LA KILA DE CAMARGO

 

 

Los sefaradim ke se aresentaron a fines del siglo XIX i prinsipios del XX en la Komunidad Sefaradi Madre de Buenos Aires, se adjuntaron arodeando la kaleja Camargo, ke daria el nombre a su Kilá. Tinian entre sus vizinos a djudios ashkenazim, ansi ke unotros inmigrantes ,espanyoles, italianos i mas ke bivian en armonia i amistad , kon respekto los unos kon los otros. Las kazas eran umildes, kon grandes kurtijos i kamaretas ke partajavan las famiyas de este kartier. Vinidos de sivdades de Balkanes, las avlas de los sefaradim de Izmir,de Rodes,de Estambol se sintian en las kalejas i en el merkado i avagar avagar, fue pujando esta komunidad. En 1914 nasio la "Sociedad Kahak Kadosh y Talmud Torá La Hermandad Sefaradí". En el Akta de Fundasion se topavan a la kavesa Jacobo Carmona i Sekretario Salomon Guini; Tesorero Rafael Emanuel. Vokales:Samuel Guini,Moisés Albala,Salomón Nachajón,Rafael Aljanati,Israel Calomiti,Salamón Farji y Samuel Buchuk.
Kon grandes esforzos de todos se rehusho a fraguar en el anyo 1919, la Komunidad Sefaradi de Buenos Aires en la kaleja Camargo, ke anyos dempues trokava en la mueva i moderna Kilá aktuala. Entre los Jajamin : Samuel Buchuk, León Alaluf, León Catán, Benjamín Cohen, Jacobo Caballero, Bensión Cohen, Bojor Isaac Cusí, José Levi, Selim Mizrahi, Jacobo Batías, Salomón Pésaj, Isaac Mayo...
I entre los Rabanim el afamado Sabetay Djaen ; i desde 1958 el Gran Rabino Aaron Angel ,kon estudios rabínikos en la Isla de Rodes i un rolo destakado de aktuasion entre los mansevos, por el kualo resivio el Galadron "Yerushalaiym". Esta Komunidad se okupo de los jazinos messo la kreasion de la Sosiedad "Pro-Medikamento" i rehusho a fraguar el aktivo Club Sosial Israelita Sefaradi

En amuchiguandose esta Komunidad, tomaron sovre si el merito i la grande responsavilidad ke les permeto de merkar,en las afueras de Buenos Aires, el Cementerio Sefaradi de Bancalari, kumpliendo ansi el dezafio de rehushir kon un grande kompromizo komunitario.


Matilde Gini de Barnatan
Madrid, Agosto de 2006

Retour au sommaire


- Copyright 2006: Mose Rahmani -