Accueil - sefarad.org

Almendra...parte 38

    MENU    

SEFARAD.org
ESKRITOS de savor
RESHETAS
AIDEZ-nous
Page PRECEDENTE;

Parte   38
 
 
 
Paso kuaji un mez kuando un diya ke el Sultan estava
avlando de los dalkavos aparejos de la guerra a la
kuala ivan a salir, vido el desrepozo de Rustem Pasha
sudando i mostrando sinyos de mal-estar ...
 
-  Te sientes hazino Rustem ?
 
-  No Sinyor, un poko preokupado antes de salir en
kamino parese.
 
-  No sos hombre de espantarte de kombatir !
 
-  No Sinyor no son las batalyas ke me preokupan.
 
-  Ke tienes en tu boka ?  Avla agora !
 
-  Me da muncha pena lo koe tendre de dizirvos i
mostrarvos...
 
-  T yegaron novitades de Amasya ?
 
-  Si mi Sultan poderozo.
 
-  Ke es ?
 
-  Lo ke oyimos no son solo rumores ma avlas
fundadas i vengo de resivir una prueva desgrasyada
en mis manos !
 
-  Mostrame lo ke tienes
 
Rustem saviya l'immensitad de este delito.  Aviyan
eskrito i sellado una letra endjuntos kon Hurrem
Sultan.  El kontenido iva kostar la kavesa de un
grande Shehzade,  el mijor de todos los tiempos,
innosente, bueno, vayente, humano i djusto para
su famiya i su payis.  A este momento la historya
de un grande Emperyo se estava trokando i Rustem
sintiya la pezgor ensima de sus ombros.  Teniya
friyo i kalor en mizmo tiempo.  Sus manos estavan
tremblando i la kolor de su kara aviya dezaparesido.
Soleiman lo estava mirando kon los ojos de un hombre
ke viya la muerte delantre de sus ojos...
 
-  Rustem !
 
Su boz aviya salido komo el bruido de un kanon !
Rustem metyo la mano aryento de su kushak i
kito un rulo de kuero muy fino.  Se lo dyo al Sultan
ke lo avriya i empeso a meldar. La letra estava
adresada al komandante de las armadas Safevis.
 
 
" " "
Estimado komandante de los vayentes Safevis,
Vos eskrivo de Amasya a la kavesa de mis kuatro
mil janisaryos todos antrenados, fuertes i prontos
a dar sus vidas en muestro kamino.  So el Shehzade
Mustafa, el eredero del trono Ottomano.
Lo se ke mi padre esta pronto para vinir kontra
vozotros kon sus armadas i destruyirvos sin deshar
dingun bivo...  Vos konsejo de salir en kamino antes
de el para aunirvos kon mis trupas i endjuntos
puedremos derrotar su armada invensible.
 
Lo ago porke estimo ke mi padre no esta en fuersas
de dirijar el payis i pormodo de razones politikas. 
Vozotros i yo firmaremos un pakto de fraternitad
entre los Safevis i los Ottomanos i biveremos en paz
en el futuro... Mi gente  en Konstantiniye estan
prontos para arresivirme i assegurar mi asuvida al
trono de mis nonos.
 
Vos saludo i aspero vuestra repuesta kon impasensya.
Shehzade Mustafa ijo del Sultan Soleiman Khan
 
" " "
 
El Sultan meldo otra vez la letra porke la primera
vez sus ojos estavan solo indo i viniendo ensima
de los biervos sin pueder konsivir lo ke estava
meldando !  La kolor de su kara se le aviya trokado.
Sintyo un fuerte mareyo ke lo ovligo a asentarse.
Pishin yamaron el kurador ke le izo bever un sherbet
de limon..
 
-  Deshame solo Rustem.... Avlaremos dospues !
Solo esto fue lo ke le disho.  Rustem salyo de la
kamareta dospues de todos los rituales de respekto
i koryo ande Hurrem Sultan...
 
-  Madre venerada.... Vengo de allado del Sultan..
Fue.....Esta... Era muy....
 
-  Avla Rustem !  Ke afito ?
 
-  Meldo..... La letra.... Esta....
 
-  Ke tiyene  dizeme !
 
-  Hazino...
 
