Accueil - sefarad.org

Almendra...parte 3

    MENU    

SEFARAD.org
ESKRITOS de savor
RESHETAS
AIDEZ-nous
Page PRECEDENTE;

Parte  3
 
Mordo estava tenyendo negosiyos kon los vendedores ke viniyan a Smyrna antes de avrir velo para Konstantiniya.
Merkaderes ke trayiyan djoyas ke tomavan el ojo, ropas para azer vistidos de todo modo, episas del
oryente, dantelas, sedas, porselena fina de china, pedasoz lavorados kon arte de muy alta valor....
 
Aviyan pirates tambien ke vendiyan sus trezoros arrovados a otros naves, esklavos i esklavas blankos
i pretos, medisinas/melizinas para los hazinos...
El merkado era uno de los mas rikos de los puertosdel medyo oryente.  Estos mizmos vendedores se
enkargavan a la torna kon produktos del Emperyo, frutas sekas, azeyte de oliva, tapetes, manuskritos
sin presyo,  djoyas por siguro, pedasos de kovre lavorado i munchas otras kozas ke se asperavan kon
impasyensya en los puertos del Norte de Afrika, Kandiya (Malta), Venezya, Genova i munchos otros.
 
Se le aviyan enkomendado munchas kozas de Konstantiniye i el estava azyendo todo su posivle para
topar i arekojer las mijores ropas ke egzistiyan....Entre otras kozas teniya de yevarse tambien sapatos
enkomendados por los pashas, las mujeres del harem i sus amigos en el Saray ke se aviyan auzado a kalzar estos
sapatos de Smyrna ke no se puediyan topar en dingun otro lugar...  Ni el kuero, ni el lavoro ni el gusto i la finesa
de estos sapatos se puediyan komparar a los de Konstantiniye.  EL presyo era alto por siguro, ma a Mordo
no le importava porke sus klientes le pagavan todo lo ke les demandava. 
 
La vedra es ke teniya en tino de merkar  un nave, si sele fadava... Ya aviya negosyado antes unos  kuantos
mezes kon alguno ke keriya vender su nave para merkar uno muncho mas  grande.  No se aviyan entendido
sovre el presyo ma Mordo estava siguro ke esta ves lo iva konvenser. En Konstantiniya era muncho mas karo de
lograr un nave !  Pensava ke mizmo sin alesharse del Emperyo, entre puertos serkos, iva ser muncho mas fasil
de transportar sus ropas i mizmo kon pirates(menos en las aguas del Emperyo)  iva ser mas seguro
tambien... Aviyan munchos bandidos en los kaminos !
 
Mordo de Toledo teniya i otra koza en tino.....
No saviya komo se iva tomar, komo iva lograr esto ke le estava burakando el meoyo i se kedava horas enteras
mirando a las estreyas...
 
No es la primera ves ke estava viniendo a Smyrna para merkar sapatos ke le enkomendiyan.  Munchas vezes
aviya echo negosyos kon Bohor efendi, desendyente de los sapateros de Kalatayud,  maestros de los
kueros i de todo lo ke se aziya kon kuero. Mordo se teniya ido mizmo una vez en su kaza,
dospues ke le aviya komendado buen karar de ropa, koza ke por seguro tomava muncho tiempo de aparejar.
Se aviya kedado en el Konak de los Benezras i aviya aresivido kavod (respekto) i buenas palavras siempre.
Klara Benezra era una espoza ke aresiviya djente kon muncho grasya i gusto.  Se akodrava ke nunka
se enfasyava de avlar horas enteras kon eya en la prezensya de su marido o kuando Bohor efendi
estava en su lavoro, tratando de eskapar kon sus ijos i sus lavorantes lo ke le aviya komendado Mordo
para Konstantiniye.
Durante estos diyas Mordo vijitava sus otros klientes i las personas kon las kualas estava azyendo negosyos.
Es kuando era el envitado de honor de Bohor efendi ke enkuentro los ijos i la ija regalada del balabayt,
Almendra, ermoza entre las ermozas...

No kayiya djusto de azer  kualkel paso ni a esta sinyorita ni a sus paryentes todo el tiempo
ke era el envitado de la kaza. Tratava kon todo su pueder de mirar a otra parte kuando Almendra
entrava en la kamareta...Komo se puediya detener la persona delantre de tanta grasya i de tanta
ermozura !  A vezes el Sielo le ayudava i se topavan por unos kuantos minutos a solos i alora
Almendra riyiva mostrando la blankura de sus diyentes komo perlas....Se le riyivan fina
aryento de los ojos tan misteryozos ke dinguno no puediya dizir si eran vedres o bleu ! Lo tratava komo
un grande senyor, amigo de su padre, i tomava de la mano de los servyentes las bevyentas  o las frutas
kuando los trayiyan,  para siyervir los eya mizmo a sus paryentes, sus ermanos i los envitados, Mordo,
en este kavzo, ke le aviya plazido de la primera vez ke lo aviya visto !
 
El viyernes, akel diya, kuando se estavan aparejando por Shabat, Almendra se soflamo, empeso a tremblar
porke su madre estava chapetada entera kuando le disho :
 
(a kontinuar  kon Sharope)
 

- Copyright © sefarad.org - 1997 - 2017

Retour au site sefarad.org -