Accueil - sefarad.org

Almendra...parte 4

    MENU    

SEFARAD.org
ESKRITOS de savor
RESHETAS
AIDEZ-nous
Page PRECEDENTE;

Parte    4


- Ijika miya, tengo muy buenas novitades para ti !  Esta vez me parese ke
me vo desidir i kon toda mi tristesa en la alma vo dizir  " a la hora buena "
a la senyora  Abenyakar.  Esta noche mizmo intendo diskutir kon Bohor
efendi i esto sigura ke el tambien va ser muy kontente de darte a este
sharope de persona ke es Samuel efendi.  Ya lo konoses i tu kerida mia. 
El ijo regalado de Graziella Abenyakar.  Mi amiga buena i ija de los mas 
grandes merkaderes de Kalatayud i Smyrna.   Ke boda vamos a azer
presyada mia !  Nada va mankar i mi ijika se va kazar komo una reyna. 
Esta bolando de alegriya Almendra....Ayyy No kemes los  pimyentones
aya !  Aze atensyon !
 
- Mi madre, mi madre buena....Ke me estash dizyendo ! Kazarme ? Yo ?
 
- Si ! ke si ! Te kero ver felis/horoza en tu kazika ke vamos a enderechar
komo un palasyo ! Samuel efendi esta pronto a azer todos tus dezeyos ! 
Esta loko por ti mi prensesa .... Vasa ser la mas rika desendyente de la
mijor famiya de Kalatayud.  Ke mijor de esto ?  Ademas un hombre
ermozo, joven, respektado i kerido de todos...Mas ke ?  No ay mijor
persona en toda Smyrna ke mos konvenga mas. Esto enkantada kerida
miya ! Mi prensesa luzya se va kazar i kon bueno va tener mi inyeto baron
(ijo) en mis brasos al anyo ke viyene...Inshallah..
 
Almendra kedo la boka avyerta sin pueder dizir un biervo.  Sus piezes
estavan komo enklavados a las tavlas de  embasho.  En sus ombros
sintiya la pezgor de tonas de marbro i fue komo si toda su mansevas
se iva bolado en unos kuantos segundos ! Ke puediya dizir ?  Ke kijyera,
mas de todo, ke la den a Mordo efendi ?  Sus miradas asyendiyan fuegos
en su korason..I el, estava sigura ke  estava tomando plazer de verla i
avlarle... Sera vedra ke teniya flama por eya tambien ?  Deke se le fuyiya
los ojos kuendo estava sigura ke la keriya mirar ?  Teniya mujer en
Konstantiniye ?  Puedeser ke la viya  komo la ijika del senyor kon ken
aziya negosyos i nada mas !  Si solo puediya estar sigura de lo ke le
pasava por el tino !
 
Almendra no puediya diskutir las desizyones de sus paryentes por su
futuro !  De dinguna manera una ija puediya alevantar kavesa i dizir
 " no " a sus paryentes !  Esto no se teniya visto ademas ke, aki, ni
 saviya kualo Mordo efendi estava pensando sovre eya. Ke ojos de
brezas ke teniya ! Kuando la mirava se sentiya kemando entera i
kijiyera ke estos sigundos nunka eskapen...Ke sigan kontinuando
eternelamente...  Komo puediya konvenser su madre a asperar un
poko otro antes de avlar asu Senyor padre ?
 
- Senyora madre...es  ke...

- Si  ?  Te esto oyendo....

- Ke es Almendra  ?  Me puedes dizir todo lo ke pensas ya lo saves
ke sos lo bueno ke tenemos...Avlame kerida...

- Mi madre.. Es muy grande honor ke me aze Samuel efendi i so
agradesyoza/agradesida  a su familya ma no me estava asperando
a una koza asemejante.  Me vino muy supito...Te rogo, dame un
poko de tiempo para auzarme a esta ideya antes de avlar kon mi
senyor padre. 

Klara estava riyendo i entendyendo su ija kon ken nunka aviya avlado
dayinda de espozoryos i de kazamiyento, de muchachos o de amor ! 
Era tan innosente su Almendra a los kaveyos de seda ! Por siguro ke
iva asperar un poko i avlar kon su ija mas... Kijyera ke los mansevos
se viyeran  i penso ke la iva envitar a  Graziella Abenyakar kon su ijo
a bever sherbetes freskos kon dulse de almendras ke aviya echo unos
kuantos diyas antes.

Graziella aviya vinido ande eya un dospues de medyo-diya i avlandole
de aki i de aya aviya avrido la kestion de los mansevos i kuanto
kijyera por ernuera la dulse Almendra !   Klara estava soriyendo porke
ya saviya ke su kerida amiga se iva desidir a demandar la mano de
su ija un diya, i este diya aviya vinido a su grande allegriya.  Todas las
dos madres saviyan ke no puediya aver un mijor partido para sus ijos.

Klara le aviya arespondido ke iva ser una honor para eyos i ke iva avlar
kon su marido i kon su ija i ke no veiya dingun inkonvenyente para este
kazamiyento.  Las dos mujeres se aviyan bezado i abrasado, kontentas
en sus konsiyensyas i en sus korasones.

