke era el mas importante
diya de su vida i estava distribuando liras de oro a
las amigitas de Roxelane.  Kuando fue pronta
Roxelane kijo ir ande la Valide Sultan para bezarle
la mano.  Esto no se uzava ma era su dezeyo !

Hafsa Sultan la abraso i le disho ke estava muy
ermoza !  Roxelane la reingrasyo por todo lo ke
le aviya dado i echo por eya.  Se estava komportando
komo una ernuera... Mas !  Komo una ija , i no komo
un djariye ke deviya servir akeya noche el Sultan !
Esto no fuyo de los ojos de la Valide Sultan !

-  Mi ijika, konosko tus sentimientos i los
sentimientos de mi ijo por ti.  Kale ke sepas ke para
azer durar vuestra felisitad te kaye a ti de ser muy
madura i kon muncha intelijensya.  Nunka te
komportes komo se komporto Gulbahar ke peryo
todo !  No te olvides ke avra siempre otras en la
vida de tu amado ma si saves guadrar su amor por
ti, el te va vinir mas enamorado kada vez i seras
la unika en su korason !

-  Siempre sigire tus konsejos madre venerada !
No me olvidare fina la fin de mis diyas ke so nada
mas ke una djariye del Harem de este palasyo ,
porke ken pensa diferamente se yerra i avre
las puertas del dezespero i de la soledad.  Espero
ke puedre dar ijos al Sultan i inyetos para vozotros
para pasar mi tiempo en sus kompanyiyas kuando
el Sultan se va enfasyar de mi.

-  Sos muy intelijente Roxelane !  Dingunas puedran
mezurarsen a ti !  Vate a la hora buena mi ijika,
kon mis bendisyones i mis mijores augures de felisitad.

Roxelane se echo a sus pies i le bezo el fostan i
dospues la mano otra vez.

Estava pronta...  Sumbul Aga la tomo de los kuartos
de la Valide Sultan para pasar enjuntos  el "kamino
de la felisitad"  a la fin del kual la estava asperando
Inciser Kethuda.  Roxelane se aboko i le bezo la mano.

-  Hurrem !  Damos kreaturas para alegrar este Saray !
Tienes mis bendisyones !

-  Grasyas Madre de Leche !  Yo mizma te vo entregar
las kreaturas del Sultan ensima de tus piernas para
ke los engrandeskas de la manera ke engrandesites
el Sultan de mi korason...

-  Entra !  No lo agas asperar mas !


*

Roxelane en entrando se echo a los pies del Sultan
i le bezo la cuppe komo era el uzo.  Teniya los ojos
abokados i su kara tapada.  Kedo ansina sin dizir
biervo komo se lo aviyan ambezado.  No iva trokar
las tradisyones i keriya darle la impresyon ke no era
del todo segura de eya mizma i del amor del Sultan
para eya.

El Sultan le avriyo la kara i la bezo en la frente...

-  Ke ermoza ke estas Hurrem !  Ven a mi lado.
Ay mezes ke aspero este diya..

Hurrem estava soriyendo i dandole chikos bezikos
en su kara.  Aviya vinido la hora de uzar avagar
avagar todo lo ke se aviya ambezado kon Canfeda..
No !  No agora !  Kon tiempo !  Agora su amado se
estava konsumyendo de amor por eya de toda
manera...  Los iva kitar de su bolsa en el futuro !
Uno a uno.... Eran sus armas de mujer !  Oy deviya
ser eya mizma i gozar de esta noche de amor ke
se iva gravar en su tino fina la fin de sus diyas.

Es el Sultan ke la dezvistyo antes de travarla a el
ensima del immenso lecho yenno de kavesales i
almadas de seda.  El suelo estava kuvyerto de
samaras de bestias ke el Sultan mizmo aviya
abatido en varyos sityos seya en Anatolia i seya
en Konstantiniye.

Hurrem se desho relaxar i tomar plazer de los bezos
i de las karesyas del Sultan.  Estava tremblando de
felisitad.  Se olvido ken era, ken era el hombre ke
la amava, ande estavan, serro sus ojos i desho
sus instinktos liberos de toda limitasyon de la
voluntad.  Un momento sintyo una intensa dolor
kuando Soleiman la estava bezando
apasyonadamente murmurando "Mi Hurrem,
mi anjelo, Hurrem miya..."

*

Kedaron durmiendos en los brasos el uno del otro
fina ke Hurrem se espertyo muy tadre a la
demanyana.  Se akodro de la noche i kareso el lecho
vaziyo de la prezensya del Sultan... Se akodro ke
teniya de arresivir la delegasyon vinida de las
frontieras del Nord-Este del Emperyo.  Soriyo ! 
Al lado de su kavesal topo una bolsika.  La tomo i
se la metyo ensima de su korason.  Era el primer
regalo de su amado i no era importante lo ke aviya
aryento....

Inciser Kethuda i el Kizlar Agasi entraron enjuntos
al kuarto, soriyendo i kon buenos augures para un
buen diya...   Hurrem los abraso i le disheron ke el
Sultan le desho saludos i iva ser ande eya kuando
iva eskapar sus echos !  Arrekojaron kon venerasyon
(!)  la savana de manera tradisyonal i la entregaron
en los brasos de un chiko eunuk ke los sigyo fina
los kuartos de la Gozde.  Todas la estavan
asperando para ver el regalo del Sultan.  Kedaron la
boka avyerta kuando Hurrem kito de su pecho la
bolsiko i vieron las manyifikas esmeraldas...
Un kolye, eskulkarichas, una maniya i el aniyo...
Las piedras estavan de una ermozura inkreyivle !
Un trezoro de este kalibro no se teniya dado a
dinguna mujer en el Harem fina este diya.  Se avlo
diyas i diyas del regalo del Sultan i de sus amores
kon Hurrem...

( a kontinuar kon Sharope )

- Copyright © sefarad.org - 1997 - 2017

Retour au site sefarad.org -