Hurrem ya estava afuera, koryendo komo una loka
para yegar un momento antes a las kamaretas del
Sultan.  Los eunukes delantre de la puerta no
supyeron ke azer.  No estava asperada i no se
puediya entrar aryento.  Ni mizmo la Haseki Sultan !
Hurrem arrepusho de todas sus fuersas el povre Eunuk
ke se kayo embasho i entro komo una tempesta en las
kamaretas del Sultan.  Estava entera chapetada, lo ke
la aziya mizmo mas ermoza, i de sus ojos saltavan
senteyas.
 
-  Hurrem tu  !
 
-  Sultan de mi korason, mi vida, mi sol !  Rustem me
disho ke te sintiyas mal !..  Komo puedo estar leshos
de ti dospues ke me disho esto ... No lo oyi.. Solo
korri para vinir aki.  Komo estas ?  Ke tienes ?
Ande esta el kurador este ?
 
-  Kalmate mi andjelo.  Ya paso. Esto mijor agora.
No era nada.  Tuve un mareyo solo !
 
-  Un mareyo !  Esto es nada ?  Ken kavzo esto ?
Ken te inyervo ?  Rustem ?  Lo vo matar de mis
proprias manos !
 
-  Hurrem trankila...Kije kedar solo i pensar ma
kon ti nada de esto es posivle !  No entyendo deke
Rustem se fue ande ti dospues de salir de aki !
Le dishe ke me deshara solo un poko !  Me sinti
muy kansado supito ..
 
-  Mi leon no se kansa mizmo de salir en guerra a
su edad !
 
-  Tienes razon.  El shok ke tuve fue muy fuerte.
 
-  El shok ?
 
-  Rustem me remetyo una letra ke Mustafa mando
al komandante de los Safevis.
 
-  Ke tiene el kon estos enemigos muestros ?  I si
mando la letra a este guerko komo Rustem puido
entregarla a vuestras manos ?
 
-  Es komplikado Hurrem.  Sus hombres estavan
en Amasya  para informarmos si los bruidos ke
korren en el payis son fundados o no...  Te akodras
ke avlimos de esto kon ti i ke asperavamos
novitades de los hombres ke Rustem teniya ke
embiyar a Amasya..
 
-  Si. si !  Por seguro ke me akodro !  Alora yego
el mesajero ?
 
-  Si Hurrem.... Yego i kon una letra de la kuala te
avli.  Grasyas al Di-o ke la puederon interseptar !
Esta aki... melda !
 
Hurrem tomo para meldar la letra kon sus manos i
sus piernas tremblando.  Esta letra ke eya mizmo
aviya redijado por Rustem... Estava echando
eksklamasyones de sorpreza i de endinyasyon.
Ke bien ke aviya pensado a esto !  Esta letra seriya
la fin del Veliaht.
 
-  Esto es una abominasyon.  Allah nunka lo va
pardonar !
 
-  Ni yo Hurrem !  No tengo menester de enimigos
tambien en mi propria famiya..
 
-  No son muestros ijos ke ivan a pensar una koza
tan monstruoza !
 
-  Tienes razon ma estavan siempre a muestros lado !
Mustafa s'engrandesyo sin mi i kon esta mujer stupida
ke lo incho siempre kontra mi.
 
-  Ma vos konosyo de serka !  Kuantas vezes salitesh
endjuntos a guerreyar !  Me trushitesh ermozas kozas
de estos payizes...
 
-  Parese ke se troko.  No es el mizmo.  Se siente
fuerte i kapache de kometer un krimen asemejante
orke los janisaryos keren mas i mas..  No solo sus
janitaryos ma i el tambien !  La ambisyon lo derroko !
 
-  M'espanto !  Vos va azer un mal.  Mos va destruyir
por su ambisyon...
 
-  No !  No penses ansina !  Te dishe ke sere el Sultan
i no el Padre.  Hurrem me asperan en el Divan-i Humayun
(La mas alta reunion del payis dirijada por el Sultan
i sus mas importantes vezires) Te vo vijitar dospues.
 
-  Vuestra djariye sera muy honorada Sultan de los
Sultanes....
 
