Accueil - sefarad.org

Almendra...parte 5

    MENU    

SEFARAD.org
ESKRITOS de savor
RESHETAS
AIDEZ-nous
Page PRECEDENTE;

Almendra...parte 5
 
Se kaliya detenido...No era la hora de azer asemejante
error i kavzar ke todo se termine antes mismo de empesar !
Le estava endjidando la kavesa i pensava ke esto era
pormodo ke sus sentimyentos  estavan demasyados puederozos
ensima de el.  El"no saver ke azer"  o "komo azer" o no
pueder tomar una desizyon en este direksyon le estava kitando
el repozo. Estava triste o muy alegre....En vezes yenno de
esperansa i a siertos momentos dezesperado porke saviya ke
importante  i amada era Almendra en su kaza i nunka
la ivan a deshar ir a bivir kon su marido en Konstantiniye ! 
Por siguro ke Klara la kereriya serka de eya para pueder
siempre vijitarla.
 
Mordo estava pensando a todo esto kuando Bohor efendi lo yamo
para ke se vaygan kon Isaac su kunyado i sus dos ijos grandes
a una otra kamarate, para meldar las eskrituryas de
los savyos ensima de la Tora.  Todos aviyan eskapado de komer,
las mujeres se aviyan ido a la kamerata de asentar dospues ke
se aviyan alevantado todos endjuntos de la meza. Dingunos se
meneyava  de su  siya  antes del balabayt i Bohor Efendi no era
aver pezgado en ansina de kozas.
 
Bohor efendi teniya en su kaza livros en Ladino de los grandes
savios de Kalatayud i mizmo de otras sivdades. Su familya i mas
dospues el, aviyan pagado presyos enormes para obtenerlos !
Eran un trezoro raro de muy alta valor i el mijor momento de la
semana  para el era kuando se retirava en esta kamareta kon sus
envitados i sus ijos para meldar i entrar en debatos sin fin
sovre lo ke meldavan.
 
Mas de una ves Mordo le aviya plazido kon su saver i sus ideyas
tan asemejantes a los del hahamim i djente savida.  Era buen
djudiyo, hombre de negosyos, konosido por todos kon su hohma,
su saver i por  ser derecho i hombre de palavra.
 
Bohor efendi sin pueder rekoneserlo, mizmo de si para si, aviya
pensado ke un mansevo tan valorozo puediya ser su yerno !
LO keriya bien a Mordiko ma no saviya si era kazado o no i
si teniya entisyones de formar una famiya i de otra parte ke
dizeriya Klara si su ija presyoza se iva ir tan leshos kon su
marido ! En todo kavzo mirariya de un buen ojo si Mordo le
avlariya sovre esto...No saviya nada dayinda de los planos de
su mujer i de los batires de su ija !
 
Mentre los hombres estavan diskutyendo kon flama,
ardor i entusyazmo sovre las ovras eskritas en ladino,
en letras rashi, i se aviyan olvidado del mundo entero
por estar konsentrados en estos debatos, las mujeres
i los jovenes estavan diskutyende en la kamareta de
asentar, dekorada kon muncho gusto i ande se puediyan
ver los lavoros eskstraordinaryos de alguja de la
senyora de la kaza.  Kada kavesal ensima de los
doshekes (doshek = kanape de al tiempo) era de una
ermozura diferente i las kolores bivas de las flores,
las broderiyas inkreyivles ensima del kadife (velours)
klaro o eskuro, asigun los motovos del lavoro,
akodravan las guertas de las kazas de Kalatayud, las
flores sembradas al doredor de los pozos, la verdura
inkomparavle de los kampos de estas tierras suyas,
lavoradas kon sus sudor...Sefarad se goliya en kada
kanton de las kazas djudiyas...Sefarad tan dulse i
tan amarga a la fin.....Saviyan ke se aviyan ido para
mas no ritornar ma en sus korasones esperavan ke ivan a
boltar un diya i se ivan a topar debasho de estos sielos
mas blu ke en otros payises ande las estreyas semblavan
mas serka a los ke tornavan las miradas ariva...KUando
la noche kuvijava el mundo de la solombra del repozo...
Viktoriko estava djungando kon "karamela" el gato (la gata !)
de Almendra ke lo areskunyava sin apiyadarse de el !
No le plaziya ke djugaran kon su kolika...O la tokaran !
Se alimpyava diya entero en lavandose kon se aluenga i
le paresiya ke la estavan ensuzyando kuando la karesavan !
Gatika loka la yamava Almendra !  Hazina de limpyezas !
Trololo de gato ke odyava todos i todo lo ke no konosiya
o no teniya golido antes ! Kuryoza koza komo era atada a
Almendra i suportava los de kaza ke no se aserkavan muncho
de eya !  Nada mas le enteresava... Sus kantonikos ande
se arrodeyava para durmir, el tapet de seda en la pared
de la kamareta de komer para aguzar sus unyitas komo
alfinetes ! Las noches durmiya ensima de eya  i yorava
si no teniya su kalor .....Klara se metyo supito a
riyir !  Julie, su ermana, le demando porke estava
riyendo i Klara le arespondyo :
 
- Julika kerida !  Esta ija mia komodo la vamos a kazar kon
el ugursuz de gato ke tiene !Va saltar al garon de su
marido si viyene allado de eya ! I, kuanto la konosko yo
a Graziella, te puedo dizir ke no va tolerar dingun gato
dingun perro afilu dingun parparo en su kaza !
-  Graziella ?  Ke tiyene Graziella kon la "karamela" de
Almendrika mi ermana ?
-  No te dishe ?  Ayyyyyy te kontare !  El otro dia......
  .......
Almendra travando Meri por la manga de su vistido la
yevo a su kamareta i emposo a  yorar en sus ombros....