Dospues de aver aperejado las halas (el pan)  del Shabat, la supa de
gayna, el aroz kon bezelya (green peas - afuna- petit pois), las koftikas
sofritas i el peshkado kon avramila i meter debasho de la lumbre el
hamin (las avas/los garvansos kon los guevos) para el diya de Shabat,
madre i ija entraron al hamam (banyo) de sus kazas.  Zeliha, sus
serviyenta las fregava kon maestriya i a la fin kon olios parfumados
ke viniyan kon naves del oryente egzotiko.  Se vistiyan kon ropas de
seda de kolores klaras i se metiyan djoyas para aresivir Shabat kon
alegriya i kantes.  Era un momento profundamente mistiko kuando
asyendiyan las kandelas i kada una se konsentrava en su mundo para
arogar Dio de todo su alma, demandarLe lo ke keriya, antes de
abrasarsen kon una mueva kerensya kada ves.  Era klaro ke este
Shabat Klara iva arogar por la felisidad de su ija kon Samuel, i
Almendra iva demandar al Dio ke le mostre un kamino para su
korason,  porke saviya ke no iva pueder arondjar lo ke le demandava
su madre.   Teniya lagrimas en los ojos....Mordo...Deke estava
pensando en el siempre....Su nombre solo le kamava la boka !
Komo lo iva mirar en los ojos esta noche en la meza de Shabat !
Ya estariyia en kamino.... Sus manos estavan tremblando.

Akel Shabat estavan envitados ande eyos su tiya Julia kon el Tiyo
Isaac i sus 2 ijos Miryam (Meri) kon su ermano Viktor. Viktoriko
kon un ojo blu i el otro vedre komo el gato famozo de la sivdad
Van en el Este del Emperyo. Esta  sivdad se aviya  konkistada 
antes 1 anyo, en 1548, dospues
de una gerra  sanglante kon los Safavis. El
Padishah (Sultan) Mehmet II,  el Konkistador,  Khan de los
Khanes i el Emperador de las tres  sivdades de Konstantiniye
(istanbul),Bursa i Andrianopolis (Edirne),  estava
agrandesyendo su emperyo de todas las vandas i estava
inchendo el trezoro ottomano kon rikezes sin fin. Almendra
aviya resivido ke regalo del ijo de sus serviyenta Zeliha,
un gato asemajado, entero blanko  kon un ojo blu i el otro
vedre, de esta sivdad, kuando aviya tornado, komo un milagro
de los sielos, sano i rezyo de la gerra kon los Safevis !
Adorava su gatiko i se echava kon el malgrado los gritos de
su madre ke diziya ke un diya se iva aogar kon los pelos !
No lo aziya al ojo de su madre, por siguro, asperava ke todos
se echen i durmen para tomarlo a su lado i siempre le kontava
a su madre una otra istorya ! Klara se inyervava ma a la fin
riiya i se iva a karesar tambien este gatiko tan kerensyozo i
tan dulse al tokar.

Kuando los envitados vinyeron pasaron todos al bodre de la
meza i Bohor Efendi izo el Kidush kon todos los rituales del
Shabat santo. Alavo,  bendizyo i abraso su mujer i sus ijos
i Mordo tambiyen.  Disho ke kontento ke estave de toparse en
meza de allegriya, kon todos sus keridos i sus estimados
envitados uno i uno valorozos i keridos por el. Los jovenes,
todos le bezaron la mano i empesaron a komer de todo lo ke se
aviya aparejado por akeya noche. Almendra estava mirando a su
plato de sar ke se le iva ver todo lo ke le estava lavorando
en la kavesa !  Mordo estava asentado en frente de
eya i los ojos se les atava mismo sin kererlo, komo kon una
fuerse ke no puediyan kontrolar. 2 vezes Klara izo aluzyon  a
la "allegriya de bodas"  i  "el plazer ke siente los paryentes
kuando sus kreaturas bolan de kaza para kazamiyentos entre
jovenes ke se valen de parte i de otro ", Almendra keriya
dispareser !  Entera korolada i  espantandose ke las lagrimas
le ivan eskurir otro un poko ! Mordo estava alegre i alevantando
su kupa de vino por la salud del balabayt i de su kerida espoza.
Una vez alevanto su kupa mirando a Almendra i dospues a sus
paryentes i dizyendo  " de novya senyorita ALmendra !"
Todos alegres disheron  " de novya, de novya, de novya " 
a Almendra i a Meri....Meri estava riyendo ! Almendra se keriya
enterrar biva !

Mordo aviya entendido estos aluzyones a su prezensya en la kaza !
"jovenes ke se valen de parte i de otro"  !!!!  Ke mas ke el i
Almendra ? Otro un poko i se iva echar a sus pies i demandar
le la mano !  Agora mizmo....deke no !?
El vino le dava koraje i su empansyensa  para azer la suya mas !

(a kontinuar kon Sharope)

- Copyright © sefarad.org - 1997 - 2017

Retour au site sefarad.org -