*
 
Las armadas estavan prontas para salir al kamino.
Sultan Soleiman aviya mandado mesajeros a
Amasya ordonando al Veliaht de ajuntarse  kon
todas sus  fuersas a el, en la vale de  Konya, ke
se topava en el kamino al Este.  Los Shehzades
Djihangir i Selim, sus dos ijos estariyan kon el. 
Shehzade Beyazit kedariya en Konstantiniye para tener
la responsabilitad de todo al lugar de su padre. 
Era el ke iva dirijar el payis i solver todos los
problemes todo el tiempo ke el Padishah  iva estar
absente.  Hurrem auzada a estos echos seriya el
mijor appoyo para su ijo.
 
Hurrem estava asperando el monarko en sus kuartos
porke nunka Soleiman saliya a kombatir sin vinir ande
eya, dar i tomar koraje por todo el tiempo ke no se
veriyan i darsen un largo bezo komo la asiguransya
del amor dayinda bivo en sus korasones.
 
Esta vez seriya krusyal !  Hurrem no saviya si deviya
appoyarlo o kedarse enteramente muda en esta
sirkunstensya... Saviya, malgrado ke el Sultan nunka
mas aviya avlado de  esto, ke era un grande dilema
i un akto terrivle para el korason de un padre ke
adoro su ijo bohor durante 28 anyos...Le pardoneriya
al dalkavo momento ?  Aviyan munchas probabilidades
ke lo oyga en primero !  Ke iva dizir el Veliaht ?
La vedra !  "No es yo ke eskrivi el kontenido de esta
letra padre   !"   Se le estava partyendo la kavesa a
Hurrem.  Este akto final kontrevaliya a la vida por eya
i sus ijos o a la muerte horrivle i yelada...  Noooo !
Ma kaliya ke se modre la lingua i no dizir biervo
sovre esto !
 
Tuvo la attitud de una grande reyna kuando el Sultan 
vino para espartirse de eya.. Lo arresivyo kon una
grande soriza ke saviya le plaziya muncho.  Vistiya
un fistan de la kolor turkuaz de sus ojos, apretada
en su talya fina kon una kadena de oro i kon piedras
presyozas, las mizmas de sus eskularichas ke
metiyan en valor su kuelyo de sinyo.  Sus kaveyos
largos fina debasho de su talya no estavan arrekojidos.
Era la unika en el Harem ke teniya la kostumbre de
desharlos libre, bolando de todas las vandas kuando
kaminava.  Eran komo las flamas ke enkuadravan
su luzyor.  Hurrem saviya ke eran un trezoro i ke a
dingun hombre le plaziya otro modo de penyado !
Era la povretika de Canfeda ke se lo aviya ambezado ! 
Se aviya murido en silensyo el anyo pasado.  Su
muerte aviya kavzado muncha pena a Hurrem ke
aviya perdido una aliyada presyoza i muy savida en
el Harem.
 
-  Estamos prontos para partir Hurrem.  Mi korason
de Sultan bate kon la alegriya ke vo kombatir el
enimigo, darles una lisyon ke por muncho tiempo
no se van a olvidar.  De la otra parte mi korason
de hombre esta triste des de agora por todo el tiempo
ke no te vo tener a mi lado kon tu kavesa repozando
ensima de mi ombro...
 
- Mi sol, el amor de Hurrem !  Tu djariye esta yenna
de orgulyo de apartener a un vayente monarko
venerado en el mundo entero !  Todos delantre de ti
son tan poka koza ke ni pueden alevantar sus ojos
delantre de tu majestiya !  Viktoryas son tu destino
i nada puede egalar tu splendor... Bive kon tu puevlo
mil anyos i nunka mos mankes de sovre muestras
kavesas.  Allah sera kon ti sol de mi vida.
 