-  Mi kerida primika, porke te veygo yorar ansina ?
Tu sos la mas mazaloza senyorita del mundo enterro !
Ke te manka, ke te duele, di me i dare mi vida por ti !

-  Meri, Merika mi ermana de siempre ! Me duele.....
Aki en mi korason !  No se komo esto fue... No es mi
kulpa ! Yo no ize nada.... Un fuego me apanyo !  No
durmo, no bivo mas...Me derrito por un nombre solo !

- Un nombre ? Di me kual es !

- Mordo de Toledo !  El senyor merkador de Konstantiniye,
mi korason se abrazo de sus miradas, mis ojos no ven nada
mas ke el !

- I el ?

- No se ! Siento ke me mira komo si el tambien me keriya !
Ma no se .... A vezes sus ojos me fuyen.... Mira tristamente
a otra parte.  Sera kazado ?  Tendra mujer i ijos ? 

- No seyas tan triste mi primika ! No puede egzistir
un joven ke no se namorariya de ti a la primera mirada
tan buena, tan nikochera, i tan bella (mas de ermoza)
ke sos !  Por siguro ke no penseriya ke en ti mi
dulse Almendra.  Ken puede mezurarse a ti ermanita kerida ?

- Ma si es kazado ?

- Lo saveremos en pronto...Te vo ayudar ! Seka tus lagrimas !
Tus ojos son para riir i nunka yorar mi alma !

- I.......No es todo !
- Ke mas prima Almendra ?
- Lo mas negro de todo ! 
- Elohim Lishmoreynu ! Avla.....No puedo mas !
- Mi senyora madre ... Su allegriya es un chaketon a mi dezgrasya !
- Ke me dizes ! Tiya Klara ?  Komo puede ser ! Te adora !
- Si...Si....Ma no save !  Ni kijyera, penso, saverlo !

- Ke amas Mordo efendi ?  Ke no le gustariya en el ?
  Veygo ke avlan bueno entre eyos i riyen i lo afishuga komo ben (ijo).

- No es esto !  Me va dar a otro !  Al ijo de su amiga, la tiya
Graziella !  Me kere por su ijo Samuel efendi.  Una buena persona
por siguro, buena famiya, buenos djudyos, de Kalatayud komo mozotros !
Joven i ermozo i riko...Todo bien....Todo kon gusto...Ma yo no lo
kero porke amo a un otro !

- Nooooooo !  Ke me dizes !  No es posivle !  Dio de mis padres !
I...Te kere i el ?

- Penso ke si !  Dizes ke su madre avlo kon mi senyora madre sin ke
su ijo sepa sus dezeyos ?

- Ah Almendra !  Me matas agora ! Tus palavras son kuchiyos afilados
ke se inkrustan en mi korason !

- Meri, Merika mi dulse primika !  Tu sos mi ermanika kerida !
No me avles ansina !  Yo matarte ?  Nunka en mi vida ! Muerere yo mizma !

- Portanto si ! No...No es tu kulpa mi kerida....Es la vida i no kero mas
bivir ! No puedre areyevar este pezgo, kedar de riza i allegrarme alora
ke me kero murir !

- Ke dezgrasya me kontas !  Avla una ves de buena !  Ke te endjida,
ke es este pezgo, ke te ago yo sin ke lo sepa, deke esta dolor frente
mis ojos ke no pueden mas ???...Meri, mata me i no me des kudyos mas !

- Keres saver ? Si?  Estamos peryidas las dos ! 
- Avla Meri....No tengo mas fuersas...

- Mis yoros seran los tuyos....I los tuyos seran los miyos...Porke
yoraras savyendo ke me duele kuando estaras kon Samuel i yorare yo
kuando se ke el no puede ser felis tenyendo una mujer ke ama a un otro !

- Ke ?  Ke oygo !  Desfortunada ke so !  Ke izimos de negro tu i yo !
Es un chaketon de los Sielos ! Mijor dispareser de esta tierra i nunka
mirar a el ke tomare de tus manos !

- Almendra...Ke okuryo ke en un momento se izo de arriva a basho muestras
vidas  ?  Komo pekimos ?  Ke pekado tan grande kometimos  ke fuimos
kastigadas de manera tan krual ? Ke puedemos azer ? Komo biveremos
los dias a vinir ....TEnemos ke salvarmos i kurar muestra dolor. No se
komo, no se kuando...Ma devemos darmos las manos i pensar komo
toparemos remedyo i dar fin a muestros yoros !
 
(a kontinuar) 
 

- Copyright © sefarad.org - 1997 - 2018

Retour au site sefarad.org -