-  Komo de ermozas kozas ke kitas de tu boka mujer !
Sos tu ke enflamas mi amor i me siento el hombre
el mas poderozo de la tierra por ti !  Madre de mis
ijos i de muestra presyoza Mihrimah Sultan...  Te
desho aki savyendo ke Beyazid Khan, muestro ijo
te nesesita mas ke mi.... Le desho un grande
Emperyo a governar fina mi retorno.  Seyas a su lado
siempre komo lo fuites kon mi.  Ke se ambeze de tu
eksperiensya i de tu savyedura porke dospues de mi
madre en Ganeden agora sos la mas savida de las
mujeres.  No tengas kudyado por muestros ijos, los
dos shehzades Selim i Djihangir porke yo sere a sus
lados i les ambezare stratejiyas de ganar batalyas. 
Se van a ambezar de tener konfiensya en eyos mizmos
i ser dinyos de muestra kerensya i admirasyon. 
Mis mesajeros tendran la responsabilitad de remeterte
mis letras i trayerme las tuyas komo la briza i el
perfumo de la primavera.
 
Hurrem se aboko i le bezo sus manos munchas vezes...
 
-  Tu djariye bivira solo para arresivir estas letras
Sultan de los Sultanes.... Mi vida... Mi sol...
 
-  Lo se Hurrem, lo se !  Lo se porke es lo mizmo por mi !
Ke Allah te proteje... Estaras siempre kon mi.
 
-  Ke Allah seya kon ti i ke tornes a tu trono kon la
viktorya de tu braso gloryozo !  Mis orasyones te
akompanyaran.....
 
.......  Soleiman aviya salido de los kuartos de la Haseki
Sultan, deshandola kon las lagrimas ke puediyan kayer
libramente de sus karas agora ke estava sola.  Hurrem
keriya solo rogar...  Rogar al Di-o  para ke el Sultan torne
al palasyo sano i rezyo... Le aviya mandado mesajeros a
su ijo en Amasya para ke se topen en Konya....Ke iva
afitar ?  Komo puediya rogar para la muerte de un
mansevo innosente de la mano de su padre ?  Se sintiya
monstruoza, se odyava, keriya aharvarse... Ma saviya
ke no teniya otro remedyo... Seriya la muerte del
Shehzade o su propria muerte i mizmo mas horrivle,
la muerte de sus ijos !...
 
 
*
 
Las armadas del Sultan Ottomano i de sus dos ijos,
en la ala derecha Shehzade Selim i en la ala siedra
Shehzade  Djihangir estavan avansando en Anatolya. 
A sus pasaje el puevlo los aklamava sinseramente...
Se oyiyan bozes gritando   "Muestro Padishah, ke
mos bivas mil anyos kon tu puevlo i tu payis..!"   
Soleiman pensava  "Esta gente diran la mizma koza
a mi ijo Mustafa kuando el mizmo me va matar ! 
El puevlo es leal al Padishah i no importa ken es
este !"  Se estava demandando tambien si Mustafa 
iva kerer kombatir i ordenar a su armada de atakar
sus trupas.  Deviya de tener un plano i el, Soleiman,
teniya ke saver kualo era este plano..  Munchos de
sus janisaryos adoravan tambien el Veliaht ma seriya
posivle ke se tornen kontra el ?  Komo de lokura le
aviya tomado a Mustafa al punto de no  asperar el
momento ke Di-o lo iva yamar a su lado ?   Ke le
mankava agora ?  No era el Shehzade kerido de su
padre i del puevlo entero ?  Le endjidava el korason 
kada vez ke se akodrava de esta horror i de lo ke deviya
de azer..No era mas kada vez !    Se aviya tornado a una
obssesyon i no se puediya  retener  de pensar diya i
noche komo dara el orden a sus mudos de aogarlo aya
mizmo !... El era un  Sultan i Mustafa un enimigo ! No
aviya de pensar mas i mas ensima de esta  kestyon....
Hurrem i Rustem teniyan razon porke eran muy attados
sentimentalmente al Shehzade i es por esto ke tratavan
de ezvacharlo de kometer este krimen, ma el saviya ke
un ijo ke iva detronar i matar a su padre, no iva ni pensar
a deshar en vida sus ermanos, todos ke eran su famiya
i sus keridos.  Agora keriya un momento mas presto
eskapar kon esto i liberarse de la pensada de komo todo
se iva solusyonar. 
 
Se estavan aserkando de Konya i pensava yegar a
la sivdad en dos o tres diyas dospues del  kampamiyento
de akeya noche.
 
 

(a kontinuar kon Sharope)

- Copyright © sefarad.org - 1997 - 2017

Retour au site sefarad.org -